Tʋma Labʋ 22

1«Man-caanaa nɛ man-ɖalaa mɩ! Lɛɛlɛɛyɔ, mahʋʋ mɔn-tɔm, iwelesi nɛ ɩnɩɩ.» 2Pɔɔlɩ tɩkuli ɛ-nɔɔ nɛ panɩɩ se pɛ-tɛ Ebree taa ɛyɔɔdʋʋnɩ-wɛ lɛ, pɛtɛzɩ sum ɖiɣ ɖiɣ. Peeɖe eheyi-wɛ se: 3«Ma lɛ, mɛnkɛ Yuda tʋ, palʋlɩ-m Taarsɩ Siliisii ɛjaɖɛ taa. Ɛlɛ́, Yeruusalɛm cɩnɛ mancaɣ abalʋ weyi payaɣ se Gamaalɩyɛɛlɩ yɔ ɛ-cɔlɔ nɛ ɛkpɛlɩkɩ-m ɛzɩma mbʋ́ pʋwɛɛ se mɔnɖɔ ɖɔ-cɔzɔnaa paɣtʋ yɔɔ ɖeyi ɖeyi yɔ nɛ mɔnkɔɔ manpaɣlɩ. Mɛ-ɛsɩyɛ kɛsɛnɩ Ɛsɔ tʋmɩyɛ ɛzɩ mɩtɩŋa mɩ-ñɩna sɛʋnɩ-ɖɩ sɔnɔ yɔ. 4Maawɛ mbá pɔɖɔŋ Yesu nʋmɔʋ taa yɔ pa-wayɩ kaŋ kaŋ nɛ mañɩnɩɣ se mankʋ-wɛ. Maakpa halaa nɛ abalaa nɛ mɔhɔkɩ-wɛ nɛ manɖʋ salaka. 5Tɔm ndʋ́ mɔyɔɔdʋʋ ɛzʋnɔ yɔ, cɔjɔnaa ñʋʋdʋ nɛ tɔm hʋyaa sɔsaa papɩzɩɣ palɩzɩ ma-aseɣɖe. Halɩ maawobi mamʋ takayɩsɩ pa-maɣmaɣ pɔ-cɔlɔ se mowoni ɖɛ-tɛ ñɩma cɔlɔ Damaasɩ nɛ pɩsɛɣ mankpa patɩŋa nɛ mɔnkɔnɩ-wɛ Yeruusalɛm cɩnɛ nɛ pɔhɔ pa-nɩŋgbaaŋ.»

Pɔɔlɩ kɛdɩɣ ɛzɩma Kɩpaɣlʋ ya-ɩ yɔ

(Tʋma 9.1-19; 26.12-18)

6Pɔɔlɩ tasɩ yɔɔdʋʋ se: «Pʋ-yɔɔ mankpaɣ nʋmɔʋ nɛ mɔnkɔɔ mɔñɔtɩnɩ Damaasɩ. Pʋkɔma ɛzɩ wɩsɩ siɣu yɔ lɛ, ñalɩmɩyɛ sɔsɔɖɛ naɖɩyɛ tɩlɩʋnɩ ɛsɔdaa yem nɛ ɖitii mɔ-yɔɔ. 7Peeɖe mɔntɔlɩ tataa kpʋʋʋ nɛ manɩɣ pʋyɔɔdʋʋnɩ-m se: ‹Sɔɔlɩ! Sɔɔlɩ! Pɩlabɩ ɛzɩma nɛ ŋwɛɛ ma-wayɩ kaŋ kaŋ ḿbʋ́?› 8Ɛlɛ́, mɔnpɔzɩ se: ‹Kɩpaɣlʋ! Ña anɩ?› Pucosi-m se: ‹Ma Nazarɛɛtɩ tʋ Yesu weyi ŋwɛ ɛ-wayɩ kaŋ kaŋ yɔ.› 9Mbá ma nɛ wɛ ɖɩɩwɛ peeɖe yɔ, pana ñalɩmɩyɛ ńɖɩ́ ɖɔɖɔ. Ɛlɛ́, patanɩɩ weyi ɛyɔɔdaɣnɩ-m yɔ ɛ-nɔɔ. 10Peeɖe mɔnpɔzaa se: ‹Kɩpaɣlʋ! Ɛbɛ pʋwɛɛ se mala?› Ɛlɛ́, ecosi-m se: ‹Kʋyɩ ŋwolo Damaasɩ, peeɖe peheyiɣ-ŋ mbʋ́ pɩtɩŋa Ɛsɔ ɖʋwa se ŋla yɔ.› 11Ñalɩmɩyɛ sɔsɔɖɛ ńɖɩ́, ɖɩɩyʋlɩsɩ mɛ-ɛsɛ nɛ maatasɩɣ naʋ. Ɛlɛ́, man-taabalaa ɖɔkɩ me-nesi taa nɛ pɔhɔm-m nɛ powoni Damaasɩ.

