Kulonga 40
40
Mbobakayaka akubenga Tente ya Cipangano kuMwaami Lesa
1Mwaami Lesa wakaambila Mose ayi, 2“Pabushiku butaanshi mumweenshi wakutaanguna, ukayake Tente ya Cipangano. 3Ukabikeemo Libokoshi lya Cipangano, umo muli Milawo ili Likumi akubikako cisani ca kushitilisha kunembo lya ndilyo. 4Ukenjishemo tebulu akubikawo shintu sha njiyo. Kuswawaawo ukenjishe cakubikawo malampi, mpeeke ukabikeewo amalampi. 5Lyalo ukabike cipaililo ca golodi cakutentelawo tununkila kabotu kunembo lya Libokoshi lya Cipangano, akukobeka cisani cakushitilisha pamulyango wa Tente. 6Ono kunembo lya Tente, ukabikeko cipaililo cakutentelawo milambu. 7Ingayi pakati lya Tente alimwi acipaililo ukabikewo mbale ifongomene yakusambilaamo akwisushamo maanshi. 8Ukayake lushito kushingulusha Tente, alimwi akukobeka cisani cakushitilisha pamulyango wa lushito.
9“Lyalo ukabenge Tente alimwi ashintu sha ndilyo shoonse kuli ndime neMwaami Lesa kwiinda mukushinanika mafuta asalalite, aboobo Tente ilaakunoosalalite. 10Kuswawaawo ukabenge cipaililo alimwi ashintu sha ncico shoonse kuli ndime kwiinda mukushinanika mafuta asalalite, lyalo cilaakunoosalalite cakumaninina. 11Ukabenge mbale ifongomene yakusambilaamo alimwi acapanshi ca njiyo munshila njemunya iyo.
12“Ono ndyeshi ukalete Aloni alimwi abana bakwe basankwa pamulyango wa Tente ya Cipangano, akubalwiita ayi basambe cakulisalasha kweelana amulawo. 13Ukafwalike Aloni shakufwala sha bupailishi akumunanika mafuta asalalite alimwi akumubenga kuli ndime, kwaamba ayi akansebensele mulimo wa bupailishi. 14Alimwi ukalete bana bakwe basankwa akubafwalika minjila. 15Ukabananike bweenka mbweshi ukananike ishiwabo kwaamba ayi bakansebensele mulimo wa bupailishi. Kunanikwa uko kulaakulengesha ayi bakanoolibo bapailishi lyoonse.”
16Mpomunyaawo Mose wakacita shoonse kweelana abwakamwaambila Mwaami Lesa. 17Aboobo pabushiku butaanshi mumweenshi wakutaanguna, ono mumwaaka wabili kuswa ndibakaswa mucishi ca Ijipiti, Tente ya Cipangano yakayakwa. 18Mose wakabikako shapanshi sha ndilyo, shintu shamakonko one, mbaalo alimwi ashisamu sha ndilyo. 19Wakafungulwitawo cakufwekaawo paTente alimwi akufwekawo ca peculu kweelana abwakamwaambila Mwaami Lesa. 20Kuswawaawo wakabwesa mabwe apampamene obilo akwaabika muLibokoshi lya Cipangano. Wakenjisha shisamu shakunyamwisha munkobeko sha Libokoshi lya Cipangano, akubika cifwekesho ca nkumbu pali ndilyo. 21Lyalo wakenjisha Libokoshi ilyo muTente akukobeka cisani cakushitilisha. Mukucita boobo, wakashitilisha Libokoshi lya Cipangano kweelana abwakamwaambila Mwaami Lesa.
22Mpeeke wakenjisha tebulu muTente ya Cipangano, weebika kulubasu lwa kumatwa pansengwe lya cisani cakushitilisha, 23alimwi akubikawo shimaande shipekwa kuMwaami Lesa, kweelana ambwaakamwaambila mwiine. 24Lyalo wakenjisha cakubikawo malampi muTente, kulubasu lwa kumalenge kacilangene atebulu. 25Mpeeke wakanyasha malampi pameenso a Mwaami Lesa kweelana ambwaakamwaambila mwiine. 26Wakabika acipaililo ca golodi muTente, kunembo lya cisani cakushitilisha, 27akutentelawo tununkila kabotu kweelana abwakamwaambila Mwaami Lesa. 28Lyalo wakakobeka cisani cakushitilisha pamulyango wa Tente, 29alimwi mpekaawo kunembo lya cisani cakushitilisha, wakabikawo cipaililo cakutentelawo milambu. Pali ncico, wakatentelaawo mulambu wakutenta alimwi acipo ca fulaulo kweelana abwakamwaambila Mwaami Lesa. 30Kuswawaawo wakabika mbale ifongomene yakusambilaamo pakati lya Tente alimwi acipaililo, akwisushamo maanshi. 31Mpeeke Mose, Aloni alimwi abana bakwe basankwa mobakalinga kusamba kumaansa alimwi akumyeendo 32lyoonse pakwinjila muTente apakuya kucipaililo, bakasamba kweelana abwakamwaambila Mwaami Lesa. 33Alimwi Mose wakayaka lushito kushingulusha Tente alimwi acipaililo, akukobeka cisani cakushitilisha pamulyango wa lushito. Anu ubo mbwaakamanisha milimo yoonse.
Likumbi paTente ya Cipangano
(Shakube 9:15-23)
34Mpeeke likumbi lyakafwekelesha Tente ya Cipangano akwiisusha bulemu bwa Mwaami Lesa.#1 Baami 8:10-11; Isa 6:4; Ese 43:4-5; Ciyu 15:8 35Paceebo ceeci Mose wakaalilwa kwinjila muTente ya Cipangano mukwiinga likumbi lyakaselukila peenka apo paTente akwiisusha abulemu bwa Mwaami Lesa. 36Anu mulweendo lwabo loonse, bene Isilaeli bakalinga kulongabo na likumbi lyaswaawo paTente. 37Sombi na likumbi kalicili paTente, tebakalinga kulonga. 38Likumbi lya bulemu bwa Mwaami Lesa lyakalinga kuba paTente ya Cipangano malumwi, alimwi bakalinga kubona mulilo mulikumbi ciindi ca mashiku mulweendo lwabo loonse.
Currently Selected:
Kulonga 40: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
