Kulonga 4
4
Lesa mbwaakapa Mose nkusu shikankamika
1Lyalo Mose wakakumbula Mwaami Lesa ayi, “Ndaakucita buyani na bene Isilaeli bakabule kunshoma akunyumfwila, alimwi na bakaambe ayi tamukwe kuboneka kuli ndime?” 2Lakwe Mwaami Lesa wakamwiipusha ayi, “Nciinshi ico ncoocite mulyaansa?” Mose wakakumbula ayi, “Ninkoli.” 3Mwaami Lesa wakaamba ayi, “Iwaale panshi.” Ono Mose ndyaakeewaala panshi, yakaaluka nsoka. Mpeeke wakaloonda akucicako lubilo. 4Mpomunyaawo Mwaami Lesa wakaambila Mose ayi, “Kotama wiibwesele kuluminso.” Alakwe Mose wakakotama akwiicata, lyalo mulyaansa lyakwe yakaaluka nkoli alimwi. 5Mwaami Lesa wakaamba ayi, “Anu ukacite bobulya kubene Isilaeli kwaamba ayi bakashome ayi Mwaami Lesa, Lesa wa bamashali babo bakulukulu, Lesa wakwe Abulaamu, Isaki alimwi aJakobo, wakaboneka kuli ndiwe.”
6Mwaami Lesa wakaambila Mose alimwi ayi, “Bika lyaansa lyako mucakufwala.” Mose wakacita kweelana ambwaakaambilwa. Ono ndyaakalikushaamo, kucana lyaansa lyaboolabo tuu, kushiloonda shamanata. 7Lyalo Mwaami Lesa wakaamba ayi, “Boosha lyaansa mucakufwala alimwi.” Alakwe wakacita bweenkoobo, pakulikushaamo lyakababo kabotu bweenka mbuli mubili wakwe woonse. 8Mpeeke mwaami Lesa wakaamba ayi, “Na bakabule kukushoma nabi kusumina kwiinda mucaankamiko cakutaanguna, nkokwaamba ayi balaakusumina kwiinda muli ceeci cabili. 9Ono na bakabule kukushoma waakumana kucita shaankamiko shobilo ishi, akukaka kukunyumfwila, ukatekule maanshi muMulonga wa Nailo akwaatila panshi. Maanshi ayo, alaakwaaluka bulowa.”
10Sombi Mose wakaamba ayi, “NoBaami baLesa nebo kuswabo kalekale nshaambiwo kabotu, alimwi ampomwatalikila kwaamba anebo, poonse nshintokwaambawo kabotu. Ndacelwa kuposha shikani alimwi ndicite kamaama.” 11Lyalo Mwaami Lesa wakamwaambila ayi, “Ino ngani upa muntu mulomo? Ngani ulengesha ayi ashinke matwi nabi kuba cibuulu? Alimwi ngani ulengesha ayi anoobona nabi ayi abe moofu? Sa teshi ndime neMwaami Lesa? 12Anu webo, koya bulya bweenka! Ndaakukucafwaako kwaamba alimwi ndaakukulwiita ashakwaamba.” 13Sombi lakwe Mose wakakumbula ayi, “Sobwe noBaami baLesa, ndakombelela amutume umwi.”
14Lyalo Mwaami Lesa wakakalalila Mose, akumwaambila ayi, “Ino mbuyani mukwanu Aloni mwine Lefi? Ndishi kwaamba ayi lakwe inga waamba kabotu. Cino ciindi uli munshila ayi ese abonane awebo alimwi utoosangalala abuumbi pakukubona. 15Inga wabandikaakwe akumulwiita shakwaamba. Noonse nobilo ndaakumucafwaako kwaamba alimwi ndaakumulwiita shakucita. 16Lakwe ngweshi ukanokwaambilaako kubantu. Ono webo ulaakuba anga nguLesa ceebo ulaakunoomulwiita shakwaamba. 17Nyamuna nkoli iyi uyaayo mukwiinga njeshi ukanoocitishako shaankamiko.”
Mose mbwaakaboolela kucishi ca Ijipiti
18Kuswawaawo Mose wakaboola kuli Jetulo mupongoshi wakwe musankwa, akumwaambila ayi, “Ndamukombelela ayi munsuminishe kuboolela kucishi ca Ijipiti mukubona bamakwesu na bacili boomi.” Jetulo wakasumina, akumulasha ayi eendebo kabotu. 19Mose ndyaakalinga kucili mucishi ca Midyani, Mwaami Lesa wakamwaambila ayi, “Boolela kucishi ca Ijipiti mukwiinga boonse abo bakalinga kusuni kukucaya bakamana kufwa.” 20Mpeeke Mose wakanyamuna bakaakwe alimwi abana bakwe basankwa akubatantika pambongolo. Mpeeke wakanyamuka akuboolela kuIjipiti. Wakanyamuna ankooli iyo Lesa njaakamwaambila ayi atolelele.
21Mwaami Lesa wakaambila Mose alimwi ayi, “Ono bulya mbootoboolela kuIjipiti, ulyeelete kucita pameenso a mwaami Falawo shaankamiko shoonse nshendakakubonesha. Sombi ndaakulengesha mwaami kuba shicimpamya akukaka kusuminisha bantu ayi baye. 22Anu webo ulyeelete kumulwiita ayi nebo neMwaami Lesa ndaamba ayi, ‘Isilaeli ngomwanaangu musankwa wakwiiya. 23Ndakakulwiita ayi uleke mwanaangu musankwa aye kwaamba ayi akanambile, sombi webo wakakaka. Ono bulya ntoocaya mwanaako musankwa wakwiiya.’ ”#Kulo 12:29
24Ndibakalinga kookesha pamusena umwi pakunooya kuIjipiti, Mwaami Lesa wakakumana aMose akuyanda kumucaya. 25Sombi Sipola mukaakwe, wakabwesa libwe likolete akupalula mwanaakwe, alimwi akucatisha Mose kumyeendo acikanda ico akwaamba ayi, “Uli ibaangu ceebo ca bulowa.” 26Wakaamba boobo ceebo cakupalulwa, mpeeke alakwe Mwaami Lesa wakapulusha Mose.
27Paciindi ici, Mwaami Lesa wakalinga waambila Aloni ayi, “Koya muluyanga ucinshe Mose.” Mpeeke wakaya mukumukumanishisha pakalundu kasalalite. Ndyaakamukumanya, wakamufyonta mukumwaansha. 28Lyalo Mose wakalwiita Aloni shoonse Mwaami Lesa nshaakamutuma ayi aambe alimwi ashaankamiko shoonse nshaakamulasha ayi akacite. 29Lyalo Mose aAloni bakaya kuIjipiti akubunganya bamatanjilili boonse ba bene Isilaeli. 30Aloni wakabalwiita shoonse Mwaami Lesa nshaakaambila Mose, alakwe Mose wakacita shaankamiko shoonse pameenso a bantu boonse. 31Mpomunyaawo bakashoma. Ono ndibakanyumfwa ayi Mwaami Lesa wakesa akubona mbuli mbobakalinga kupenshekwa bunene, bakafukama akumulambila.
Currently Selected:
Kulonga 4: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
