Kulonga 5
5
Mose aAloni kunembo lyakwe Falawo
1Kuswawaawo Mose aAloni bakaya kuli Falawo mwaami wa kuIjipiti akumulwiita ayi, “Mwaami Lesa, Lesa wa bene Isilaeli waamba ayi, ‘Amubaleeke bantu bangu baye kwaamba ayi bakansekelele akundemeka muluyanga.’ ”
2Lyalo Falawo wakabeepusha ayi, “Ino Mwaami Lesa uyo ngweshi nyumfwile akuleka bene Isilaeli ayi banooya ngani? Mwaami Lesa uyo nshimwishiiwo, alimwi bene Isilaeli teshi mbalekeewo.” 3Mpeeke Mose aAloni bakakumbula ayi, “Lesa wa bene Ebulu waliyubulula kuli ndiswe. Anu amutusuminishe ayi tweende nshiku shotatwe muluyanga ayi tukabenge milambu kuMwaami Lesa, Lesa wesu uyo. Na tubule kucita boobo, utootucaya kumalwashi nabi munkondo.” 4Sombi mwaami wakaambila Mose aAloni ayi, “Nciinshi ncemutooyeeya pakulengesha bantu ayi bacileeke ncito njebatoocita? Amuboole muye musebense! 5Alimwi mwebo nobene Isilaeli mwafula abuumbi kwiinda bene Ijipiti. Ono mutooyanda kucileka akusebensa!”
6Pabushiku mbomunya ubo, mwaami uyo wakaambila bene Ijipiti abo beshikusebensesha basha alimwi abene Isilaeli beshikubona basebenshinyinaabo ayi, 7“Mucileeke kupa bantu bwiisu bwakuumisha ncelwa ayi shiyume. Mubaleeke ayi banoolilangweeta beene. 8Sombi mulyeelete kubona kwaamba ayi batokuuma mweelo wa ncelwa weenka wa lyoonse, tabeelete kuceeshaako. Aba bantu mbatolo, nceceeco ncebatoonsengela lyoonse ayi mbaleeke baye bakabenge milambu kuli Lesa wabo! 9Mwiindilishewo kusebensesha basankwa aba kwaamba ayi babule ciindi cakunookutika makani abubeshi.”
10Mpomunyaawo bene Ijipiti beshikusebensesha basha alimwi abene Isilaeli beshikubona bashanyinaabo bakaya mukubalwiita ayi, “Mwaami Falawo waamba ayi teshi anoomupawo bwiisu. 11Waamba ayi mulyeelete kulilangweeta nobeene kuli koonse nkweenga mwabucana, sombi mulyeelete kuuma mweelo wa ncelwa weenka wa lyoonse.” 12Aboobo bantu bakapalanganinamobo muIjipiti kuya ciyandoola bwiisu. 13Lyalo bene Ijipiti beshikubasebensesha bakalinga kucitekobo kubakakatisha kuuma mweelo wa ncelwa weenka wa lyoonse ndibakalinga kupekwa bwiisu. 14Bene Ijipiti beshikusebensesha basha bakalinga kuuma bene Isilaeli mbobakasala beene ayi banoobona bashanyinaabo mbobatoosebensa. Bakalinga kubeepusha ayi, “Ceebonshi tamutokuuma mweelo wa ncelwa weenka wa lyoonse, ciilo nabi sunu?”
15Mpomunyaawo bene Isilaeli beshikubona bashanyinaabo bakaya kumwaami mukutongooka. Bakaamba ayi, “Nkambo, nciinshi ncemwatucitila bobulya sobasebenshi banu? 16Tamutootupa bwiisu, sombi mucitulwiita ayi, ‘Muume ncelwa!’ Ono bulya swebo tutokuumwa, sombi mbantu banu batoolubya.” 17Mwaami Falawo wakabakumbula ayi, “Tamusunibo kusebensa, muli batolo! Nceceeco ncemutoonsengela abwaca ayi muleeke muye mukubenga milambu kuMwaami Lesa. 18Ono amuboolele mukusebensa! Teshi mukapekwewo bwiisu, sombi mulyeelete kunokuuma mweelo wa ncelwa weenka wa lyoonse.” 19Bene Isilaeli beshikubona bashanyinaabo ndibakalwiitwa ayi balyeelete kunokuuma mweelo wa ncelwa weenka wa lyoonse, bakeshiba ayi bali mumapensho.
20Ndibakaswa kuli Falawo, bakacana Mose aAloni kababalindila. 21Lyalo bantu aba bakaambila Mose aAloni ayi, “Mwaami Lesa wabona shoonse nshemwacita. Aboobo utoomupa mulandu ceebo mwalengesha ayi mwaami Falawo alimwi abacinenenene bakwe batupaate. Mwalengesha ayi bacane nshila yakutucailaawo.”
Mose mbwaakatongooka kuli Lesa
22Lyalo Mose wakapilukila kuli Lesa akwaamba ayi, “Nkambo, ino mutoopensheshanshi bantu banu? Mwakantuminanshi kokuno? 23Kuswabo ndindakaya kumwaami Falawo mukwaamba makani anu, utoobapensha abuumbi. Sombi mwebo tamukwe kubacafwaawo napaceyi!”
Currently Selected:
Kulonga 5: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
