Kulonga 6
6
1Mpomunyaawo Mwaami Lesa wakaambila Mose ayi, “Ono utoobona nceshi ncite kumwaami Falawo. Ntoomukakatisha ayi aleke bantu bangu banooya. Ntoomukakatisha ayi abatande mucishi cakwe.”
Mose mbwaakayuminishikwa alimwi
2Lesa wakaambila Mose alimwi ayi, “Nebo ndime Mwaami Lesa. 3Ndakaboneka kuli Abulaamu, Isaki alimwi aJakobo ayi ndime Lesa Shinkusu shoonse. Sombi nshikwe kuliyubulula kuli mbabo ayi banshiibe liina lyakwaamba ayi Mwaami Lesa.#Mata 17:1; 28:3; 35:11; Kulo 3:13-15 4Alimwi ndakapanganaabo ayi ndaakubapa cishi ca Kenani, umo mobakalinga kwikala anga mbaswamashi. 5Ono matongooshi a bene Isilaeli abo bali mubusha kubene Ijipiti ndaanyumfwa. Aboobo ntooyanda kucita kweelana acipangano cangu. 6Paceebo ceeci lwiita bene Isilaeli ayi, ‘Nebo ndime Mwaami Lesa, alimwi ndaakumufuna akumwaangulula mubusha mbomubeteemo kubene Ijipiti. Ndaakutambika lyaansa lyangu lya nkusu pali mbabo mukubapa mulandu unene abuumbi. Mwebo ndaakumupulusha. 7Mpeeke mulaakuba bantu bangu, anebo ndaakuba Lesa wanu. Lyalo mulaakwishiba ayi ndime Mwaami Lesa, Lesa wanu na nkamwaangulule mubusha ubo mbomubeteemo mucishi ca Ijipiti. 8Ndaakumutola kucishi ico ncendakashomesha cakulumbila kupa Abulaamu, Isaki alimwi aJakobo. Ono ndaakupa ndimwe kwaamba ayi cikabe cinenu cancinencine. Nebo ndime Mwaami Lesa.’ ” 9Mose wakalwiita bene Isilaeli makani aya, sombi tabakwe kumunyumfwila, ceebo bakalinga kuungumene mumyoyo mukwiinga wa milimo iyumu ya busha njebakalinga kusebensa.
10Lyalo Mwaami Lesa wakaambila Mose ayi, 11“Koya ukalwiite Falawo mwaami wa kuIjipiti ayi aleke bene Isilaeli basweemo mucishi cakwe.” 12Sombi Mose wakakumbula ayi, “Ono na bene Isilaeli tabakwe kunyumfwila, ino lakwe mwaami Falawo inga wanyumfwila buyani? Nebo ndi muntu utaambi kabotu.”
13Lyalo Mwaami Lesa wakaambila Mose aAloni ayi, “Kamuya mukalwiite bene Isilaeli alimwi amwaami Falawo ayi nebo ndamulwiita ayi mukakushe bene Isilaeli mucishi ca Ijipiti.”
Bamashali bakulukulu bakwe Mose alimwi aAloni
14Lubeni mwanaakwe Jakobo wakwiiya wakalinga kucite baana basankwa bone. Meenaabo ngaaya. Anoki, Palu, Esiloni alimwi aKami. Aba mbobakalinga bamashali bakulukulu ba mikowa yoonse iitwa meenaabo. 15Simyoni wakalinga kucite baana bosanwe awomwi. Meenaabo ngaaya. Jemuwelo, Jamini, Oadi, Jakini, Sowa alimwi aShaulo mwaana musankwa wa mwanakashi mwine Kenani. Aba mbobakalinga bamashali bakulukulu ba mikowa yoonse iitwa meenaabo. 16Alakwe Lefi wakalinga kucite baana basankwa botatwe. Meenaabo ngaaya. Geshoni, Koati alimwi aMelali. Aba mbobakalinga bamashali bakulukulu ba mikowa iitwa meenaabo. Lefi wakafwa kaacite myaaka ili 137. 17Geshoni wakalinga kucite baana basankwa bobilo, abo bakalinga kwiitwa ayi Libini alimwi aShimeyi. Abalo aba bakaba abamulunyungu babo baanji. 18Koati wakalinga kucite baana basankwa bone abo bakalinga kwiitwa ayi Amulamu, Isa, Ebuloni alimwi a Usiyelo. Koati wakafwa kaacita myaaka ili 133. 19Melali alakwe wakalinga kucite baana basankwa bobilo. Meenaabo ngaaya. Maali alimwi aMushi. Aba mbobamushipani shakwe Lefi alimwi abamulunyungu babo.#Shakube 3:17-20; 26:57-58; 1 Maka 6:16-19
20Ono Amulamu wakeeba Jokebedi ishinkashi, umo mwaakashalila Aloni alimwi aMose. Amulamu wakafwa kaacite myaaka ili 137. 21Isa wakalinga kucite baana basankwa botatwe, abo bakalinga kwiitwa ayi Kola, Nefegi alimwi aSikili. 22Alakwe Usiyelo wakalinga Kucite baana basankwa botatwe. Meenaabo ngaaya. Mishaelo, Elisafani alimwi aSitili.
23Aloni wakeeba mwanaakwe Aminadabu, Elisheba uyo wakalinga nankashi yakwe Naashoni. Wakashalilamo Nadabu, Abiyu, Eliyasa alimwi aItama. 24Kola lakwe wakalinga kucite baana basankwa botatwe abo bakalinga kwiitwa ayi Ase, Elikana alimwi aAbiyasafu. Aba bakalinga bamashali bakulukulu ba shipani shakwe Kola. 25Eliyasa mwanaakwe Aloni, womwi wa bana bakwe Putiyelo banakashi, uyo ngwaakashalilaamo Fineyasi. Aba mbobakalinga bamanene ba bamumaanda a bene Lefi kweelana ashipani shabo.
26Aloni alimwi aMose mbobaabo Mwaami Lesa mbwaakaambila ayi, “Amutanjilile mikowa ya bene Isilaeli kuswa muIjipiti.” 27Basankwa abo mbobakaambila Falawo mwaami wa mucishi ca Ijipiti ayi asuminishe bene Isilaeli kuswa mucishi cakwe.
Mwaami Lesa mbwaakalasha Mose aAloni
28Mwaami Lesa ndyaakalinga kwaamba aMose mucishi ca Ijipiti, 29wakaamba ayi, “Nebo ndime Mwaami Lesa. Ulwiite mwaami wa bene Ijipiti shoonse nsheshi nkulwiite.” 30Sombi Mose wakakumbula ayi, “Mulishi kwaamba ayi nebo nshaambi kabotu, ino mwaami inga wanyumfwila buyani?”
Currently Selected:
Kulonga 6: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
