Kulonga 3
3
Lesa mbwaakeeta Mose
1Bumwi bushiku, Mose wakalinga kweembela mbelele ampongo sha mupongoshi wakwe musankwa wiitwa ayi Jetulo, uyo wakalinga mupailishi wa kuMidyani. Mpeeke wakalansha litanga lya mbelele alimwi ampongo muluyanga tibili washika kuKalundu kasalalite kakwe Lesa ka Olebu. 2Nkomunya uko, munjelo wa Mwaami Lesa wakaboneka kuli nguwe anga ngumulilo mucikupu. Mose wakacibona kacinyaka, sombi tecakalinga kupya. 3Mose wakayeeya ayi, “Ici tacina kubonekaawo! Ino cikupu tacitoopitanshi? Ntoosena pafwaafwi mboneshe.”
4Ono Mwaami Lesa ndyaakabona ayi Mose utoosa cisena, wakamwiita pakati ka cikupu akwaamba ayi, “Mose! Mose!” Alakwe Mose wakakumbula ayi, “Nkambo.”
5Lesa wakamwaambila ayi, “Imikana peenkaapo. Fuula nkwabilo shako mukwiinga pamusena apo mpooimfwi palisalalite.#Mili 7:30-34 6Nebo ndime Lesa wa bamashali bako bakulukulu. Ndime Lesa wakwe Abulaamu, Isaki alimwi aJakobo.” Mpeeke Mose wakalifweka pameenso ceebo wakaloonda kulangilisha Lesa.
7Lyalo Mwaami Lesa wakaamba ayi, “Ncakwiila ndaboona mbuli bantu bangu mbobatoopenshekwa mucishi ca Ijipiti. Ndanyuumfwa kulila kwabo ceebo ca beshikubasebensesha. Kupenshekwa kwabo koonse ndikubwene. 8Aboobo ndesa mukubafuna mumaansa a bene Ijipiti akubakusha mucishi ca Ijipiti, kubatola mucishi cibotu cinene. Mucishi ico muli bubile abulongo bubotu, umo mwikala bene Kenani, bene Iti, bene Amoli, bene Pelisi alimwi abene Jebusi. 9Ncakwiila kulila kwa bantu bangu ndakunyumfwa, alimwi ndaboona abene Ijipiti mbobatoobapensha. 10Ono ntookutuma kumwaami Falawo wa kuIjipiti kwaamba ayi ukatanjilile bantu bangu kuswa mucishi cakwe.”
11Sombi Mose wakaambila Lesa ayi, “Nebo taaku mboombete. Ino inga ndaya buyani kumwaami alimwi akukusha bene Isilaeli mucishi cakwe ca Ijipiti?” 12Mpeeke Lesa wakamukumbula ayi, “Nebo ndaakunooli awebo, alimwi andyeshi ukanoobakusha mucishi ca Ijipiti, mulaakunambilila pakalundu aka. Ici cilaakuba cishibilo cakwaamba ayi ndime ndakutuma.”
13Sombi Mose wakaambila Lesa ayi, “Ono na nkaye kubene Isilaeli akubaambila ayi, ‘Lesa wa bamashali banu bakulukulu wantuma kuli ndimwe,’ balo balaakunjipusha ayi, ‘Ino liina lyakwe ngani?’ Ono ndaakubalwiita ayinshi?”#Kulo 6:2-3 14Mpomunyaawo Lesa wakaamba ayi, “NDIME WOOYO NGOOMBETE. Anu ulyeelete kubalwiita ayi, ‘Uyo wiitwa ayi NDIME wantuma kuli ndimwe.’#Ciyu 1:4, 8 15Ubalwiite bene Isilaeli ayi nebo neMwaami Lesa, neLesa wa bamashali babo bakulukulu, neLesa wakwe Abulaamu, Isaki, alimwi aJakobo, ndakutuma kuli mbabo. Ili ndyeliina lyangu lyoonsebo. Mashalane oonse akunembo mbweshi akanoonjita ubo. 16Koya ubunganye bamatanjilili ba bene Isilaeli boonse akubalwiita ayi nebo neMwaami Lesa, Lesa wa bamashali banu bakulukulu, neLesa wakwe Abulaamu, Isaki alimwi aJakobo ndakaboneka kuli ndiwe. Ubalwiite alimwi ayi ndesa akubona bene Ijipiti ncebatoocita kuli mbabo. 17Ndayeeya kwaamba ayi nkabakushe muIjipiti, umo mobatoopenshekwa abuumbi, alimwi akubatola kucishi kuli bubile abulongo bubotu. Mucishi umo momuli bene Kenani, bene Iti, bene Amoli, bene Pelisi, bene Ifi alimwi abene Jebusi.
18“Ono balaakukunyumfwila. Kuswawaawo ulyeelete kuya abamatanjilili ba bene Isilaeli kumwaami wa mucishi ca Ijipiti akumwaambila ayi, ‘Mwaami Lesa, Lesa wa bene Ebulu waliyubulula kuli ndiswe. Ono bulya tutoomusenga ayi mutusuminishe kweenda nshiku shotatwe muluyanga kwaamba ayi tukabenge kuMwaami Lesa, Lesa wesu milambu.’ 19Ndishi kwaamba ayi mwaami wa mucishi ca Ijipiti teshi akamusuminisheewo na nkabule kumukakatisha. 20Sombi ndaakusebensesha nkusu shangu, alimwi ndaakupa mulandu bene Ijipiti kwiinda mukucita shintu shiloondesha mucishi cabo. Kuswawaawo mwaami ulaakumusuminisha ayi muye.
21“Ndaakulengesha ayi bene Ijipiti bakalemeke bantu bangu kwaamba ayi baakulonga, batakaswimo maansabo. 22Woonse mwanakashi mwine Isilaeli ulaakuya kumwanakashi shikamukobonyina mwine Ijipiti alimwi kumwanakashi mwine Ijipiti ukala muŋanda yakwe, akusenga shintu sha silifa asha golodi, alimwi ashakufwala. Mpeeke bene Isilaeli balaakufwalika bana babo basankwa alimwi abanakashi. Aboobo balaakutola bubile bwa bene Ijipiti.”#Kulo 12:35-36
Currently Selected:
Kulonga 3: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
