1 Makabisi 4
4
Sha nkondo yaku Emausi
1Gogiyasi wakabwesa beshilumamba balwanina paanshi 5,000, abeshikutanta maaki cuulu comwi bacishi kulwana abuumbi, akuyaabo mashiku. 2Bakaya mukulwana baJuda, kabateengashiteewo. Beshikulindilila mbobakabatanjilila. 3Sombi Judasi ndyaakanyumfwa, wakaya abeshilumamba bakwe boonse mukulwana beshilumamba ba mwaami bakalinga ku Emausi. 4Paciindi ceenka ici likoto lya beshilumamba bakwe Gogiyasi tebakalingaako kumisumba yabo yankondo. 5Gogiyasi ndyaakashika ku misumba yankondo shabaJuda mashiku, taakwe kucanaako muntu nabi womwi. Lyalo wakatalika balangoola mutulundu, ceebo mumoyo wakwe wakayeeya ayi, baJuda batootucica.
6Macuunsa, Judasi wakapolela mucinyika abantu bakalinga shuulu shotatwe, sombi kabatacite shakufwala shakulwaninaamo nabi mipeeni ikwene, mbuli mbwakalinga kuyeeya lakwe. 7Wakabona misumba ya nkondo shabantu batashomi njiyumu ishingulukitwe a muumbu, lyalo beshilumamba balwanina pa maaki boonse bacishi kulwana nkondo, bakalinga kushingulukite. 8Sombi Judasi wakalwiita bantu bakwe ayi, “Mutaloondi kufula kwabo, mutafwi boowa batalika kutulwana. 9Kamwiibaluka bashalibesu mbobakapuluka ku Lweenge Lusalala ciindi Falawo ndyaakabakonkela abeshilumamba bakwe. 10Ono atusenge ku Mwaami Lesa kwiculu. Tusenge ayi atufwite nkumbu, eebaluke cipangano ncaakacita abamashalibesu. Ono Lesa anyonyoole likoto lya balwanibesu bali waano. 11Mboboobo bantu bamishobo imwi yoonse beshibe ayi paali ufuna akupulusha bene Isilaeli.”
12Mpomunyaawo bantu bakwe Gogiyasi balya ndibakalanga, bakabona baJuda batoosa mukubalwana. 13Lyalo bakaswa mumisumba yabo akwisa mukulwanaabo. Peenka apo Judasi a bantu bakwe bakalisha mapeenga akusena pafwaafwi. 14Bakatalika kulwana. Bamishobo imwi ilya bakakomwa kucicila kucinyika. 15Balwanibabo boonse bakacaala pesule bakacaikwa a mipeeni. Lyalo Judasi wakabakonkela akuya mukushika kuGesa, kushinyika sha Idumeya, Ashidodi alimwi akuJaminiya. Balwani bakacaikwa bakalinga shuulu shotatwe.
16Lyalo Judasi abeshilumamba bakwe bakacileka kubatandaanya bakaboolelaamo. Kuswa waawa Judasi wakalwiita bantu bakwe ayi, 17“Mutacicili shakusaala, pakwiinga koicili aimwi nkondo kunembo lyesu. 18Gogiyasi abeshilumamba bakwe bali kutulundu pafwaafwi aswebo. Ono amuyume mbuli basankwa, mubalwaane balwanibesu, lyalo conoono mulasaala buboni bwabo.” 19Judasi kacaamba, beshilumamba bamwi bakwe Gogiyasi bakaboneka kuswita kutulundu. 20Balo bakabona ayi babyaabo bakacica, ayalo misumba yabo yakalinga kupya, ceebo bakabona bwiishi kabuswita kweenka uko. 21Pakubona bwiishi ubo bakanyumfwa boowa abuumbi. Peenka apo bakabona beshilumamba bene Juda mucinyika kabalibambite kubalwana, 22lyalo boonse bakacicila kucishi ca bene Filisiti.
23Judasi abeshilumamba bakwe bakaboolela kumisumba ya nkondo shabalwani akusaala buboni bwabo. Bakabwesa golodi asilifa uunji uunji, shisani shifubela fubela ashisalala alimwi amaali maanji. 24Pakuboolela baJuda bakalinga kwiimba nyimbo shakulumbaisha akulemenesha Lesa. Bakalinga kwiimba ayi, “Lesa ngu mubotu, alimwi nkumbu shakwe shalyoonse alyoonse.” 25Aboobo bushiku ubo bwakalinga bwakupulushikwa kunene kwabene Isilaeli.
26Beshilumamba abo bakacica, bakaya mukumulwiita Lisiyasi isho shakacitika. 27Ndyaakanyumfwa makani aya, lakwe wakapenga mumoyo wakwe akubula nkusu, ceebo bene Isilaeli tabakwe kucana mapesho ayo ngakalinga kubayeeyela, alimwi shintu tashikwe kucitika mbuli mbwaakalinga aamba lakwe.
