1 Pɩyɛ 5
5
Lɛɣtʋ ndʋ́ pʋwɛɛ se Krɩstʋ ŋgbɛyɛ taa sɔsaa ɩwɛna yɔ
1Lɛɛlɛɛyɔ, mɔyɔɔdʋʋnɩ mɩ-taa mbá pɛkɛ Krɩstʋ ŋgbɛyɛ taa sɔsaa yɔ. Ma ɖɔɖɔ mɛnkɛ ɖɩ-taa sɔsɔ. Mananɩ mɛ-ɛsɛ kʋñɔŋ ŋgʋ́ Krɩstʋ tɔwaa yɔ. Ɛsɔ kɔŋ-m haʋ ɖɔɖɔ koboyaɣ ŋgá ɛkɔŋ lɩzʋʋ nɛ ɛwɩlɩ-ɖʋ yɔ. Pʋ-yɔɔ meheyiɣ-mɩ se: 2ɩcɔnɩ Krɩstʋ ñɩma mbá Ɛsɔ ɖʋzɩ mi-nesi taa yɔ pɔ-yɔɔ camɩyɛ ɛzɩ ninɖiɣyu cɔŋʋʋnɩ e-heŋ yɔɔ yɔ. Pɩtaakɛnɩ-mɩ kɩcɛyʋʋ. Ɛlɛ́, ɩcɔnɩ pɔ-yɔɔ camɩyɛ ɛzɩ Ɛsɔ liu wɛʋ yɔ. Ɩtaala ḿbʋ́ kɩhɛyʋʋ yɔɔ, ɛlɛ́, ɩla ḿbʋ́ nɛ mɩ-laŋɩyɛ tɩŋa pilim. 3Ɩtaanuuti mbá Ɛsɔ ɖʋzɩ mi-nesi taa yɔ. Ɛlɛ́, ɩwɩlɩ-wɛ nʋmɔʋ nɛ mɩ-lakasɩ kɩbanzɩ. 4Yee ɩlabɩ ḿbʋ́ yɔ, Điyiyaa Ñʋʋdʋ lakɩ-mɩ koboyaɣ kʋjɔʋ ŋgʋ́ kɩwɛɣ tam yɔ, alɩwaatʋ ndʋ́ ɛlɩzɩɣ ɛ-tɩ nɛ ɛwɩlɩ-mɩ yɔ.
Lɛɣtʋ ndʋ́ pʋwɛɛ se Krɩstʋ ñɩma kpeekpe ɩwɛna yɔ
5Mɩ evebiya lɛ, ɩña Krɩstʋ ŋgbɛyɛ taa sɔsaa. Mɩtɩŋa payɩ itisi mɩ-tɩ ɖama tɛɛ. Mbʋ́ pʋyɔɔ yɔ, pama Ɛsɔtɔm Takayaɣ taa se: «Ɛsɔ ɛɛnaɣ mbá pakpazɩɣ pa-tɩ yɔ nɛ ɛsɩyɛ. Ɛlɛ́, ɛlakɩ mbá paba ñetisiɣ pa-tɩ yɔ lootiye.» 6Pʋ-yɔɔ lɛ, itisi mɩ-tɩ Ɛsɔ ɖoŋ tɩŋa tʋ tɛɛ nɛ ɛkpazɩ-mɩ alɩwaatʋ ndʋ́ ɛɖʋwa yɔ. 7Ɩkpaɣ lɩmaɣza wena atɩŋa payɩ akʋʋ-mɩ yɔ nɛ ɩɖʋzɩ e-nesi taa, mbʋ́ pʋyɔɔ yɔ, ɛnʋ cɔŋnɩnɩ mɩ-yɔɔ.
8Ɩcaɣnɩ mɩ-ɛsɛ! Ɩwɛɛ kpekpeka! Mi-koyindu Satanɩ wɛɛ ɛcɔʋ. Ɛñɩnɩɣ se ɛkpa nɔɔyʋ ɛzɩ ñɔɔsɩ wɩɣʋ tɔɔyʋʋ nɛ kɩmakɩ kubusi nɛ kɩñɩnɩɣ pʋyʋ se kʋtɔɔ yɔ. 9Ɩwɛnɩ lidaʋ Ɛsɔ yɔɔ siŋŋ nɛ ɩkaɖɩnɩ-ɩ. Ɩnawa se paɖʋ mɩ-taabalaa mbá pɛwɛ kedeŋa yɔɔ yɔ patɩŋa payɩ kʋñɔmɩŋ weyi paɖʋ-mɩ yɔ. 10Paa pɩɩwɛɛ se ɩla kʋñɔŋ alɩwaatʋ pazɩ yɔ, Ɛsɔ ɛnʋ ɛ-maɣmaɣ ɛtɛzɩ-mɩ ñɔɔzʋʋ nɛ ɩpɩɩ ɛ-nʋmɔʋ taa nɛ ɩkpa ɖoŋ nɛ nabʋyʋ ɛtaaciɣdi-mɩ kaʋ. Ɛnʋ labɩnɩ-mɩ lootiye siŋŋ. Ɛnʋ ɖɔɖɔ yanɩ-mɩ se ɩsʋʋ e-koboyaɣ ŋgá kaatɛŋ wiɖiyi kaʋ yɔ ka-taa mɩ nɛ Krɩstʋ mɩ-kpɛndʋʋ taa. 11Ɛtɩɣyɩ ɖoŋ tɩŋa payɩ tam! Pɩla ḿbʋ́!
Sɛtʋ
12Silaasɩ kɛ taabalʋ weyi ɛlakɩ mbʋ́ ɛɖʋwa yɔ. Ɛnʋ sɩnɩnɩ-m nɛ mama-mɩ#5.12 Ɛnʋ sɩnɩnɩ-m nɛ mama-mɩ: pʋ-tɔbʋʋ se Silaasɩ maɣaɣnɩ ndʋ Pɩyɛ heyaɣ-ɩ yɔ. takayaɣ cikpelaɣ kanɛ se pɩlabɩ-mɩ hʋnʋm. Mama-mɩ-kɛ ɖɔɖɔ se mawɩlɩ-mɩ ɛzɩma mbʋ́ Ɛsɔ labɩ-mɩ lootiye yɔ. Ɩɖɔkɩ-ɖɩ nesi naalɛ kpam. 13Krɩstʋ ŋgbɛyɛ taa ñɩma mbá Ɛsɔ lɩzɩ Babilooni ɖɔɖɔ ɛzɩ mɩ yɔ nɛ Maarkɩ weyi ɛkɛ man-pɩɣa yɔ, pɛsɛ-mɩ. 14Ɩsɛɛ ɖama ɛzɩ pʋmʋnaʋ yɔ nɛ pɩwɩlɩ se ɩsɔɔlɩ ɖama.
Mbá mɩ mɩtɩŋa payɩ mɩ nɛ Krɩstʋ ɩkpɛndaa yɔ, ɩwɛɛ laŋhɛzɩyɛ taa.
Currently Selected:
1 Pɩyɛ 5: KABI
Highlight
Share
Copy
Want to have your highlights saved across all your devices? Sign up or sign in