Milimo ya Batumwi 28
28
Cakacitika kuli Paulo pansumbu ya Molita
1Ono nditwakapuluka akushika kwitala, bamwi bekala kooko bakatulwiita ayi insumbu iyo njetwakalingaawo ileetwa ayi Molita. 2Bantu ba kooko bakatunyumfwila nkumbu abuumbi. Bakatutambula kabotu cakwaamba ayi bakatukunkila amulilo ceebo mfula yakalinga kuloka alimwi kwakaba mpewo. 3Paulo wakatepa mule wa nkuni. Ono ndyaakalinga kubika nkuni pamulilo, mwakaswa nsoka ceebo ca cikasaashi akumuluma kulyaansa, yacatilila. 4Bantu abo ndibakabona nsoka keeleleela kulyaansa lyakwe Paulo, bakalyaamboosha beene abeene ayi, “Musankwa uyu ncakwiila ngumucayi. Nakubi kwaamba ayi wapuluka palweenge, sombi lesa wiitwa ayi Bululami taasuni kwaamba ayi abe abuumi.” 5Sombi Paulo wakeesanswita mumulilo, kwakutanyumfwaawo akucisa. 6Bantu abo bakalinga kulangilabo ayi utooshimba nabi kufwa cakwaalamukabo. Sombi ndibakalindilila ciindi cilaamfu kwakutabonawo cimwi cintu cakacitika pali nguwe, bakapiluka akwaamba ayi, “Ngulesa!”
7Pafwaafwibo apaapo mpotwakalinga, kwakalinga myuunda yakwe Pabulyasi, mutanjilili wa pansumbu iyo. Alakwe wakatutambula camaansa obilo alimwi twakeekalaakwe nshiku shotatwe. 8Baishi Pabulyasi bakalinga kulete ceebo bakalinga balwashi cimpwita alimwi acinkumbe. Mpeeke Paulo wakaya muŋanda mobakalinga, wakapaila alimwi akubika maansaakwe pali mbabo, lyalo bakaba kabotu. 9Ndicakacitika cikani ici, balwashi boonse pansumbu iyo bakatalika kwisa. Mpomunyaawo Paulo wakalinga kubashilika. 10Bakatupa shipo shiinji. Nditwakenjila mubwaato bunene ayi tunooya, bakabikaamo ashimwi shintu shakalinga kuyandika mulweendo lwesu.
Lweendo lwa kuswa kuMolita kuya kuLoma
11Ndipakeenda myeenshi yotatwe, twakanyamuka abwaato bunene bwakaswita kuAlekisandiliya bwiitwa ayi, “Balesa bampundu.” Bwaato ubu bwakalingabo pansumbu iyi mupewo woonse. 12Mpomunyaawo twakashika mundabala inene ya Silakuse umo motwakekala nshiku shotatwe. 13Kuswa kooko, twakeenda kushikila twashika mundabala inene ya Legiyamu. Bushiku bwakaboolaawo, muuwo wakatalika kupuupa kuswa kumalenge. Lyalo pabushiku bwabili, twakashika pacito ca ndabala ya Puteoli. 14Nkomunya uko twakacanako bashomi bamwi abo bakatusenga ayi twikalaabo nsondo yomwi. Ubo mbotwakeenda kuya mukushika kuLoma. 15Bashomi ba kuLoma ndibakanyumfwa ayi tuli munshila, bakeenda kwisa mukutucinsha kushikila akumusena wiitwa ayi Mushika wa Apyasi, abalo bamwi kumusena wiitwa ayi Maanda Otatwe a Beensu. Paulo ndyaakababona, wakalumba Lesa alimwi ici cakamuyumyayumya.
Paulo mbwaakashimikila muLoma
16Nditwakashika muLoma, Paulo bakamusuminisha kulikalila eenka ashilumamba shikumulama.
