Matalikilo 40
40
Josefu mbwaakapandulula shiloto sha bakailinyina
1Mukuya kunembo, shikulama waini wa mwaami wa Ijipiti alimwi amunene wa beshikupanga shinkwa wakwe bakabisha kumwaami uyo. 2Bacinenenene bakwe bobilo abo, bakamukalasha abuumbi. 3Aboobo wakabawaala muntolongo muŋanda ya munene wa beshikulindilila kuntolongo, umo mweenka mwakalinga kusungilwa Josefu. 4Bakekala ciindi cilaamfu muntolongo, mpeeke munene wa beshikulindilila wakaambila Josefu ayi anoobatabatila.
5Mashiku amwi kabali muntolongo umo, shikulama waini amunene wa beshikupanga shinkwa boonse bakaba ashiloto isho shakalinga kucite bupandulushi bupusene. 6Josefu ndyaakaya mobakalinga macuunsa, wakabona ayi kuli cabafulunganya. 7Mpomunyaawo wakabeepusha ayi, “Ino mutooboneka buyani kulisukama sunu?” 8Bakakumbula ayi, “Soonse sobilo twaloota, ono taaku kuno weenga wapandulula nsheshaamba shiloto isho.” Josefu wakaamba ayi, “NguLesa upa busongo bwakupandulula shiloto. Amundwiite shiloto shanu.”
9Lyalo shikulama waini uyo wakaamba ayi, “Muciloto cangu, ndabona cisamu ca minyansa kunembo lyangu, 10kacicite misampi yotatwe. Mpomunyaawo ndicasonsabo aalo maluba aswa, mpeeke minyansa yapya. 11Ono ndalinga kucite nkomeshi ya mwaami mumaansa. Aboobo ndabwesa minyansa, ndatyanina munkomeshi akumupa.”
12Josefu wakaamba ayi, “Cilaamba bobulya, misampi yotatwe ninshiku shotatwe. 13Inshiku shotatwe shaakwiinda mwaami ulaakumwaangulula akumulekelela, akumuboosha pamusena wa ncito yanu. Mulaakunoomupa nkomeshi yakwe bweenka mbomwakalinga kucita kataanshi kamucili shikumulamina waini. 14Ono ndaseenga kwaamba ayi mukanjibaluke shintu shaakumweendela kabotu, alimwi ndaseenga kwaamba ayi mukambandikileeko kuli Falawo kwaamba ayi mukancaafwe kuswa muntolongo muno. 15Nebo ndakacita kwiipwa kuswa mucishi ca baEbulu, alimwi akwalo kuno kuIjipiti taaku cilubo ncendakacita ceenga cankalika muntolongo.”
16Munene wa beshikupanga shinkwa ndyaakanyumfwa ayi bupandulushi bwa ciloto ca shikulama waini bwabota, wakaambila Josefu ayi, “Anebo ndaloota. Ndalinga kunyamwite mitaanga yotatwe ya shinkwa pamutwi. 17Mumutaanga walinga peculu, mwalinga mishobo amishobo ya shakulya shakukanga shakwe Falawo, ono bayuni balinga kulyaamo.” 18Josefu wakakumbula ayi, “Cilaamba bobulya, mitaanga yotatwe ninshiku shotatwe. 19Inshiku shotatwe shaakwiinda Falawo ulaakumukusha muno akuya mukumutimbula mutwi! Lyalo mubili wako ulaakuwaanjika pacisamu, mpeeke bayuni bakanooulya.” 20Pakusekelela bushiku bwakushalwa kwakwe kapeendite nshiku shotatwe, Falawo mbwaakapangila bacinenenene ba mubweendeleshi bwakwe. Wakakusha shikulama waini amunene wa beshikupanga shinkwa muntolongo akubeemika kunembo lya bacinenenene abo. 21Lyalo wakaboosha shikulama waini pamulimo wakwe, 22sombi wakatimbula mutwi wa munene wa beshikupanga shinkwa. Cakacitika bweenka bwakaamba Josefu. 23Nacibi boobo shikulama waini uyo taakwe kumwibalukaawo Josefu. Wakamulubililaakobo.
Currently Selected:
Matalikilo 40: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
