Kulonga 39
39
Mbobakatunga shakufwala sha bapailishi
(Kulo 28:1-14)
1Ono kuswa kubooya bwa mbelele buboneka anga ndiculu, bufubelafubela alimwi abusalalabo pyu, bakatunga shakufwala shibotu abuumbi kwaamba ayi bapailishi bakanoofwala pakusebensa muMusena Usalalite. Shakufwala shabupailishi isho bakatungila Aloni kweelana aMwaami Lesa mbwaakaambila Mose.
2Bakatunga efodi kuswa kubooya bwa mbelele buboneka anga ndiculu, bufubelafubela abusalalabo pyu, busalu bwa golodi, alimwi ansaalu ibotu iteshimite. 3Mpeeke bakapampamika golodi akutimboola tuniininiini kwaamba ayi bakabike munsalu ibotu iteshimite alimwi amubooya bwa mbelele buboneka anga ndiculu, bufubelafubela alimwi abusalalabo pyu. 4Bakabika amwakupusha ntambo mobilo pashifushi kuefodi mumbasu shoonse shobilo kwaamba ayi kacaangwa. 5Bakabikaako alaamba wakatungwa kabotu wa shisani nshemunya isho kwaamba ayi shikanoonungenebo kweelana aMwaami Lesa mbwaakaambila Mose. 6Bakabwesa mabwe eetwa ayi onikisi akwaabika mushakubikaamo sha golodi. Bakalembawo kabotu meena a bana bakwe Jakobo basankwa bali likumi abobilo. 7Kuswawaawo bakaabika pamwakupusha ntambo pashifushi mwa efodi kwaamba ayi anokwiimikanina mikowa ya bene Isilaeli ili likumi ayobilo, kweelana aMwaami Lesa mbwaakaambila Mose.
Mbobakatunga shakufwala sha pacaamba
(Kulo 28:15-30)
8Ono bakatunga cakufwala pacaamba kushintu sheenka shili mbuli sha efodi alimwi ashakubotesha shikoshenye. 9Cakufwala ici cakalinga kunokweelenebo mumbasu shoonse alimwi cipetetwe lyobilo, mumbasu shoonse cakaba masentimita ali 22. 10Pali ncico, bakabikaawo mindando ya mabwe amakwebo yone. Mumundando wakutaanguna bakabikaamo mabwe eetwa ayi lubi, topasi alimwi agaaneti. 11Mumundando wabili mwakaya mabwe eetwa ayi emalodi, safaya alimwi dayimondi. 12Mumundando watatu bakabikaamo mabwe eetwa ayi tekoisi, ageti alimwi aamefisiti 13Mumundando wane mwakaya mabwe eetwa ayi belilu, kanelyani alimwi ajasipa. Mabwe amakwebo aya akabikwa mushakubikaamo sha golodi. 14Palibwe lyomwi alyomwi lya mabwe ayo ali likumi aobilo, pakalembwa liina lyomwi lya mwanaakwe Jakobo musankwa, kwaamba ayi eemikanine mikowa ya bene Isilaeli. 15Ono pacakufwala pacaamba, bakapangilaawo ncetani sha golodi wiine wiine shakupyata anga njimyaando. 16Bakapanga shakukobekaamo sha golodi shobilo, akwaacatanya peculu lya makonko a cakufwala ca pacaamba, 17alimwi akwaanga ncetani shobilo isho mushakukobekaamo shobilo isho. 18Akwalo kweela ncetani shobilo shimwi isho, bakaangaako shakukobekaamo shobilo sha paefodi ayi bacatanye amwakupusha pashifushi kumeenso a efodi. 19Kuswawaawo bakapanga shakukobekaamo sha golodi shobilo akushicatanya kumakonko a panshi lya cakufwala pacaamba, ono mukati ka mupeto pafwaafwi aefodi. 20Mpeeke bakapanga shakukobekaamo ashimwi shobilo sha golodi akushicatanya panshi lya mwakupusha mobilo pashifushi kumeenso a efodi, pafwaafwi a mupeto alimwi peculu lya laamba ngobakatunga kabotu. 21Kweelana aMwaami Lesa mbwaakaambila Mose, bakaanga mushakukobekaamo a cakufwala pacaamba kushakukobekaamo sha efodi akasani kaboneka anga ndiculu kwaamba ayi cakufwala pacaamba cinookala peculu lya laamba cakubula kusensuluka.