12Abalʋ nɔɔyʋ kɛwɛ peeɖe, payaɣ-ɩ se Anaanɩyaasɩ. Ɛɖɔŋ Ɛsɔ paɣtʋ yɔɔ camɩyɛ nɛ Yuda ñɩma tɩŋa lɩzɩɣ ɛ-yɔɔ aseɣɖe kɩbanɖɛ. 13Ɛnʋ kɔmnɩ mɔn-cɔlɔ nɛ eheyi-m se: ‹Man-taabalʋ Sɔɔlɩ! Ñɛ-ɛsɛ ekuli nɛ ŋna!› Kpaagbaa ḿbʋ́ lɛ, mɛ-ɛsɛ kuli nɛ manaɣ-ɩ camɩyɛ. 14Ɛlɛ́, ɛtasɩ-m heyuu se ɖɔ-cɔzɔnaa Ɛsɔ lɩzɩ-m ɖooo lɔŋ se mantɩlɩ mbʋ́ e-liu wɛɛ yɔ nɛ mana Weyi Ɛtʋʋzaa yɔ nɛ manɩɩ ɛ́lɛ́ nɔɔ taa tɔm. 15Mbʋ́ pʋyɔɔ yɔ, ma pʋwɛɛ se mɛnkɛnɩ ɛ́lɛ́ aseɣɖe tʋ nɛ monsusi ɛyáa tɩŋa mbʋ́ pɩtɩŋa manawa nɛ manɩɩ yɔ pʋ-tɔm. 16Anaanɩyaasɩ tɛm-m heyuu ḿbʋ́ lɛ, ɛpɔzɩ-m se lɛɛlɛɛyɔ, ɛbɛ manɖaŋaa ɖɔɖɔ yɔ? Pʋwɛɛ se mowolo palabɩ-m lɩm sɔʋ sɔnzɩ nɛ mentendi Kɩpaɣlʋ nɛ ɛñalɩ-m man-kɩwɛɛkɩm.»

17Pɔɔlɩ tasɩ yɔɔdʋʋ ɖɔɖɔ se: «Mɔnkɔm manpɩsɩ Yeruusalɛm lɛ, mowolo Ɛsɔ ɖɩɣa taa nɛ mɛnsɛɣ-ɩ. Pɩkɛdaa lɛ, pɩlabɩ-m ɛzɩ ɖoziye yɔ 18nɛ mana Kɩpaɣlʋ nɛ eheyiɣ-m se: ‹Kʋyɩ kpaka nɛ ŋlɩɩ Yeruusalɛm tɛtʋ wayɩ lɔŋ, mbʋ́ pʋyɔɔ yɔ, Yuda ñɩma ɛɛkaɣ tisuu mɔn-tɔm ndʋ́ ŋheyiɣ-wɛ yɔ.› 19Ɛlɛ́, moncosi se: ‹Kɩpaɣlʋ! Naa pa-maɣmaɣ pɛtɛm sɩm se mɔncɔwaɣnɩ Yuda ñɩma Ɛsɔ ɖɩsɛyɛ ndɩ ndɩ taa nɛ mankpaɣ mbá pɛwɛnɩ lidaʋ ñɔ-yɔɔ yɔ nɛ mamakɩ-wɛ nɛ maɖʋʋ-wɛ salaka! 20Alɩwaatʋ ndʋ́ pakʋ ña-aseɣɖe tʋ Etiyɛɛnɩ yɔ, ma ɖɔɖɔ maawɛ peeɖe nɛ mantɩnɩ pa-taa mbá pakʋwaɣ-ɩ yɔ pɔ-yɔɔ. Maaɖaŋnɩ-wɛ po-wondu.› 21Peeɖe eheyi-m se: ‹Kʋyɩ! Mentiyiɣ-ŋ poliŋ, mbá pɛtɛkɛ Yuda ñɩma yɔ pɔ-cɔlɔ.› »

