Jobo 3
3
Jobo mbwaakatongookela Lesa
1Nshiku isho ndishakeenda, Jobo wakaamba akushingana bushiku mbwaakashalwa. 2Wakaamba ayi,
3“Abulobelele bushiku mbondakashalilwaawo.
Aalobelele mashiku ngondakamitilwaamo.
4NobaLesa, amusandule bushiku ubo kuba munshinshe,
mutakabwiibalukiwo tubili
alimwi mutasuminishi mumuni kuba pali mbubo.
5Amubulengeshe kuba bushiku bwa munshinshe ushiya mbi.
Mubufwekeleshe amakumbi alemu.
Ncakwiila akubule mumuni.
6Mashiku ayo akafwekeleshekwe amunshinshe ulemu.
Mutabuleeki ayi bubelengelwe kumwi anshiiku sha mumwaaka,
nabi kubelengelwa kumwi anshiiku sha mumyeenshi.
7Ee, mashiku ayo akukabule mwaana umitwa.
Akukabule kunyumfwikawo liswi lyakusangalala muli ngawo.
8Abo bacishi kushingana, abashingane bushiku ubo,
ee, babushingane abo bacishi kweendelesha shinshimwe.
9Ntanda itakabaliiwo pabushiku ubo,
ncakwiila bushiku ubo butakaciiwo.
10Aashinganwe mashiku alya ceebo cakutankasha kushalwa.
Ee, aashinganwe ceebo cakutankasha kushalwa ayi ntaboni mapensho aya.
11“Anu nshina kufwitanshibo ndindakalinga kushalwa?
Nshina kufwitanshi ndindakalinga kuswa mumala muli bama?
12Ceebonshi bama bakamfukata pamaansaabo?
Ceebonshi bakanjamwisha kunkolo shabo?
13Nendakasansulwa, naakwiinga sunu nshintoopenga.
Ncakwiila naakwiinga ndiletebo tontolo
14pantu pomwi abamaami alimwi abeshikubapandako maano
abo bakaliyakila maanda a bwaami ayo bulya akaba matongo.
15Ee, naakwiinga ndilete abaleli abo bakalinga kucite golodi
alimwi abo bakalinga basusha maandaabo asilifa.
16Ceebonshi nshikwe kubikwa mbuli kafunga,
ee, mbuli kateta utana kubonawo kale lisuba?
17Kushuumbwe bantu babiibi tabapenshi babyaabo
alimwi uko bantu balemenetwe nkobookeshesha.
18Bakaili abalo nkobacana luumuno uko
alimwi nkobatanyumfwi liswi lya shintolongo wabo.
19Bantu bapukite abatashibikitwe boonse nkobabete.
Musha uko ulyaangulukite kumwaami wakwe.#Jele 20:14-18
20“Ceebonshi mumuni wa buumi ulashikila abali mumapensho?
Ceebonshi buumi bulapekwa abaabo bali mubuumba?
21Lufu talushiki kuli baabo balulila,
ee, baluyandoola mbuli buboni bushisitwe.#Ciyu 9:6
22Balasangalala abuumbi
ee, balasangalala na bashika mucuumbwe.
23Ceebonshi buumi bwakapekwa kubaabo bacite nshila ishisitwe,
abo Lesa mbwaakashingulusha lilinga lya mapensho ayi batakoonshi kubona nshila iyo?
24Minsonshi yaba ncecakulya cangu,
akwalo kutongela kwangu takumaani.
25Shintu nsheenoonda shanshikila,
shilya shintilimusha shambonekela.
26Nshookeshiiwo alimwi nshikaliwo muluumuno,
sombibo mapensho akulisukama lyoonse.”
Currently Selected:
Jobo 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.