1 Pɩyɛ 4
4
Lidaʋ tayaa wezuu kɩfalʋʋ caɣʋ tɔm
1Ɩtɛm naʋ se Krɩstʋ nɩ siziŋ e-tomnaɣ taa. Ɩmaɣzɩ pʋ-yɔɔ nɛ ɩkpa ɖoŋ. Mbʋ́ pʋyɔɔ yɔ, weyi ɛnɩ siziŋ e-tomnaɣ taa yɔ, ɛha kɩwɛɛkɩm siɣ́ye 2se ɛtaatasɩ wezuu caɣʋ ɛzɩ ɛyáa liu wɛʋ yɔ. Ɛlɛ́, ɛcaɣ-kʋ ɛzɩ Ɛsɔ liu wɛʋ yɔ nɛ pʋkɔɔ pɩsɩɩnɩ kɩyakʋ ŋgʋ́ ɛkʋyaa yɔ. 3Đooo lɔŋ, ɩɩkpaɣ alɩwaatʋ siŋŋ nɛ ɩla ɛzɩ mbá paañaŋ Ɛsɔ yɔ palakʋʋ mbʋ́ pe-liu wɛɛ yɔ. Pɩmaɣ ḿbʋ́. Ɩɖɔŋaɣ ɛzaɣ́tʋ nʋmɔʋ taa nɛ ɩɖʋʋ ɛsɛ lɛlaa ñɩm yɔɔ nɛ ɩkpaŋɩɣ sʋlʋm nɛ ɩɖɛlɛsɩɣ niye tɔkɩyɛ nɛ ñɔtʋ pa-taa nɛ mɩ nɛ mɩ-taabalaa ɩñɔʋ nɛ pɩɖɛlɛsɩɣ niye nɛ iluŋuu agɔlɩma tɛɛ. 4Lɛɛlɛɛyɔ, pɩɖɩɣzɩɣ mbá paañaŋ Ɛsɔ yɔ nɛ ɛzɩma mbʋ́ ɩɩtaasɩɣ labʋ ɛzaɣ́tʋ nɛ ɩɖɛlɛsɩɣ niye ɛzɩ ḿbá yɔ. Pʋ-yɔɔ patʋʋ-mɩ. 5Pɔkɔŋ sɩŋʋʋ Ɛsɔ ɛsɩndaa nɛ paa weyi eheyi-i mbʋ́ ɛlaba yɔ. Toovenim lɛ, ɛɖaŋ kpam se ɛhʋʋnɩ sɩɖaa nɛ ɛsɛ tɩnaa patɩŋa payɩ. 6Pʋ-yɔɔ Krɩstʋ susi Laŋhɛzɩyɛ Tɔm sɩɖaa se paa pasɩba ɛzɩ pʋpɔzʋʋ ɛyáa tɩŋa payɩ yɔ yɔ, pɩtɩŋnɩ Fezuu Kiɖeɖeu yɔɔ nɛ pɛwɛɛ wezuu.
Ɛzɩma pʋwɛɛ se Krɩstʋ ñɩma ɩwɛɛ pa-haɖaa taa yɔ
7Pɩtɩŋa payɩ pɩwɩzɩ tɛm. Pʋ-yɔɔ lɛ, ɩɖɔkɩ mɩ-tɩ nɛ ɩcaɣnɩ mɩ-ɛsɛ nɛ ɩpɩzɩ ɩsɛɛ Ɛsɔ. 8Mbʋ́ pʋwɛɛ kpem se ɩla yɔ lɛ se ɩsɔɔlɩ ɖama siŋŋ. Mbʋ́ pʋyɔɔ yɔ, sɔɔlɩm hɛzɩɣ kɩwɛɛkɩm sakɩyɛ. 9Ɩmʋ ɛyáa mbá pɔkɔŋ mɩ-tɛ yɔ camɩyɛ. Ɩtaamʋ-wɛ nɛ miduu. 10Ɛsɔ labɩ paa mɩ-taa weyi kʋjɔʋ nɛ kɩ-ndɩ se ɛla tʋma ndɩ ndɩ. Pʋ-yɔɔ lɛ, pʋwɛɛ se paa weyi ɛkpaɣ-kʋ nɛ ɛlabɩnɩ tʋmɩyɛ camɩyɛ nɛ ɛsɩnɩ lɛlaa. 11Yee Ɛsɔ ɛha nɔɔyʋ se esusi ɛ-tɔm yɔ, ńdʋ́ pʋwɛɛ se esusi. Yee ɛha nɔɔyʋ se ɛsɩnɩ lɛlaa yɔ, pʋwɛɛ se ɛsɩnɩ-wɛ nɛ ɖoŋ weyi Ɛsɔ ha-ɩ yɔ. Ḿbʋ́ yekina nɛ ɛyáa tɩŋnɩ Yesu Krɩstʋ yɔɔ nɛ pasa Ɛsɔ mbʋ́ pɩtɩŋa payɩ ɩlakɩ yɔ pɩ-taa. Ɛnʋ tɩnɩ koboyaɣ nɛ ɖoŋ tam. Pɩla ḿbʋ́!
