Milimo ya Batumwi 27
27
Paulo mbobakamutola kuLoma mubwaato bunene
1Ndicakasuminishikwa ayi tutooya abwaato bunene kuItali, Paulo abakaili bamwi bakabikwa mumaansa a mutanjilili wa bashilumamba wiitwa ayi Julyasi, wa mulikoto lya bashilumamba bene Loma lyakalinga kwiitwa ayi “Bashilumamba bakwe Sisa muleli munene wa kuLoma.” 2Twakatanta mubwaato bwakaswita kuAdilamityamu ubo bwakalinga kulindilabo kunyamuka kuya mushito sha kuEsha. Twakalinga aAlisitakasi mwine Makedoniya wa mundabala ya Tesalonika. 3Bushiku bwakaboolaawo, twakashika kuSidoni. Lyalo Julyasi wakanyumfwila nkumbu Paulo akumusuminisha ayi aye mukubona babye, kwaamba ayi bakamupeewo shimwi shintu nshaatakalinga kucite. 4Kuswa kooko, twakeenda kunsumbu ya Saipulasi ceebo ca cipuupu cakalingaako. Kulubasu uko kwalo tekwakalinga cipuupu. 5Ono nditwakeenda mulweenge luli pafwaafwi acishi ca Silisiya alimwi aPamfilya, twakashika mundabala ya Maila mucishi ca Lisiya, mpeeke twakaseluka. 6Uko mutanjilili wa bashilumamba mwaanda wakacana bwaato bwakalinga kuswa kuAlekisandiliya kabuya kuItali, lyalo wakatwinjishaamo.
7Ono ceebo ca cipuupu cakalingaako, twakalinga kuyabo paniininiini, aboobo twakatola nshiku shiinji kushikila twashika pafwaafwi andabala ya Sinidasi. Ono mukwiinga cipuupu cakeendilila, twakeenda kulubasu nkotwakashitilishikwa ansuumbu ya Kileti, iyo ilangene aSalimoni. 8Twakeenda mweela maanshi cakupengapenga kushikila twashika kumusena wiitwa ayi Shito Shibotu, pafwaafwi andabala ya Lasiya.
9Twakekala ciindi cilaamfu nkomunya uko abushiku bwa kusekelela kulekelelwa kwa shibiibi kabuli bweenda kale. Ciindi ico cakaboneka ayi citooleta mapensho kweenda abwaato bunene. Mpomunyaawo Paulo wakabacenjesha ayi, 10“Nobeensuma, nebo ndaboona ayi lweendo lwesu kuswa waano kuya kunembo lutooleta mapensho anene. Shintu shiinji abwaato shitoonyonyooka alimwi abantu inga bafwa.” 11Sombi mutanjilili wa bashilumamba mwaanda wakanyumfwila munene wa basebenshi alimwi amwine bwaato kwiinda shakaamba Paulo. 12Cito ico tecakalinga cibotu kwikalaawo ciindi ca mupewo. Aboobo bantu baanji mulikoto lyabo bakayeeya kuswa pacito ico akuya kunembo ayi mpashi inga bashika kucito ca Fonikisi akwikala nkuko ciindi ico. Cito ici cili muKileti, cilangite kumbo lya kumalenge alimwi akumbo lya kumatwa.
Cipuupu cakaba palweenge
13Mpomunyaawo muuwo wakatalika kupuupa paniininiini kuswa kumalenge. Aboobo basankwa abo bakayeeya ayi batolelele amuyeeyo wabo. Lyalo bakaangulula bwaato bunene akutalika kweendela mweela nsumbu ya Kileti. 14Sombi kapatana kwiinda ciindi, muuwo wiitwa ayi “Wa kwicwe lya kumatwa” wakapuupa abuumbi. Wakalinga kupuupa kuswa kunsumbu. 15Mpeeke maaba akesa mukuuma kubwaato, lyalo bwakaalilwa kuya kwakalinga kuswita muuwo. Aboobo twakabulekabo ayi bunooya amuuwo. 16Twakaya mukushitilishikwa ansuumbu iniini ya Kauda nditwakeenda kulubasu lwa kumalenge. Nkomunya uko, mukupengapenga, twakaangilila kabwaato kwisule mubwaato bunene. 17Bakakakwelela mubwaato bunene. Lyalo bakaanga ntambo bwaato bunene ayi butapasuki. Bakalinga kuloonda ayi mpashi inga beenda pamuseese wa mumaanshi mweela cishi ca Libya. Aboobo bakafunga shisani akucileka kweensha bwaato ubo, lyalo kabutolwabo amuuwo. 18Muuwo wakatolelela kupuupa. Ono ndibwakaca bakatalika kukusha shintu nshebakalinga kuyumwite mubwaato akushiwaala mulweenge. 19Ingayi pabushiku bwatatu, bakasowa shisebensesho sha mubwaato shimwi mumaanshi. 20Inshiku shiinji tetwakalinga kubona lisuba nabi nyenyeenshi. Awalo muuwo wakatolelela kupuupa cankusu. Lyalo twakacileka akulangila ayi tutoopuluka.
