Matalikilo 39
39
Josefu amuka Potifa
1Ono bene Ishimaeli bakatola Josefu kuIjipiti akumuulisha kuli Potifa womwi pabacinenenene ba mwaami, munene wa beshikulindilila kuŋanda ya mwaami Falawo. 2Mwaami Lesa wakalinga aJosefu alimwi wakamulengesha kuswitilila. Wakalinga kwikala muŋanda ya mwaami wakwe mwine Ijipiti,#Mili 7:9 3uyo wakabona kwaamba ayi Mwaami Lesa wakalinga anguwe alimwi wakamulengesha ayi abe ashoolwe mushintu shoonse nshaakalinga kucita. 4Potifa wakakondwa amilimo yakwe Josefu, mpeeke wakamwalulabo ayi abe musebenshi wakwe mwiine. Aboobo wakamupa bunene bwa ŋanda yakwe ashintu shakwe shoonse. 5Kuswawaawo, ceebo cakwe Josefu, Mwaami Lesa wakapa coolwe bamuŋanda ya mwine Ijipiti uyo, ashintu nshaakalinga kucite muŋanda yakwe shoonse alimwi amumyuunda. 6Potifa wakabika shoonse mumaansaakwe Josefu alimwi taaku ncaakalinga kubikaako maano kulekabo cakulya ncaakalinga kweelete kulya mwiine.
Josefu wakalinga kwiimfwi kabotu alimwi wakalinga kuboneka kabotu abuumbi kuciwa. 7Nshiku ndishakafulafula, muka mwaami wakwe wakatalika kumukumbwa, mpeeke wakasenga Josefu ayi akumanaakwe. 8Wakakaka akumwaambila ayi, “Amubone mwaami wangu taaku ncaabikako maano mukwiinga ulishi kwaamba ayi mpoondi nebo. Shintu shoonse nshaacite wakashibika mumaansaangu. 9Muŋanda ino ndicite nkusu shiinji anga nsheesho shaacite, alimwi taaku ncaakankashaawo muŋanda ino kulekabo ndimwe. Ono nebo inga ndacita buyani cintu cibiibi ca mushobo uyu pameenso akwe Lesa?” 10Ono nacibi kwaamba ayi muka Potifa wakalinga kunyengelela Josefu bushiku abushiku, taakwe kukumanaakwe.
11Sombi bushiku bumwi Josefu ndyaakenjila muŋanda ayi acite mulimo wakwe, taaku musebenshi wa muŋanda umwi wakalingaamo. 12Lyalo muka Potifa wakacata Josefu kucakufwala ca peculu akwaamba ayi, “Kwesa tukumane.” Sombi wakapusumuka akucicila pansengwe, kushiya cakufwala mulyaansa lyakwe. 13Ono muka Potifa ndyaakabona ayi washiya cakufwala cakwe ca peculu, alimwi wacicila pansengwe, 14wakoolobesha kubasebenshi bamuŋanda akwaamba ayi, “Amubone ici! Uyu muEbulu beebaangu ngobakaleta paŋanda ino utootulamba malwesa. Wanjilila mucipinda cangu ayi ancaate nkumanaakwe, sombi ndooloma mboonkonsha. 15Ndyaanyumfwa ayi ndooloma, wacicila pansengwe akushiya cakufwala cakwe ca peculu pafwaafwi anebo.”
16Cakufwala ca peculu ico wakacisunga kushikila mwaami wakwe Josefu ndyaakesa kuŋanda. 17Mpeeke wakaamba makani eenka ayo ayi, “MuEbulu musha ulya ngomwakaleta pano wakanjilila mucipinda cangu akunamba malwesa. 18Sombi ndakooloma, lyalo wakacicila pansengwe akushiya cakufwala cakwe ca peculu pafwaafwi anebo.”
19Mwaami wakwe Josefu wakakalala abuumbi 20cakwaamba ayi wakaangisha Josefu akumubikisha muntolongo mwakalinga kubikwa bakaili ba mwaami Falawo. Umo wakekala. 21Sombi Mwaami Lesa wakalinga aJosefu alimwi wakamupa coolwe, cakwaamba ayi shintolongo wakakondwa buumi bwakwe.#Mili 7:9 22Shintolongo uyo wakabika bakailinyina mumaansaakwe pantu pomwi ashintu shoonse shakalinga kucitika muntolongo. 23Ncakwiila shintolongo uyo taakalinga kubikaako amaano kushintu isho shakalinga kweendeleshekwa aJosefu mukwiinga Lesa wakalingaakwe. Ncakwiila wakalinga kumulengesha ayi abe ashoolwe mushintu shoonse nshaakalinga kucita.
Currently Selected:
Matalikilo 39: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
