Matalikilo 41
41
Josefu mbwaakapandulula shiloto shakwe Falawo
1Ndipakeenda myaaka yobilo, Falawo mwaami wa Ijipiti wakalota kaaimfwi munshaaMulonga wa Nailo, 2ndyaakabona ŋombe shili shosanwe ashobilo shiinite alimwi shiteshimite shakaswa mumulonga akutalika kulya bwiisu. 3Mpomunyaawo ashimwi shosanwe ashobilo shakaswa. Shalo isho shakalinga kunyangite, makonkobo. Shakesa sheemikana pafwaafwi ashiinite muloombe lwa mulonga. 4Mpeeke shinyangite isho shakalya shiinite. Lyalo Falawo wakabuka. 5Ono wakoona alimwi akulota cimbi. Masanse a shili anga ngamaila acatite alimwi akomete, akalinga kusapukite kucishiko comwi. 6Mpeeke amwi ali osanwe aobilo akasapuka. Ono alo ayo akalinga aniini alimwi anyanite kumuuwo wa muluyanga, 7aalo atakomete akamina akomete. Mwaami wakapapuka akwishiba ayi walinga kulotabo. 8Macuunsa wakalisukama, aboobo wakatuma nkombe kubeshimampelampela abasongo boonse ba muIjipiti ayi bese. Wakabaambila shiloto shakwe, sombi taaku wakakonsha kumupandulwita shiloto isho.#Danye 2:2
9Mpeeke shikulama waini wa mwaami wakamwaambila ayi, “Ndyeelete kulyaambilila sunu ayi ndalubisha. 10Mwakalinga mwakalala pali ndime amunene wa beshikupanga shinkwa, alimwi mwakatubika muntolongo muŋanda ya munene wa beshikulindilila kuntolongo. 11Mpeeke bumwi bushiku soonse sobilo twakalota alimwi shiloto isho shakalinga kucite bupandulushi bupusene. 12Muntolongo umo mwakalinga acikula bwangu muEbulu, musha wa munene wa beshikulindilila uyo ngotwakalingaakwe. Twakamulwiita shiloto shesu, mpeeke wakatupandulwita. 13Shintu shakesa shaba bweenka mbwaakaamba. Nebo mwakamboosha mpondakalinga, sombi munene wa beshikupanga shinkwa mwakamutimbula mutwi.”
14Falawo wakatumaako bantu ayi balete Josefu, mpomunyaawo bakamuleta kuswa kuntolongo. Ndyaakamana kukulula ndesu akufwala shimbi, wakaya mukubonekela kunembo lya mwaami. 15Mpeeke mwaami uyo wakamwaambila ayi, “Ndaloota alimwi taaku ukonsha kupandulula ciloto ico. Ono ndanyumfwa ayi webo ulakonsha kupandulula shiloto.” 16Josefu wakakumbula ayi, “Anebo nshikoonshi nobaami. Sombi Lesa utoopa bupandulushi buyandika.”
17Mpomunyaawo Falawo wakaamba ayi, “Ndakalota kaanyimfwi muloombe lwa Mulonga wa Nailo. 18Ŋombe shili shosanwe ashobilo shiinite alimwi shiteshimite, shaswa mumulonga akutalika kulya bwiisu. 19Lyalo ashimwi shili shosanwe ashobilo shakesa isho shakalinga kunyangite, makonkobo. Ŋombe isho shakalinga kufulukite cakwaamba ayi nshesheesho sheenka nshendakabonaawo kufuluka mushobo uyo muIjipiti. 20Lyalo shinyangite shakamina shiinite, 21sombi taaku weenga wakonsha kwishiba boobo, mukwiinga shalinga kubonekabo mushobo womwi apakataanshi. Mpeeke ndakapapuka. 22Alimwi ndakalota ndabona masanse a witi ali osanwe aobilo acatite alimwi akomete, akalinga kusapukite kucishiko comwi. 23Lyalo amwi ali osanwe aobilo asapuka. Ono alo taakalinga aniini alimwi anyanite kumuuwo wa muluyanga. 24Ono anyanite amina akomete. Beshimampelampela ndabalwiita, sombi taaku wakonsha kumpandulwita.”
25Mpomunyaawo Josefu wakaambila Falawo ayi, “Shiloto shobilo ishi shilaamba cintu comwi. Lesa wamulwiita nceshi akacite. 26Ŋombe shiinite shosanwe ashobilo njimyaaka ili yosanwe ayobilo aalo masanse a witi akomete ali osanwe aobilo njimyaaka yosanwe ayobilo. Shilaamba cintu comwi. 27Ŋombe shinyangite, makonkobo shili shosanwe ashobilo isho shakaswa pesule, amasanse aniininiini anyanite kumuuwo wa muluyanga, shilaamba myaaka yosanwe ayobilo ya nsala. 28Cili bweenka mbondamulwiitawo kale kwaamba ayi Lesa wamutondesha nceshi akacite kunembo. 29Kulaakuba myaaka yosanwe ayobilo ya shakulya shiinji mucishi ca Ijipiti. 30Kuswawaawo kulaakuba myaaka yosanwe ayobilo ya nsala, alimwi amyaaka yoonse ibotu ilaakulubwa mukwiinga nsala ilaakunyonyoola cishi. 31Ciindi cakuba ashakulya shiinji cilaakulubilwabolimwi mukwiinga kulaakuba nsala iyoosha abuumbi. 32Ciloto ncecaboolelaawo nkwaamba ayi Lesa wabamba kale cikani ici alimwi ulaakulengesha ayi cicitike coonoonobo.