21Basankwa ndibakeensha ciindi cilaamfu kwakubula cakulya, Paulo wakeemikana pakati kabo akwaamba ayi, “Nobeensuma, nemwakanyumfwa maswi ngondakaamba akutaswa kuKileti, naakwiinga tatukwe kunyonyookelwa akusowekelwa bobulya. 22Sombi ntoomusenga ayi mukalike myoyo mukwiinga taaku muntu nabi womwi weshi afwe, sombibo bwaato mbweshi bunyonyooke. 23Mukwiinga mashiku Lesa uyo unyeendelesha alimwi ngoonambila, watuma munjelo wakwe kuli ndime. 24Lyalo waamba ayi, ‘Utaloondi Paulo! Ulyeelete kuya mukwiimikana kunembo lyakwe Sisa muleli munene wa kuLoma. Lesa lakwe, munkumbu shakwe, walengesha ayi utafwi abaabo boonse mbooli abo mulweendo ulu.’ 25Aboobo nobeensuma, amukalike myoyo mukwiinga ndashoma muli Lesa ayi shoonse nshaamba shitoocitika bweenka mbwaamba. 26Nakubi boobo tulyeelete kuya mukuwaalwa pansumbu imwi.”
27Ono mashiku pabushiku bwakukwanisha nsondo shobilo kuswa ndicakatalika cipuupu, twakalinga kuya citolaanishikwabo amuuwo mulweenge lwa Adiliya. Mpeeke pakati ka mashiku basebenshi beshikubona bwaato bunene bakayeeya ayi butooya cishika kwitala. 28Mpomunyaawo bakalosha lutambo mumaanshi lwakalinga kwaangitwe cinshimbi kweela kwaamba ayi babone mbobabete kulaampa apo mpobakalinga. Bakacana kwaamba ayi pakalinga kulaampa mamita alil 40. Ndibakeendaako paniini, bakacita alimwi mbweeke ubo akucana bulaamfu bwa mamita ali 30. 29Lyalo bakaloonda ayi bwaato bunene inga bwatolaanishikwa kumabwe. Aboobo bakalosha shinshimbi shakwiimikisha bwaato shone shakalinga kwaangitwe kwisule lya bwaato akutalika kupaila ayi buce bwaangu. 30Basebenshi beshikubona bwaato bakalinga kusuni kuloboka kuswa mubwaato. Bakalosha kabwaato mumaanshi kababeca kubika shinshimbi shakwiimikisha bwaato bunene shakalinga kwaangitwe kunembo lya bwaato ubo. 31Sombi Paulo wakaambila mutanjilili wa bashilumamba mwaanda alimwi abashilumamba mbwaakalingaabo ayi, “Na basebenshi beshikubona bwaato aba basweemo mubwaato muno, teshi mupulukeewo.” 32Mpeeke bashilumamba bakatimbula ntambo shakalinga kucatite kabwaato, lyalo kakalinga kuya ciseelabo pamaanshi.
33Ndipakatubatubabo, Paulo wakabasenga boonse ayi balye. Wakabaambila ayi, “Shakumana nshiku likumi ashone kamulindililabo, kutalyaawo nabi cintu comwi. 34Ono ndamusenga ayi mulye kwaamba ayi mupuluke. Teshi muliciseewo napaceyi.” 35Ndyaakamana kwaamba boobo, Paulo wakabwesa shinkwa akulumba Lesa pameenso abo boonse, wakakomonaako watalika kulya. 36Mpeeke boonse bakayumya myoyo akutalika kulya abalo. 37Pantu pomwi soonse twakalinga 276 mubwaato bunene. 38Ndibakakuta boonse, bakawaala witi mumaanshi wakalinga wacaala mubwaato ayi buube.
Maaba mbwaakapasula bwaato
39Ndibwakaca, basebenshi beshikubona bwaato bunene tabakwe kwishiba ayi batooya cishika kuloombe. Sombi bakabona cisapa cimwi ca museese akuyeeya ayi beeleshe kuya mukwiimikila nkuko bwaato. 40Mpeeke bakatimbula ntambo shakalinga kucatite bwaato akushileka shalokela mumaanshi alimwi akwaangulula ntambo shakalinga kwaangitwe kuntapulo. Lyalo bakafungulula cisani cakunembo lya bwaato kwaamba ayi muuwo ubutoolaanye kunembo. Mpeeke twakalulama kuloombe. 41Sombi bwaato bwakacinka mumuseese wakalinga mumaanshi, bweemikana. Cipansha ca kunembo cakatapila mumuseese akwiindililabo kwiimikana. Acalo cipansha cakwisule cakapasooka ceebo ca maaba akalinga kwisa ankusu.
42Ono bashilumamba bakapangana ayi bacaye bakaili kwaamba ayi kutabi nabi womwi eshi asambe njabwe kushika kwitala akuloboka. 43Sombi mutanjilili wa bashilumamba mwaanda wakalinga kusuni kupulusha Paulo. Paceebo ceeco wakabakasha kucita boobo. Mpomunyaawo wakaambila bakaili boonse bakalinga kucishi kusamba njabwe, ayi bataangune kuliwaala mumaanshi kwaamba ayi basambe baye kwitala. 44Lyalo bamwi boonse ndibakaliwaalaawo, kabacatite kumapulanga ashimwi shakapasooka kubwaato. Soonse ubo mbotwakasubuka akupuluka.
Currently Selected:
Milimo ya Batumwi 27: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.