2 Samwelo 2
2
Defedi mbwaakananikwa kuba mwaami wa cishi ca Juda
1Kuswawaawo Defedi wakeepusha Mwaami Lesa ayi, “Sa nje ono kundabala yomwi ya muJuda?” Mwaami Lesa wakakumbula ayi, “Ee, koya.” Mpomunyaawo wakeepusha alimwi ayi, “Nje kundabalanshi?” Mwaami Lesa wakakumbula ayi, “Koya kuEbuloni.”
2Mpeeke wakaya kuEbuloni abamakaakwe boonse bobilo, Ainoamu mwine Jesiliilu aAbigelo mwanakashi wakashiya Nabali mwine Kamelo.#1 Samwe 25:42-43 3Defedi wakaya abashilumamba abo mbwaakalingaabo, womwi awomwi wakaya abamuŋanda yakwe. Lyalo bakaya bekala muEbuloni amumandabala akalinga kunooishingulukite. 4Mpeeke basankwa bene Juda bakesa kuEbuloni akunanika Defedi kuba mwaami wabo.#1 Samwe 31:11-13
Ono Defedi ndyaakanyumfwa kwaamba ayi basankwa bene Jabeshi Gilyadi mbobakabika Saulo, 5wakatuma beshinkombe mukubaambila ayi, “Mwaami Lesa amupe coolwe ceebo mwatondesha kushomeka kuli Saulo mwaami wanu kwiinda mukumubika. 6Mwaami Lesa aamunyumfwile nkumbu lyoonse alimwi akumutondesha kushomeka kwakwe. Anebo ndaakunoomucitila kabotu ceebo ca ceeci ncemwakacita. 7Ono amuyume akubula boowa mukwiinga Saulo mwaami wanu ulifwite. Paceebo ceeci bene Juda bananika ndime kuba mwaami wabo.”
Ishibosheti mbwaakapekwa bwaami bwa cishi ca Isilaeli
8Muciindi ceenka ico, Abina mwanaakwe Na, mutanjilili wa bashilumamba bakwe Saulo, wakabwesa Ishibosheti mwanaakwe Saulo akumutola kuMaanaimu kwitala lya Mulonga wa Joodani. 9Mpeeke wakamubika pabwaami bwa cishi ca Gilyadi, Asheli, Jesiliilu, Efuleemu alimwi acakwe Benjameni, nkokwaamba ayi cishi ca Isilaeli coonse.
10Ishibosheti mwanaakwe Saulo wakalinga kucite myaaka makumi one ndyaakaba mwaami wa cishi ca Isilaeli. Wakeendelesha kwamyaaka yobilo. Nakubi boobo bene Juda boonse bakalinga mubweendeleshi bwakwe Defedi. 11Defedi wakalela bene Juda kwa myaaka yosanwe ayobilo alimwi amusa kaali mundabala ya Ebuloni.
12Ono Abina mwanaakwe Na pantu pomwi abashilumamba bakwe Ishibosheti mwanaakwe Saulo bakaswaako kuMaanaimu akuya kuGibyoni. 13Alakwe Joabu mwanaakwe Seluiya wakanyamuka abashilumamba bakwe Defedi akuya mukukumanaabo kucishiba ca Gibyoni. Likoto limwi lyakekala kulubasu lomwi lwa cishiba alimwi kulubasu lumwi. 14Lyalo Abina wakaambila Joabu ayi, “Atulwanishe basankwa bacikula bwangu bamwi, tweebele.” Joabu wakakumbula ayi, “Ncibotu, abalwane.”
15Mpeeke bakanyamuka akubelenga basankwa bali likumi abobilo ba mumukowa wakwe Benjameni bakalinga kwiimikanina Ishibosheti mwanaakwe Saulo, abalo bakwe Defedi bali likumi abobilo. 16Lyalo musankwa womwi awomwi wakacata mubye kumutwi wakusha mupeeni wakwe akuyasa ngwaatoolwanaakwe. Mpeeke boonse bobilo bawita pantu pomwi, tibili boonse bali makumi obilo abone bafwa. Kuswawaawo musena uyo bakautumba ayi Elikati Asulimu nkokwaamba ayi Muunda wa Mipeeni.