Pɔɔlɩ nɛ Room sɔɔjanaa ñʋʋdʋ sɔsɔ pɔ-tɔm

22Ɛyáa samaɣ welesaɣnɩ Pɔɔlɩ nɛ pʋkɔɔ pɩsɩɩnɩ alɩwaatʋ ndʋ́ ɛyɔɔdɩ tɔm pee ana yɔ. Peeɖe papazɩ kubusi mabʋ se: «Abalʋ ɛnɛ, pakʋsɩ-ɩ kedeŋa yɔɔ! Pɩtamʋnɩ se ɛtasɩ caɣʋ wezuu!» 23Pamakaɣ kubusi nɛ pɔlɔʋ po-wondu ɛsɔdaa nɛ pakʋsʋʋ mʋzʋʋ se pɩwɩlɩ se pɩkɩlɩ-wɛ wɩzʋʋ. 24Peeɖe Room sɔɔjanaa ñʋʋdʋ sɔsɔ ha nɔɔ se pasʋnɩ Pɔɔlɩ pa-pɩlɩʋ taa nɛ polu-i agbazɛɛ nɛ ɛyɔɔdɩ nɛ panɩɩ mbʋ́ pʋ-yɔɔ ɛyáa samaɣ wɛɛ kamakɩnɩ-ɩ kubusi ḿbʋ́ yɔ. 25Pɔkɔm pɔhɔkɩ-ɩ se poluu-i lɛ, ɛpɔzɩ sɔɔjanaa ñʋʋdʋ weyi ɛ́lɛ́ kɛwɛ ɛ-cɔlɔ peeɖe yɔ se: «Pɩha-mɩ nʋmɔʋ se ɩma Room tʋ yem nɛ ɩtahʋʋnɩ-ɩ nɛ ɩkʋ ɛ-tɔm naa we?» 26Ɛ́lɛ́ nɩ ḿbʋ́ lɛ, ewolo eheyi pa-ñʋʋdʋ sɔsɔ se: «Abalʋ ɛnʋ ɛkɛ Room tʋ! Ɛzɩma ŋlakɩ kpem yɔ?» 27Peeɖe ɛ́lɛ́ ñowobi Pɔɔlɩ cɔlɔ nɛ ɛpɔzɩ-ɩ se: «Cosi-m nɛ manɩɩ se ŋkɛ Room tʋ na?» Ɛ́lɛ́ cosi-i se: «Ɛɛɛ!» 28Peeɖe ɛ́lɛ́ ñekitini-i se: «Ma lɛ, mɛhɛyɩ liidiye sɔsɔɖɛ nɛ pʋcɔ manpɩsɩ Room tʋ.» Pɔɔlɩ ñekitini-i se: «Ma lɛ, ɖooo palʋlʋʋ-m yɔ, mɛnkɛ Room tʋ.» 29Kpaagbaa ḿbʋ́ lɛ, mbá pɩɩwɛɛ se polu-i agbazɛɛ nɛ ɛyɔɔdɩ yɔ, pɛɖɛɛ peyebi-i. Pa-ñʋʋdʋ sɔsɔ ɛnʋ ɛ-maɣmaɣ ɛnawa se ɛkɛ Room tʋ lɛ, sɔɔndʋ kpa-ɩ, mbʋ́ pʋyɔɔ yɔ, ɛnʋ kɔtɔmnɩ se pɔhɔkɩ-ɩ.

Powoni Pɔɔlɩ cɔjɔnaa sɔsaa nɛ tɔm hʋyaa sɔsaa cɔlɔ

30Tɛʋ fema lɛ, sɔɔjanaa ñʋʋdʋ sɔsɔ ɛnʋ ɛñɩnɩɣ se ɛna mbʋ́ Pɔɔlɩ labɩ kpem nɛ Yuda ñɩma kʋyʋʋ ɛ-yɔɔ yɔ. Pʋ-yɔɔ ekpeɣli cɔjɔnaa sɔsaa nɛ tɔm hʋyaa sɔsaa tɩŋa payɩ nɛ ɛha nɔɔ nɛ palɩzɩ Pɔɔlɩ nɛ powoni-i pɛ-hɛkʋ taa.

Currently Selected:

Tʋma Labʋ 22: KABI

Highlight

Compare

Copy