1 Makabisi 5
5
BaJuda mbobakalwana abantu bakalinga kubambene abo
1Paciindi ceenka ico mishobo imwi njebakalinga kubambene abaJuda yakanyumfwa ayi Cipaililo cakulambilaawo bakaciyaka alimwi, bakabamba Ŋanda yakwe Lesa yaba bweenka mboyakalinga kataanshi, lyalo bakakalala abuumbi. 2Bakanyumfwana ayi banyonyoole bantu boonse balunyungu lwakwe Jakobo mbobakalinga kubambene abo. Lyalo bakatalika kucaya bantu akubanyonyoola.
3Ono Judasi wakatalika kulwana alunyungu lwakwe Isau ku Idumeya mucishi ca Akalabateni, uko bene Isilayeli nkobakapenshekwa. Wakabakoma akusaala buboni bwabo. 4Wakeebaluka kubisha kwa banabakwe Bayeni, abo bakalinga kunyengelela akuteya toonse bene Isilaeli, kunoobalindila munshila. 5Wakabacalila mumuumbu shabo, akushingulusha beshilumamba bakwe ndabala iyo yoonse, kwaamba ayi abanyonweete limwi. Wakatenta maanda alaamfu pantu pomwi aboonse bekalaamo. 6Pesule wakaya mukulwana abene Amoni. Kweenka uko wakacana likoto lyabeshilumamba bankusu bakalinga kutanjililwa a Timoti. 7Wakalwana aabo cankusu, wabakoma akubanyonweeta limwi. 8Ndyaakamana wakakoma ndabala ya Jasa pantu pomwi amishi yanjiyo, lyalo wakaboolela ku Juda.
Kulibambila nkondo sha ku Galili aGilyadi
9Bantu bamishobo imwi bakalinga kwikala mucishi ca Gilyadi bakabungana pantu pomwi, ayi baye bakalwane bene Isilaeli mucishi akubanyonyoola. Bene Isilaeli bakacica akuya mukuyuba kulubumbu lwaku Datema. 10Bamane batuma nkalata kuli Judasi abamakwabo yakwaamba ayi, “Bantu bamishobo imwi batushingulukite babungana pantu pomwi ayi batunyonyoole. 11Balibaambila ayi bese batunyaaye lubumbu ulo ndotwayubilaamo. Timoti ngo mutanjilili wabo. 12Aboobo amwise bwangu mutupulushe ayi batatunyonyooli, ceebo bamakwesu baanji bacaikwa kale. 13Bakwabesu boonse bakalinga kwikala mucishi ca Tobi bakacaikwa, banakashi abaana bakatola busha, alimwi buboni bwabo bakabusaala. Kweenka uko bakacaya bantu bali cuulu comwi.”
14Ciindi Judasi ndyaakalinga kubelenga nkalata iyo, beshinkombe bamwi bakaswa ku Galili bakashika, shakufwala shabo shakalinga kukwamookete. Bakaamba ayi, 15“Beshilumamba bene Pitolemaisi, abene Taya alimwi abene Sidoni bapaankana pantu pomwi abantu beensu bakuGalili ayi batunyonyoole.” 16Judasi abantu bakwe ndibakanyumfwa nkombe ishi, bakeeta libungano linene, kwaamba ayi banyumfwane ncobeelete kucita mukucafwa bamakwababo batoopenshekwa abalwani. 17Judasi wakalwiita mukwabo Simoni ayi, “Lisalile beshilumamba, muye mukapulushe bamakwabanu batoopenga ku ca Galili, nebo amukwesu Jonasani tutooya ku Gilyadi.” 18Kwalo ku Judasi wakashiya Josefe mwanaakwe Sakaliya alimwi aAsaliya mutanjilili wabantu, pantu pomwi abeshilumamba bamwi, ayi banoocinjilisha cishi ico. 19Wakabalwiita ayi, “Munoolama bantu aba, sombi mutakeeleshi kuya mukulwana abantu batashomi kushikila tukaboole.” 20Simoni wakamupa beshilumamba bali shuulu shotatwe ayi aye aabo kuGalili, lakwe Judasi wakabwesa bali shuulu shosanwe ashotatwe akuyaabo kuGilyadi.
Nyendo shakuGalili
21Lyalo Simoni wakaya kuGalili kweenka uko wakulwana nkondo abantu batashomi baanji akubapalanganya. 22Wakabatandaanya akuya mukushika kumwinjililo wa ndabala ya Pitolemaisi. Bantu batashomi bakacaikwa munkondo iyi bakalinga shuulu shotatwe lyalo baJuda bakasaala bubone bwabo. 23Bakabwesa baJuda bakalinga kukala kuGalili alimwi abanababo abuboni bwabo boonse. Bakaboolelaabo kuJuda kabakondetwe abuumbi.