33“Ono mulyeelete kusala muntu musongo alimwi ucite lushibo kwaamba ayi abe wacinenenene wiindaawo mucishi cino. 34Mulyeelete kutondeka abamwi bacinenenene beelete kubona ayi comwi ca shipansha shili shosanwe ca shishango cabwesekwa mumyaaka ili yosanwe ayobilo ya shakulya shiinji. 35Mubaambile kwaamba ayi babunganye shakulya shoonse isho mumyaaka ibotu itoosa. Alimwi mubape nkusu shakusunga shili anga ngamaila mumandabala anene akushilama. 36Shakulya shilaakusungwa kwaamba ayi shikasebenseshekwe mumyaaka yosanwe ayobilo ya nsala iyo ishi ikabeeko muIjipiti. Munshila iyi bantu teshi bakafwe kunsala.”
Josefu mbwaakasalwa kuba mweendeleshi wa Ijipiti
37Falawo abacinenenene bakwe bakasuminisha muyeeyo uyo. 38Mpeeke Falawo wakabaambila ayi, “Teshi tukacaneewo musankwa uli mbuli Josefu, uyo ucite Mushimu wakwe Lesa muli nguwe.” 39Mpomunyaawo wakaambila Josefu ayi, “Lesa wakutondesha shoonse ishi, aboobo teshi acakutonsha kwaamba ayi webo ulicite busongo alushibo kwiinda bantu bamwi boonse. 40Ntookupa bweendeleshi bwa cishi cangu alimwi bantu boonse bananoonyumfwila nsheenga waamba. Nebo ndanookwiindaawobo ceebo ca cuuna ca bwaami nceendiiwo.#Mili 7:10 41Aboobo bulya ndakubika ayi ube mweendeleshi wa cishi coonse ca Ijipiti.” 42Mwaami wakafuula ninga yakalinga kucite keshibilo ka bwaami akufwalika Josefu kumunwe. Wakamufwalika cakufwala ca peculu cibotu alimwi akancetani kaniini ka golodi munshingo.#Danye 5:29 43Wakamupa acikoci ca maaki cabili mubwaami kwaamba ayi anokweendelaamo. Mpeeke basankwa bakaya kunembo akoolobesha ayi, “Amushiye nshila! Amushiye nshila!” Munshila iyo Josefu mbwaakabikwa kuba mweendeleshi wa cishi ca Ijipiti. 44Falawo wakaambila Josefu ayi, “Ndime mwaami wa cishi ca Ijipiti, alimwi taaku weelete kunyamuna lyaansa nabi mweendo kootana kusuminisha webo.” 45Falawo wakapa Josefu liina lya bwine Ijipiti ayi Safenati Paneya akumupa Asenati mwanaakwe Potifela, mupailishi wa kuEliopolisi, ayi eebe. Lyalo Josefu wakatalika kweenda mucishi coonse ca Ijipiti.
46Josefu wakalinga kucite myaaka ili 30 ndyaakatalika kusebensela Falawo mwaami wa Ijipiti. Mpeeke Josefu wakaswa mulubansa lwakwe Falawo akweenda mucishi coonse ca Ijipiti. 47Mumyaaka ili yosanwe ayobilo ya shakulya shiinji, myuunda yakalinga kusanyaako. 48Isho shoonse Josefu wakashibunganya akushisunga mumandabala anene. Mundabala yomwi ayomwi inene wakasungishaamo shakulya shakaswa mumyuunda iyo yakalinga kushingulukite ndabala iyo. 49Ono kwakaba shili anga ngamaila shiinji cakwaamba ayi Josefu wakacileka akupima. Wakalingabo anga ngumuseese wa kulweenge.
50Nsala kaitana kwisa, Josefu wakaba abaana basankwa bobilo muli Asenati. 51Mpeeke wakaamba ayi, “Lesa wanengesha kuluba mapensho angu alimwi abamuŋanda ya bata.” Aboobo mwanaakwe wakwiiya wakamutumba ayi Manase. 52Lyalo alimwi wakaamba ayi, “Lesa wampa baana mucishi ca mapensho.” Aboobo mwanaakwe wabili wakamutumba ayi Efuleemu.
53Myaaka yosanwe ayobilo ya shakulya shiinji muIjipiti yakeenda. 54Lyalo myaaka yosanwe ayobilo ya nsala yakatalika, bweenka bwakaamba Josefu. Nsala iyo yakaba amushishi shimwi shoonse, sombi moonse muIjipiti mwakalinga shakulya.#Mili 7:11 55Bene Ijipiti ndibakatalika kufwa nsala bakalilila Falawo ayi abape shakulya. Aboobo wakabaambila ayi baye kuli Josefu akucita nceenga wabalwiita.#Joni 2:5 56Nsala yakakomena akuba kubantu boonse muIjipiti, aboobo Josefu wakacalula matala oonse mumandabala anene akutalika kuulisha shakulya kubene Ijipiti. 57Bantu bakesa kuIjipiti kuswa mucishi ca panshi coonse kwisa mukuula witi kuli Josefu, mukwiinga nsala yakakalala koonse koonse.
Currently Selected:
Matalikilo 41: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