17Ono ndipakeenda nshiku shotatwe, Paulo wakeeta bamatanjilili ba baJuda ba kooko kwaamba ayi aambaabo. Ndibakabungana, wakabaambila ayi, “Nobene Isilaelima, nakubi kwaamba ayi taaku cibiibi ncendakacita kubantu besu nabi kucita cintu citasuminishikwi kweelana akwishibila kwa bakulukulu besu, baJuda bakaŋangisha muJelusalemu akumbika mumaansa a bene Loma. 18Ono bene Loma ndibakamana kunjipusha mbuli makani mbwaabete, bakalinga kusuni kuŋangulula mukwiinga tabakwe kuncanina mulandu ngweenga ndafwitaawo. 19Sombi baJuda tebakalinga kusuni kwaamba ayi ŋangululwe, aboobo ndakasenga kwaamba ayi Sisa muleli munene wa kokuno oomboloshe mulandu wangu. Nakubi boobo nshicite mulandu wakupa mushobo wangu, sobwe.#Mili 25:11 20Anu nceceeco ncendamwiitila kwaamba ayi ŋambaanu. Nebo ndyaangitwe ceebo ca wooyo ngobatoolangila bene Isilaeli.”
21Balo bakakumbula ayi, “Tatuna kutambulawo makalata kuswa kuJudeya aamba pali ndiwe. Peculu lya waawo taaku bene Isilaelinyineesu bakaswa kooko mukutulwiita mbuli mbwaabete makani, nabi kwaamba makani amwi abiibi pali ndiwe. 22Sombi tulisuni kunyumfwa miyeeyo yako mukwiinga tulishi kwaamba ayi kuli koonsebo, bantu balaamba ayi likoto ili ndyoobeteemo talibete kabotu.”
23Mpomunyaawo bakabamba bushiku bumwi bwakwaamba ayi bakabandike aPaulo. Mpeeke kwakesa baJuda baanji pabushiku ubo kumusena uko kwakalinga kwikala Paulo. Kuswa macuunsa kushikila amashiku, Paulo wakalinga kubasansulwita makani aamba paBweene bwakwe Lesa. Wakeelesha kubasansulwita shapali Jesu kwaamba ayi bashome kwiinda mukubaambila shilembetwe muMilawo yakwe Mose alimwi amabuku akalemba balaluki bakulukulu. 24Bamwi mulikoto lyabo bakasumina akushoma maswi ngaakalinga kwaamba, sombi bamwi tabakwe kushoma. 25Ono kabatana kupalangana akunooya cipikishanya beene abeene, Paulo wakaamba maswi akweelaako ayi, “Ncakwiila Mushimu Usalashi wakaamba kabotu ndiwakatanjilila mulaluki mukulukulu Isaya kulwiita bamashali besu bakulukulu 26ayi,
‘Koya kubantu aba mukubalwiita ayi,
Mulaakukutikishisha, sombi teshi mukanyumfwishishe,
Mulaakulangilishisha, sombi teshi mukabonesheshe.
27Mukwiinga bantu aba mbeshi cimpamya
alimwi bashinka mumatwi abo akucala meenso abo.
Nakuteshi boobo, naakwiinga kababonesha akunyumfwishisha,
akuba amyoyo yakusuna kukutika
kwaamba ayi basanduke kuswa kushibiibi shabo,
ayi nebo neLesa mbashilike.’ ”#Isa 6:9-10
28Paulo wakatolelela kubaambila ayi, “Mulyeelete kwishiba kwaamba ayi beshikushimikila makani a lupulusho akwe Lesa, batumwa kubaswamashi bakunsengwe ceebo balo balakwaanyumfwa!” [ 29Paulo ndyaakamana kwaamba boobo baJuda bakaswaawo kabaya cipikishanya cankusu beene abeene.]
30Ono kwamyaaka yobilo, Paulo wakalinga kwikala muŋanda njaakalinga kusonkela mwiine akutambula baabo boonse bakalinga kwisa mukumubona. 31Wakalinga kushimikila makani a paBweene bwakwe Lesa akwiisha shapaMwaami Jesu Klistu cakubula boowa alimwi taaku muntu nabi womwi wakamukasha.
Currently Selected:
Milimo ya Batumwi 28: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.