24Paciindi ceenka ico Judasi Makabisi amukwabo Jonasani bakasubuka Mulonga wa Joodani, bakeenda nshiku shotatwe muluyanga. 25Bakakumana abene Nabate. Bakabatambula mbuli beshicibusababo, akubalwiita shoonse shakacitika kubamakwababo bekala kuGilyadi. 26Bakaamba ayi, “Baanji baJuda bakashingulukwa mumandabala aBosila, Bosoli, Alema, Kasifo, Makedi alimwi akuKanaimu, ndabala shinene shicite amuumbu. 27Bamwi bakashinguluka kundabala shimwi shaGilyadi. Lyalo balwanibabo bakalibambila kulwana ndabala isho bwaakuca, ayi bacaye bantu boonse bekalaamo pabushiku bomwi.”
28Lyalo Judasi alikoto lyakwe lyabeshilumamba bakasebesesha nshila iinda muluyanga akuya mukupolela kuBosila. Bakalwana nkondo akubwesa ndabala iyo, lyalo bakacaya basankwa boonse. 29Bakaswaako uko mashiku akweenda kuya mukushika kundabala yamuumbu ya Datema. 30Macuunsa, ndibwakaca, bakabona bantu baanji balinyamwite shitantilo ashilwanisho shankondo, ayi balwane baJuda bekala mundabala iyo bamana ibe mumaansaabo. 31Lakwe Judasi wakabona ayi nkondo yatalika kale, ceebo mundabala iyo mwakalinga kunyumfwika ciyobeyobe, kulila kwa mapeenga akuyobeka kwa bantu 32paceebo ceeco wakalwiita bantu bakwe ayi, “Sunu amulwane nkondo ceebo cabamakwabanu.” 33Lyalo wakabapasaanya beshilumamba bakwe mushipansha shotatwe, akuya cisena kubalwani pesule lyabo, akulisha mapeenga akupaila cakooloma. 34Beshilumamba bakwe Timoti ndibakeshiba ayi nguJudasi Makebisi bakacica, lakwe wakabacaya aboobo bantu bali 8,000 bakacaikwa munkondo iyo bushiku bweenka ubo.
35Kuswawaawo Judasi wakaya kundabala ya Alema, akubusha nkondo kweenka uko, wakabanyaya ndabala iyo. Wakacaya basankwa boonse wakasaala buboni bwabo boonse akutenta ndabala yabo. 36Kuswawaawo wakendilila akuya mukukoma ndabala shaba Kasifo, Makedi, Bosoli alimwi amandabala shimwi shine Gilyadi.
37Pesule lyasheeshi Timoti wakabunganya likoto alimwi lya beshilumamba, akuyaka misumba yankondo pafwaafwi aLafoni, petala lya kamulonga. 38Judasi wakatuma beshikweena likoto lilya, lyalo bakesa mukumulwiita ayi, “Bantu bamishobo imwi boonse batushingulukite bakapankana abeshilumamba bakwe Timoti, akupanga likoto linene abuumbi. 39Bakatamba bene Alabu ayi bese babacafwilishe kulwana nkondo iyi. Bakayaka misumba yabo petala lya kalonga kabalibambite kulwana awebo.” Peenka apo Judasi wakaya mukukumanaabo.
40Timoti wakaambila batanjilili bakwe ba nkondo ayi, “Na Judasi abeshilumamba bakwe batalike mbabo kusubuka kalonga, teeshi tubakoonshe, batotukoma. 41Sombi na aloonde kusubuka, lyalo ayake misumba yankondo petala lya kalonga, tutosubuka akuya mukukumanaakwe lyalo tutomukoma.” 42Judasi ndyaakashika pa kamulonga ako, wakabika beshilumamba muloombe lya kalonga, akubaambila ayi, “Mutasuminishi muntu nabi womwi kuyaka musumba wakwe kuno, sombi boonse baye kunkondo.” 43Ono wakatalikila lakwe kusubukila kubalwani bakwe, bantu bakwe boonse bakamukonkela. Wakabakoma balwani bakwe balya, lyalo bakasowa shilwanyo shabo akucicila ku misena nkobalambila tulesa kuKanaimu. 44Sombi Judasi wakeekoma ndabala iyo, wakatenta ŋanda ya tulesa twabo alimwi abaabo boonse bakalinga kwikalaamo. Aboobo bantu bakuKanaimu bakakomwa, bakaalilwa kulwana aJudasi.
