2 Samwelo 3
3
1Ono kulwana pakati ka baabo bakalinga kwiimikanina bamuŋanda yakwe Saulo abaabo bakalinga kwiimikanina Defedi, kwakatola ciindi cilaamfu abuumbi. Sombi lubasu lwakwe Defedi mbuli mbolwakalinga kuya ciindaawo kuyuma, lwalo lumwi lwakalinga kuya ciindaawo kulefuka.
Bana bakwe Defedi basankwa
2Mpeeke Defedi wakashala bana basankwa kaali muEbuloni.
Wakwiiya wakalinga Amunoni ngwaakashalila muli Ainoamu mwine Jesiliilu, 3wakaboolaawo nguKilyabu muli Abigelo mwanakashi wakashiya Nabali mwine Kamelo. Watatu nguAbusalomu muli Maaka mwanaakwe Talumayi mwaami wa Geshuli, 4Wane nguAdonija muli Agiti, wasanu nguShefatiya muli Abitali, 5wasanu awomwi nguItilimu muli Egila. Boonse baana basankwa aba Defedi wakabashalila muEbuloni.
Abina mbwaakaba kulubasu lwakwe Defedi
6Nkoondo ndiyakalinga kuciya pakati ka baabo bakalinga kwiimikanina bamuŋanda yakwe Saulo abaabo bakalinga kwiimikanina Defedi, Abina wakeendaawo nkusu abulemu pakati ka baabo bakalinga kulubasu lwakwe Saulo.
7Ono Saulo wakalinga kucite kasuwa wakalinga kwiitwa ayi Lisipa mwanaakwe Aya. Bumwi bushiku Ishibosheti wakabekesha Abina ayi wakakumana aLisipa uyo. 8Abina wakashimba kubukali ceebo ca cikani ico cakaamba Ishibosheti akukumbula ayi, “Sa nebo ndi kabwa kulubasu lwa bene Juda? Kuswa lyeelyo kushikila asunu, ndalinga kushomeka kubaabo bali kulubasu lwa baiso baSaulo akubamuŋanda yabo, pantu pomwi ababyaabo. Nshina kukwaabaawo webo mumaansaakwe Defedi ayi akucaaye. Sombi sunu wesa mukumpa mulandu pamwanakashi uyu! 9Ono Mwaami Lesa aampe mulandu nebo neAbina, nabibo unene, na mbule kucitila Defedi ico Mwaami Lesa ncaakamushomesha cakulumbila. 10Ntoolonsha bwaami kuswa kulubasu lwakwe Saulo akubupa Defedi. Cishi coonse ca Isilaeli aJuda ulaakuceendelesha kuswa kuDani tibili akuBiyasheba.”#1 Samwe 15:28 11Mpomunyaawo Ishibosheti taakwe kukushawo liswi alimwi kuli Abina mukwiinga wakalinga kumuloonda abuumbi.
12Kuswawaawo Abina wakatuma beshinkombe kuEbuloni kuli Defedi amaswi akwaamba ayi, “Anu cishi cino nca baani? Amupange cipangano anebo, lyalo ndaakumucafwa kuleta cishi coonse ca Isilaeli mumaansaanu.” 13Defedi wakakumbula ayi, “Cabota, ntoopanga cipangano awebo. Ono ntookusenga cintu comwi. Tooelete kushika muliimfwa lyangu citobo ukalete Mikali mwanaakwe Saulo waakunoosa mukumbona.” 14Lyalo Defedi wakatuma nkombe kuli Ishibosheti ayi, “Mpe Mikali mukaangu ngondakamamikila amweelo wa shikanda sha kunembo kubusankwa sha bene Filisiti shili mwaanda.”#1 Samwe 18:27
15Mpeeke Ishibosheti wakaambila bantu ayi bamukusheeko kuli Palutiyelo ibaye, mwanaakwe Laishi. 16Ndibakalinga kumutola, Palutiyelo wakalinga kuya cikonkela pesule kaaya cilila buumpute nshila yoonse tibili akundabala ya Bayulimu. Lyalo Abina wakamwaambila ayi, “Webo boolela we.” Mpomunyaawo alakwe wakaboolela kumishaabo.
17Pesule Abina wakabandika abamaloba ba bene Isilaeli akubaambila ayi, “Kwaciindi cilaamfu mwalinga kuyanda ayi Defedi abe Mwaami wanu. 18Anu ici ceenka nceciindi canu. Na muliibalukite, Mwaami Lesa wakaamba pali Defedi ayi, ‘Kwiinda mumusebenshi wangu Defedi, ndaakufuna bantu bangu kuswa kubene Filisiti akubalwani babo bamwi boonse.’ ”
19Abina wakabandika abantu ba mumukowa wakwe Benjameni. Lyalo wakaya kuEbuloni mukwaambila Defedi shoonse ba mucishi ca Isilaeli coonse aba mumukowa wakwe Benjameni boonse nshebakalinga basumina kucita. 20Abina abashilumamba bali makumi obilo abo mbwaakalingaabo ndibakashika kuli Defedi kuEbuloni, Defedi wakababambila kusekelela. 21Mpeeke Abina wakalwiita Defedi ayi, “Nkambo nobaami bangu, amunsuminishe nyamuke bulya bweenka nooya nkamubunganyishile bene Isilaeli, kwaamba ayi bakapange cipangano amwebo alimwi ayi mukabeendeleshe. Lyalo calinga kuyanda moyo wanu mulaakucicana.” Aboobo Defedi wakasuminisha Abina kuya muluumuno.