Ɩtɔɔ kʋñɔŋ mi-lidaʋ yɔɔ ɛzɩ Krɩstʋ yɔ
12Mɛ-ɛgbaɣdɩnaa! Pɩtaaɖɩɣzɩ-mɩ nɛ kʋñɔmɩŋ sɔsɔŋ weyi pamaɣzɩɣnɩ-mɩ se pana yɔ. Ɩtaakɛnɩ-mɩ ɛgɔndʋ pʋyʋ. 13Ɛlɛ́, pʋwɛɛ se mɩ-laŋa ɛhʋlʋmɩ se mɩ nɛ Krɩstʋ ɩtɔkɩnɩ kʋñɔŋ. Mbʋ́ pʋyɔɔ yɔ, ḿbʋ́ yekina nɛ mɩ-laŋa tɛzɩ hʋlʋmʋʋ ɖɔɖɔ siŋŋ puwiye nɖɩ́ ɛlɩzɩɣ e-koboyaɣ nɛ ɛwɩlɩ ɛyáa yɔ. 14Yee patʋʋ-mɩ Krɩstʋ yɔɔ yɔ, ihiɣ mɩ-tɩ! Mbʋ́ pʋyɔɔ yɔ, Fezuu Kiɖeɖeu koboyaɣ ñɩŋgʋ wɛ mɩ-cɔlɔ. 15Mɩ-taa nɔɔyʋ ɛtaatɔɔ kʋñɔŋ se ɛkɛ ɛyáa kʋyʋ yaa mɩ́lʋ́ yaa kɩdɛkɛdɩm laɖʋ yaa weyi ɛɖʋʋ ɛ-nɔɔ lɛlaa tɔm taa yɔ. 16Ɛlɛ́, yee nɔɔyʋ ɛtɔkɩ kʋñɔŋ se ɛkɛ Krɩstʋ tʋ yɔ, fɛyɛ ɛtaakpa-ɩ. Pʋwɛɛ se ɛsa Ɛsɔ se ɛkɛ ḿbʋ́.
17Mbʋ́ pʋyɔɔ yɔ, alɩwaatʋ talaa se Ɛsɔ ɛhʋʋnɩ ɛyáa tɔm. Ɛ-ñɩma ɛpazɩɣna. Yee ɖa ɛpazɩɣna lɛ, ɛbɛ pʋkɔŋ tɛmnaʋ mbá paaɖɔŋ ɛ-Laŋhɛzɩyɛ tɔm yɔɔ yɔ? 18Pʋwɛ ɛzɩ pamaʋ Ɛsɔtɔm Takayaɣ taa se:
«Yee ɛyʋ kʋtʋʋzʋ ɛwɩɣnɩ
ñʋʋ yabʋ hiɣu lɛ,
ɛbɛ pʋkɔŋ tɛmnaʋ kpem
ɛzaɣ́ʋ nɛ
kɩwɛɛkɩm laɖʋ yɔ?»
19Pʋ-yɔɔ lɛ, mbá pɔtɔkɩ kʋñɔŋ ɛzɩ Ɛsɔ liu wɛʋ yɔ, pʋwɛɛ se pakpaɣ pa-tɩ pilim nɛ paɖʋzɩ e-nesi taa nɛ pala camɩyɛ. Mbʋ́ pʋyɔɔ yɔ, ɛnʋ manɩ-wɛ, ɛlakɩ ɖɔɖɔ mbʋ́ ɛɖʋwa yɔ.
Currently Selected:
1 Pɩyɛ 4: KABI
Highlight
Share
Copy
Want to have your highlights saved across all your devices? Sign up or sign in