2 Samwelo 4
4
Ishibosheti mbwaakacaikwa
1Ono Ishibosheti mwanaakwe Saulo ndyaakanyumfwa ayi Abina wakafwa muEbuloni, shakamumana nkusu, alimwi bene Isilaeli bakaloonda. 2Ishibosheti wakalinga kucite baana basankwa bobilo bakalinga bamatanjilili ba makoto abeshikuya cisaala. Pabaana abo, umwi wakalinga kwiitwa ayi Baana, umwi ayi Lekabu. Wakabashala nguLimoni mwine Biyaloti wa mumukowa wakwe Benjameni. Musena wa Biyaloti wakalinga kulangwa ayi ndubasu lumwi lwa cishi ca bene Benjameni, 3mukwiinga bene Biyaloti beene bakacicila kuGitaimu uko nkobabete baswamashi abobulya.
4Ono alakwe Jonasani mwanaakwe Saulo wakalinga kucite mwaana musankwa uyo wakalinga mulema myeendo. Wakalinga kucitebo myaaka yosanwe paciindi cikani cakwaamba ayi Saulo aJonasani bacaikwa ndicakashika kuswa kuJesiliilu. Mpeeke shikumulela wakamubwesa ayi aloboke. Sombi ndyaakalinga kulibambila calubilolubilo ayi anyamuke, mwaana uyo wakaloka, lyalo wakalemana. Liina lyakwe wakalinga nguMefibosheti.#2 Samwe 9:3
5Ono Lekabu aBaana, bana bakwe Limoni mwine Biyaloti, bakanyamuka akuya kuŋanda kuli Ishibosheti akupola uko lisuba kalili pafwaafwi kushika pakati ka mutwi. Ico ciindi Ishibosheti wakalinga muciindi cakookesha kwakwe kwa malumwi. 6Mwanakashi shikulindilila ŋanda wakalinga kupepeeta witi wakashinshila woona. Lyalo Lekabu aBaana mukwabo bakenjila cakuyubilila. 7Mpeeke basankwa abo bakenjila kucipinda kwakoona Ishibosheti ndyaakalinga kulete pabulo bwakwe. Ndibakamana kumuyasa akumucaya, bakatimbulako mutwi wakwe akuubwesa. Bakeenda mashiku oonse munshila iinda mucinyika ca Joodani. 8Mutwi wakwe Ishibosheti uyo bakaushisha kuli Defedi kuEbuloni akumwaambila ayi, “Ngu mutwi wakwe Ishibosheti mwanaakwe Saulo mulwani wako uyo wakalinga kusuni kukucaya. Nkambo nobaami, sunu Mwaami Lesa wamubooshelako cishole kuli Saulo abana bakwe.”
9Defedi wakakumbula Lekabu aBaana mukwabo, bana bakwe Limoni mwine Biyaloti ayi, “Bweenka mbocibete lushinisho ayi Mwaami Lesa ngumuumi, uyo wamfuna kuswa mumapensho oonse, 10musankwa umwi ndyaakesa mukundwiita ayi Saulo ulifwite, kaayeeya ayi waleta makani abotu, ndakamucata akumucaya kuSikilagi. Ico ncecilambu ncendakamupa pamakani akwe abotu!#2 Samwe 1:1-16 11Ino citokweela kuli pali ndimwe nobakapondobo, nomwakaya mukucaya muntu muŋanda yakwe, pabulo bwakwe alimwi utacite mulandu? Ee, ndyeelete kuboosha cishole cakucaya Ishibosheti, kwiinda mukumulobya amwebo ayi mutakabonekiwo tubili pacishi ca panshi!”
12Aboobo Defedi wakaambila bashilumamba ayi babacaaye. Mpeeke abalo bakabacaya. Bakabatimbula maansa ashimpanta akwaanjika mibili yabo kucisamu pafwaafwi acishiba ca muEbuloni. Sombi mutwi wakwe Ishibosheti bakaubwesa akuubika mucuumbwe cakwe Abina muEbuloni.
Currently Selected:
2 Samwelo 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.