45Pesule Judasi wakabunjika bene Isilaeli boonse bekala muGilyadi, ayi ababoshe ku Juda. 46Judasi wakabashisha bantu boonse abakuEfuloni. Yeenka iyi yakalinga ndabala inene walubumbu luyumu lwa mweela nshila. Cakalinga ciyumu kwiinda mweela cito bo kwiinda pakati kandabala iyo camana. 47Sombi bantu bamundabala iyo bakabacalila nshila shoonse akubika mabwe pamunjililo. Judasi wakatuma maswi a luumuno, kuli mbabo. 48Wakaamba ayi, “Swebo tulisunibo kwiindaamo mundabala yanu iyi, tutoboolela kumisheesu. Takuuwo weeshi acite cibiibi, tutokwiindabo.” Sombi balo bakakaka kumucalwita. 49Pomunyaawo Judasi wakalwiita bantu bakwe ayi bayake misumba penkaapo. 50Beshilumamba bakwe bakeemikana mumindando lyalo Judasi wakaamba ayi ndabala iyi bailwane. Bakalwana mashiku amalumwi, lyalo Lesa wakaaba ndabala iyi mumaansaabo. 51Bakacaya basankwa pankondo iyo, akusaala buboni bwabo boonse, ndyaakamana waipwayoola ndabala. Lyalo wakeenda pakati kandabala kaya cilyatoola mituntu ya balwani abo. 52Kuswawaawo wakasubuka Mulonga wa Joodani akuya mukushika kucinyika cinene kulubasu lwa Betishani. 53Judasi wakabaambila ayi beendeshe bantu abo bakalinga kucaalila mwisule akubacafwilisha palweendo lwabo loonse, lyalo bakashika ku cishi ca Juda. 54Bakatanta pakalundu ka Siyoni kabakondetwe, akusangalala, bakabenga milambu yakutenta, ceebo boonse bakaboolelabo kabotu, tabakwe kusowekelwawo nabi womwi mukwababo.
Babooshekwa kuJaminiya
55Ciindi Judasi aJonasani ndibakalinga kucishi ca Gilyadi, lakwe Simoni mukwabo wakalinga kucishi ca Galili kulubasu lwa kuPitolemaisi, 56Josefe, mwanaakwe Sakaliya, alimwi aAsaliya mutanjilili wabeshilumamba, bakanyumfwa shintu shinene babyaabo nshobakacita pa kulwana nkondo isho. 57Lyalo balo bakaamba ayi, “Aswebo katiya tupukishe meena esu, katiya tukalwane abantu bamishobo imwi abo mbotubambene abo.” 58Aboobo bakanyamuka amakoto abeshilumamba, bakaya mukulwana abene Jaminiya. 59Ono Gogiyasi wakaswa mundabala iyo abashilumamba bakwe ayi akakumane abo. 60Josefe aAsaliya bakakomwa, lyalo balwanibabo bakabatandaanya akuya mukubashisha ku manyinsa akuJuda. Bushiku bweenka ubo bakacaikwa bene Isilaeli bakalinga shuulu shobilo. 61Ncakwiila bene Isilaeli bakakomwa abuumbi ceebo tabakwe kumunyumfwila Judasi abamakwabo, balo bakalinga kuyeeya ayi balakonsha kucita shaankamiko shakupukisha meenaabo. 62Sombi tebakalinga mushobo wabantu abo Lesa mbakapa nkusu shakupulusha bene Isilaeli.
Bene Idumeya abene Filisiti mbubakakomwa
63Judasi abamakwabo bakalinga kucite bulemu bunene kubene Isilaeli alimwi akubantu bamishobo imwi abo bakanyumfwa mpuuwo yabo. 64Bantu bakalinga kubungana ayi babalumbishe. 65Pesule lyasheeshi Judasi abamakwabo bakaya mukulwana abeshikulu bakwe Esau, mucishi cakumalenge. Wakakoma Ebuloni a mishi ili pafwaafwi, wakapwayoola muumbu shanjiyo, akutenta maanda alaamfu ankondo kweenka uko. 66Kuswawaawo wakaya kucishi cabene Filisiti, kwiinda ku Malisa. 67Pabushiku bweenka ubo bapailishi bamwi bakacaikwa munkondo, ceebo bakalinga kusuni kulibonesha busankwa bwabo, bakaliwaala cakubula maano mukati munkondo. 68Lyalo Judasi wakaya kuAsotosi kucishi ca bene Filisiti. Wakapwayoola shipaililo shabo akutenta tulesa twabo. Ndyaakamana wakasaala buboni bwamandabala ayo, akuboolela kucishi ca Juda.
Currently Selected:
1 Makabisi 5: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.