Kulonga 38
38
Mbobakayaka cipaililo cakutentelawo milambu
(Kulo 27:1-8)
1Ono cakutentelawo milambu, wakapanga cipaililo ca cisamu ca mulombe. Cakalinga kweelenebo moonse, mumbasu shoonse cakaba masentimita ali 220, ono kuya mwiculu cakalinga masentimita ali 130. 2Peculu lya makonko one oonse, wakapangilamo shintu shili anga ngameeca kwaamba ayi shibebo cintu comwi acipaililo. Coonse wakacinanika bulonse. 3Lyalo wakapanga shintu shoonse sha cipaililo mbuli shakuyolelaawo milota, mafosholo, mbale shifongomene, shakusubushako nyama alimwi ashikaye shakubikawo mulilo. Shoonse shintu ishi shakalinga sha bulonse. 4Wakapanga cili anga nguseefwa ca bulonse akucibika panshi lya mukuti wa cipaililo kwaamba ayi cikashike pakati lya cipaililo. 5Kuswawaawo wakapanga shakukobekesha sha bulonse mumakonko oonse a ncico. 6Wakapanga shisamu shakunyamwishaako sha cisamu ca mulombe washinanika bulonse, 7alimwi akushinjisha mushakukobekesha shoonse shone mumbasu shobilo sha cipaililo. Cipaililo cakalinga ca mapulanga alimwi alupako mukati.
Mbobakapanga mbale ifongomene ya bulonse
(Kulo 30:18)
8Mpeeke wakapanga mbale ifongomene ya bulonse alimwi acapanshi ca njiyo ca bulonse kuswa mushilola sha banakashi bakalinga kusebensela kumulyango wa Tente ya Cipangano.#Kulo 30:18
Lubansa lwa Tente ya Cipangano
(Kulo 27:9-19)
9Ono kuTente ya Cipangano, wakapanga lushito lwa shisani shibotu shiteshimite ayi lubansa lube mukati. Kulubasu lwa kumalenge, shisani isho shakalinga mamita ali 44 mubulaamfu. 10Shisani isho shakacata kusheela sha bulonse shili makumi obilo. Sheela isho shakalinga mushapanshi sha bulonse shili makumi obilo, alimwi wakapanga shakukobekesha atweela kuswa kusilifa. 11Akwalo kulubasu lwa kumatwa kwakalinga mamita ali 44 mubulaamfu, sheela sha bulonse shili makumi obilo, shapanshi sha bulonse shili makumi obilo, shakukobekesha alimwi atweela shakapangwa kuswa kusilifa. 12Kulubasu lwa kumbo, kwakalinga shisani mamita ali 22 mubulaamfu alimwi asheela shili likumi ashapanshi likumi. 13Ono kulubasu lwa kwicwe uko kuli mulyango, akwalo kwakalinga mamita ali 22 mubufwaafwi. 14-15Kulubasu lwa mulyango koonse kwakalinga shisani shakushitilisha shili masentimita ali 660 mubulaamfu, pantu pomwi asheela shotatwe alimwi ashapanshi shotatwe. 16Shoonse shisani shakushitilisha shakalinga mweela lubansa shakalinga shisani shibotu shiteshimite. 17Shapanshi sha shisamu shakalinga sha bulonse, ono shakukobekesha, tweela, alimwi ashakufweka peculu pashisamu shakalinga sha silifa shoonse. 18Calo cisani ca pamulyango wa lushito, cakalinga ca cisani cibotu citeshimite cakatungwa abooya bwa mbelele buboneka anga ndiculu, bufubelafubela alimwi abusalalabo pyu kapatungitwe ashakubotesha. 19Cakalinga kucatite kushisamu shone shili mushapanshi shone sha bulonse. Shakukobekesha sha nshisho, shakufweka peculu sha nshisho alimwi atweela twa nshisho shakalinga sha silifa shoonse. 20Mpoopo shoonse sha kuTente alimwi asha kulushito shakalinga sha bulonse.
Sheela shakalinga kusebenseshekwa muTente ya Cipangano
21Ono ngooyu mundando wa kulema kwa sheela shakalinga kusebenseshekwa muTente ya Cipangano, umo mwakalinga mabwe apampamene obilo apo pakalinga kulembetwe Milawo ili Likumi. Mose ngowakaamba ayi shoonse shilembwe mumundando uyo, bene Lefi mbobakashilemba ndibakalinga kusebenseshekwa aItama mwanaakwe Aloni mupailishi.
22Besalelo mwanaakwe Uli alimwi mushikulu wakwe Elu wa mumukowa wakwe Juda, wakapanga shoonse kweelana aMwaami Lesa mbwaakaambila Mose. 23Shikumucafwa Oolyabu mwanaakwe Ayisamaki, wa mumukowa wakwe Dani, wakalinga shikulemba pashintu shiyumu, shikuyeeyela shintu mbosheelete kuba alimwi akutunga shisani shibotu shiteshimite, asha booya bwa mbelele buboneka anga ndiculu, bufubelafubela alimwi abusalalabo pyu.
24Woonse golodi wakapekwa amoyo woonse kuMwaami Lesa ayi ngwa muTente isalalite, wakalinga kulema makilogilamu ali 1,000 kweelana acipimo cakalinga kusuminishikwa. 25#Kulo 30:11-16Silifa awalo uyo wakaswa mubantu abo bakabelengwa wakalema makilogilamu ali 3,430 kweelana acipimo cakalinga kusuminishikwa. 26Mweelo uyo, wakalinga ngooyo wakaleta bantu boonse bakalembwa. Muntu woonse wakaleta kweelana amweelo wakalinga kuyandika, alimwi akupimwa pacipimo cakasuminishikwa. Bantu bakalembwa bakalinga 603,550 bakalingabo basankwa bacite myaaka ili makumi obilo akuya kunembo.#Mate 17:24 27Silifa wakabengwa wakalinga makilogilamu ali 3,400 bakapangisha shapanshi shili mwaanda sha kuTente isalalite alimwi asha kucisani cakushitilisha. Nkokwaamba ayi capanshi comwi cakalinga kutola makilogilamu ali 34. 28Ono makilogilamu ali 30 a silifa wakacaala, Besalelo wakapangisha tweela, shakukobekesha sha kushisamu alimwi ashakufweka peculu pashisamu. 29Awalo bulonse wakapekwa amoyo woonse kuMwaami Lesa wakalema makilogilamu ali 2,425. 30Bulonse uyo wakaupangisha shapanshi sha kumulyango wa Tente ya Cipangano, cipaililo ca bulonse acili anga nguseefwa ca ncico alimwi ashintu sha ncico shoonse. 31Wakaupangisha ashapanshi sha lushito asha kumulyango wa ndulo, mpoopo shoonse sha kuTente alimwi asha kulushito loonse.
Currently Selected:
Kulonga 38: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