Mbobakatunga shakufwala shimwi shabapailishi
(Kulo 28:31-43)
22Anu mungaanjo wakufwala mukati lya efodi bakautunga abooya bwa mbelele buboneka anga ndiculu. 23Wakaba abulyango bwakwinjishamo mutwi, ubo bwakatungwa akamupeto kakukasha kukwaamuka. 24Alimwi bakatungilaako shili anga nshisepo shiitwa ayi pomegilaneti a booya bwa mbelele buboneka anga ndiculu, bufubelafubela alimwi abusalalabo pyu ansaalu shibotu shiteshimite kumupeto wa panshi wa mungaanjo. 25Kuswawaawo bakapanga tumilangu twa golodi wiine wiine akutubika kumupeto pakati lya mapomegilaneti. 26Tumilangu twa golodi uto alimwi apomegilaneti, twakabambana apa kamulangu panembo pomegilaneti, kushinguluka mupeto wa mungaanjo wakufwala pakucita mulimo wa bupailishi, kweelana aMwaami Lesa mbwaakaambila Mose.
27Mpeeke bakatunga minjila yakwe Aloni abana bakwe basankwa, 28Cisani cakufwala kumutwi, tusooti, tuputula twamukati twa cisani citeshimite, 29alimwi alaamba wa cisani cibotu citeshimite abooya bwa mbelele buboneka anga ndiculu, bufubelafubela alimwi abusalalabo pyu. Pakalinga kutungitwe ashakubotesha, kweelana aMwaami Lesa mbwaakaambila Mose. 30Bakapanga akeela kapampamene ka golodi wiine wiine ayi kabe keshibilo kasalalite ka kulibenga, akulembaawo ayi “Wakabengwa ku Mwaami Lesa.” 31Mpeeke bakakaanga kunembo lya cisani cakufwala kumutwi acisani ciboneka anga ndiculu, kweelana aMwaami Lesa mbwaakaambila Mose.
Kumanisha kwa milimo
(Kulo 35:10-19)
32Anu milimo yoonse yakuyaka Tente ya Cipangano yakamana. Bene Isilaeli bakapanga shoonse kweelana aMwaami Lesa mbwaakaambila Mose. 33Bantu bakaletela Mose Tente alimwi ashintu sha njiyo shoonse, shakukobekesha, shintu shamakonko one, mbaalo, shisamu, shapanshi sha njiyo, 34cakufwekaawo ca cipaya ca mbelele isankwa cakaalulwa cisalala, cakufwekaawo ca cipaya cibotu citeshimite, cisani cakushitilisha, 35Libokoshi lya Cipangano umo mwakalinga mabwe obilo apampamene, shisamu shakunyamwisha sha ndilyo alimwi acifwekesho ca nkumbu ca ndilyo. 36Bakaleta tebulu alimwi ashintu sha njiyo shoonse, alimwi ashimaande shipekwa kuli Lesa, 37cakubikawo malampi ca golodi wiine wiine, shintu sha ncico shoonse alimwi amafuta amumalampi, 38cipaililo ca golodi, mafuta akunanika, tununkila kabotu alimwi acisani cakushitilisha kumulyango wa Tente. 39Lyalo bakaleta cipaililo ca bulonse alimwi acili anga nguseefwa ca bulonse ca ncico, shisamu shakunyamwisha ashintu sha nshisho shoonse, mbale ifongomene yakusambilaamo alimwi acapanshi ca njiyo, 40alimwi ashisani shakubika kulushito, shisamu ashapanshi sha nshisho, cisani cakushitilisha kumulyango wa lushito alimwi antaambo sha ncico, mpoopo shaTente alimwi ashintu shoonse shakusebensesha muTente. 41Cakweelaako bakaleta shakufwala shibotu abuumbi isho sheelete kufwala bapailishi muMusena Usalalite, nkokwaamba ayi shakufwala shisalalite shakwe Aloni mupailishi alimwi abana bakwe basankwa. 42Bene Isilaeli bakacita milimo yoonse kweelana aMwaami Lesa mbwaakaambila Mose. 43Lyalo Mose wakeendaamo moonse akubona kwaamba ayi shoonse bashipanga kweelana abwakaamba Mwaami Lesa. Mpeeke Mose wakabapa coolwe.
Currently Selected:
Kulonga 39: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