Joabu mbwaakacaya Abina
22Kapatana kwiindaawo aciindi cilaamfu, Joabu abashilumamba bakwe Defedi wakapola kuswa mukulwana. Bakaleta shintu nshebakasaala shiinji. Sombi ico ciindi Abina kaali wapansaana kale aDefedi muEbuloni mukwiinga Defedi wakamusuminisha kuya muluumuno. 23Mpeeke Joabu abashilumamba mbwaakalingaabo ndibakashika, wakalwiitikwa ayi, “Abina mwanaakwe Na walingaako kumwaami, alimwi mwaami wamusuminisha kuya muluumuno.”
24Mpomunyaawo Joabu wakaya kumwaami akwiipusha ayi, “Mwacitilanshi bobulya nkambo? Abina walingaako kuno kuli ndimwe, ino mwamulekelanshi ayi aye? Ncakwiila bulya wasakana! 25Mwebo mulishi Abina mwanaakwe Na mbwaabete. Wesa mukumucenjeeka ayi abone mbomweenda akwishiba shoonse nshemutoocita.”
26Mpeeke Joabu wakaswaako kuli Defedi akutuma beshinkombe ayi bacinshe Abina. Lyalo bakamubooshesha kumukalo wa Sila. Nakubi boobo Defedi taakalinga kweeshi makani ayo. 27Ono Abina ndyaakaboola kuEbuloni, Joabu wakamutola kulubasu kumwinjililo anga ulisuni kubandikaakwe cabushishi. Mpeeke kweenka uko wakamuyasa mulifumo, wafwa. Joabu wakacita boobo kwaamba ayi abooshe cishole cakucaya Asayelo mukwabo.
28Pesule Defedi ndyaakeshiba cikani ico, wakaamba ayi, “Nebo abamubweene bwangu tatucite mulandu palufu lwakwe Abina mwanaakwe Na pameenso a Mwaami Lesa. 29Mulandu wa bulowa bwakwe Abina aukabe pali Joabu abamuŋanda ya baishi! Pakati ka bamulunyungu lwakwe munshiku shoonse shili kunembo, apakacanike lyoonse pali mulwashi kasele, ucite manata, utacite nkusu shakusebensa ncito iyumu, weenga wacaikwa munkondo, nabi upengete cakulya!”
30Mboboobo Joabu aAbishayi mukwabo mbobakacaya Abina ayi babooshe cishole cakucaya Asayelo mukwababo kunkondo ya Gibyoni.
Abina mbwaakabikwa
31Lyalo Defedi wakaambila Joabu abantu boonse mbwaakalingaabo ayi, “Amukwamoone shakufwala shanu, mufwale masaka munooya cilila kunembo lyakwe Abina.” Mwiine mwaami Defedi wakalinga kuya cilila pesule lya libokoshi. 32Abina bakamubika muEbuloni alimwi mwaami wakalila cakooloma kucuumbwe cakwe Abina. Bantu bamwi boonse abalo bakalila abuumbi.
33Mpeeke mwaami Defedi wakeemba lwiimbo lwakulila ayi,
“Ino Abina wakafwitanshi bufwa muluya?
34Maansaakwe taakalinga kwaangitweewo,
ayalo myeendo yakwe teyakalinga kwaangitwe.
Wafwabo anga ngumuntu wakacaikwa kubakapondo!”
Mpomunyaawo bantu boonse bakalila Abina alimwi.
35Bantu bakaya basenga Defedi cankusu ayi alyeewo cimwi cintu kalicili malumwi, sombi wakashomesha cakulumbila ayi, “Mwaami Lesa ampe mulandu, nabibo unene, na ndyeewo shinkwa nabi cakulya cimwi cili coonse lisuba kalitana kwipila!”
36Bantu boonse bakalabilila cikani ico alimwi cakabasangalasha. Ncakwiila shintu shoonse shakacita mwaami shakabasangalasha. 37Mpeeke pabushiku ubo bantu bakwe Defedi abene Isilaeli boonse bakeshiba ayi mwaami Defedi taacitemo lubasu mukucaikwa kwakwe Abina mwanaakwe Na.
38Lyalo mwaami Defedi wakaambila bashilumamba bakwe ayi, “Sa tamubwene kwaamba ayi bushiku bwa sunu muno mucishi ca Isilaeli mwafwa musankwa mwiine mwiine alimwi mulemu? 39Sunu nakubi kwaamba ayi ndime mwaami wakasalwa aMwaami Lesa kwiinda mukunanikwa mafuta, ndalinyumfwa kuuba, alimwi bana bakwe Seluiya aba banjumina abuumbi. Mwaami Lesa aalambule bakapondo aba kweelana amicito yabo ibiibi!”
Currently Selected:
2 Samwelo 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.