17Bushiku ubo nkondo yakalula abuumbi. Mpeeke Abina abashilumamba bene Isilaeli bakakomwa kubakwe Defedi. 18Bana bakwe Seluiya basankwa botatwe boonse bakalingaawo. Meenaabo nguJoabu, Abishayi alimwi aAsayelo. Asayelo wakalinga anga ndiaki kulubilo. 19Mpeeke wakatandaanya Abina cakumululamabo. 20Abina wakalanga kwisule akumwiipusha ayi, “Sa ndiwe Asayelo?” Alakwe wakakumbula ayi, “Ee, ndime.”
21Mpeeke Abina wakamwaambila ayi, “Pambuka, ukonkele shilumamba umwi uli woonse akumunyaya shakulwanisha shoonse nshaacite.” Nakubi boobo Asayelo taakwe kupambuka, wakatolelela kumutandaanya. 22Abina wakamucenjesha alimwi ayi, “Pambuka webo we! Anu ulisunininshi ayi nkucaaye? Ono utooyeeya ayi inga twalangana buyani aJoabu mukwanu?” 23Sombi Asayelo wakayuminina kumutandaanya. Mpomunyaawo Abina wakawaala lisumo lya kwisule akumuyasa mulifumo. Mpeeke lyapula akumusana. Lyalo wakawa peenka apo wafwa. Basankwa bamwi boonse bakeemikana ndibakashika waawo pakawita Asayelo akufwa.
24Sombi Joabu aAbishayi bakatandaanya Abina. Mpeeke lisuba ndilyakalinga kuya cipila, bakashika paKalundu ka Ama pafwaafwi aGiya munshila iya kuluyanga lwa Gibyoni. 25Lyalo bashilumamba bene Benjameni bakayoboloka kuli Abina akupanga likoto lyomwi alimwi. Mpeeke bakeemikana peculu lya kalundu kamwi.
26Kuswawaawo Abina wakoolobesha kuli Joabu ayi, “Sa tunanoolwanabo lyoonse? Sa toobwene kwaamba ayi ici kumamanino cilaakukubicila? Anu ulaakukasha lili bashilumamba bako ayi bacileke kuya citandaanya bamakwababo?” 27Joabu wakakumbula ayi, “Bweenka mbocibete lushinisho ayi Mwaami Lesa ngumuumi, nootakwe kwaamba, naakwiinga bashilumamba aba batolelela kuya cimutandaanya kushikila ciilo macuunsa.” 28Mpomunyaawo Joabu wakalisha lupeenga. Lyalo bashilumamba abo boonse bakeemikana akucileka kuya citandaanya bene Isilaeli. Aboobo tabakwe kutolelela kubalwana.
29Mpeeke mashiku ayo oonse Abina abashilumamba bakwe bakeenda mucinyika cinene ca Joodani. Bakasubuka mulonga wa Joodani akweenda macuunsa oonse tibili abeene tyonkolo muMaanaimu.
30Lyalo alakwe Joabu wakapiluka kuswa mukutandaanya Abina akubunganya bashilumamba bakwe boonse. Mpeeke cakacanika ayi kukushako Asayelo bashilumamba bakwe Defedi batakalingaawo bakakwana likumi, bosanwe abone. 31Sombi bashilumamba bakwe Defedi bakacaya bashilumamba bakwe Abina bali 360 ba mumukowa wakwe Benjameni. 32Mubili wakwe Asayelo bakaubwesa akuya mukuubika kucuumbwe ca baishi kuBetileemu. Lyalo Joabu abashilumamba bakwe bakeenda mashiku oonse akushika kuEbuloni lisuba ndilyakalinga kuswa.
Currently Selected:
2 Samwelo 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.