Judasi mbwakakoma Lisiyasi
28Kumatalikilo a caaka cakakonkelaawo, Lisiyasi wakabunjika beshilumamba balwanina paanshi bali 60,000 alimwi beshikulwanina pamaaki 5,000 ayi bakalwaane abaJuda. 29Bakanyamuka akuya ku Idumeya, bayaka misumba ya nkondo pafwaafwi aBetisuli. Alakwe Judasi wakesa abeshilumamba bakwe bakalinga shuulu likuli ayi akalwaane abo. 30Ndyaakabona likoto lyabeshilumamba lyabalwani liloondesha, Judasi wakatalika kupaila. Wakaamba ayi, “Ndiwe ulemekwa, webo mupulushi webene Isilaeli, ndiwe wakakoma mulwani ucite nkusu alyaansa lya musebenshi wako Defedi. Wakaaba mulikoto lyabeshilumamba bene Filisiti mumaansaakwe Jonasani, mwanaakwe Saulo, alimwi amumaansaakwe shikumunyamwita shakulwanisha. 31Ono bulya waabe likoto ili lyabeshilumamba mumaansa abantu bako bene Isilaeli, pakucita boobo, bantu aba babe ansoni pantu pomwi abeshilumamba balwanina paanshi abaabo balwanina pa maaki. 32Ubalenshe boowa, ubapotolole mukono, alimwi basebaane mukukomwa kwabo. 33Ubacaaye amupeeni wabantu bakusuni, kwaamba ayi boonse bakwishi balemeke liina lyako pakuno kwiimba nyimbo shakulumbaisha.”
34Kuswaswaawo bakatalika kulwana, lyalo beshilumamba 5,000 bakwe Lisiyasi bakacaikwa. 35Ndyaakabona kwaamba ayi beshilumamba bakwe bakomwa, alimwi bakeshiba kuyuma kwakwe Judasi abantu mbaakalingaabo, akubona ayi balilibambite kuba boomi nabi kufwa cabusankwa. Lisiyasi wakaboolela ku Antyoki kuya mukuyandoola beshilumamba baanji kwiinda bakataanshi ayi ese abo kucishi cabene Juda alimwi.
Judasi mbwaakasalasha Ŋanda yakwe Lesa
36Judasi abamakwabo bakaamba ayi, “Ono twabakoma balwanibesu. Katiya kuJelusalemu tukasalashe Ŋanda yakwe Lesa akwiipa cipya kuli Lesa.” 37Aboobo beshilumamba boonse bakabungana, akutanta kalundu kaSiyoni. 38Kweenka uko bakabona Ŋanda yakwe Lesa yakaba litongo, Cipaililo cakabishikwa shisasa shakapya. Bwiisu bwakamena palubansa anga muluundu nabi mutulundu. Shipinda shakoonaamo bapailishi shakapwayoolwa. 39Ndyeebakabona sheenka ishi bakakwamoona shakufwala shabo akulila abuumbi. Bakanana milota ku mitwi akufukama paanshi. 40Pesule lyasheeshi bakalisha mapeenga alimwi bakalilila Mwaami Lesa.
41Lyalo Judasi wakaambila likoto limwi lyabeshilumamba bakwe ayi bakalwane abantu bekala mulilinga lya kucinjilisha nkondo, kushikila lakwe wamanisha kusalasha Ŋanda yakwe Lesa. 42Wakasala bapailishi bacite buumi bubotu alimwi bakonkela milawo kabotu. 43Balo aba bakaisalasha Ŋanda yakwe Lesa akusowa mabwe oonse bantu batashomi ngobakasebensensha pakwiibisha. 44Pesule bakeepushanya ncebakonsha kucita a Cipaililo mpobapeta milambu yakutenta ico batashomi ncebakabisha. 45Lyalo bakayeeya kucipwaya Cipaililo ico, ceebo inga cabalensha nsoni, pakucana kwaamba ayi batashomi bakacibisha. 46Bakacipwayoola Cipaililo ico akubunjika mabwe pakalundu pamusena weelete kufwaafwi a Ŋanda yakwe Lesa, kushikila mulaluki akacanike weshi akabalwiite bwakwaacita mabwe ayo. 47Bamane bakabwesa mabwe atabesetwe akuyaka Cipaililo cimwi cipya kweelana aMulawo wakwe Lesa, pakukonkela buyake bwa Cipaililo cikulukulu. 48Bakabamba Ŋanda yakwe Lesa mukati, akwisalasha pansengwe poonse. 49Bakabumba nongo shakusebensesha pakulambila kupya, bakabikaamo muŊanda umo pakubika malampi, a Cipaililo pakutentela tununkila kabotu a tebulu. 50Bakabenga mulambu watununkila pacipaililo, akunyansha malampi ayi munooba mumuni mu Ŋanda yakwe Lesa! 51Bakabika cimaande patebulu, akushitilishaako shisani. Lyalo bakamanisha milimo yoonse njobakalinga kusuni kucita.
52Ono pabushiku bwa 25 mweenshi wasanu ayone, mweenshi wa Kisilefu, mumwaaka wa 148, bantu boonse bakabuka macuunsa cuunsa. 53Bakabenga mulambu wakutenta pacipaililo cipya, bweenka mbuli mbomulembetwe mulibuku lya milawo. 54Mumweenshi abushiku bweenka ciindi batashomi ndibakabisha Cipaililo nceciindi ceenka ico ndibakacipa kuli Lesa, kabeemba nyimbo shakulumbaisha akulisha tulumbu, mitolilo shisekele amalupenga. 55Bantu boonse bakafukamina paanshi, kulambila akulemenesha Lesa uyo wakalengesha ayi bakome.
56Bakasekelela cakupa Cipaililo kuli Lesa kwanshiku sosanwe a shotatwe. Bakabenga milambu yakutenta kabakondetwe, alimwi a milambu ya bwanabwakanshi ayakulumbaisha. 57Pesule lyasheeshi bakabotesha kunembo lyaŊanda yakwe Lesa a mishini yabwaami amayawo, shoonse ishi shakalinga shagolodi. Bamane, bakabamba minjililo ya Ŋanda yakwe Lesa ashipinda shabapailishi, kubikaako ashisasa. 58Bantu boonse bakasangalala, paceebo musebaanyo ngobakabacita batashomi wakamana.
59Judasi, abamakwabo pantu pomwi alibungano lyoonse lyabene Isilaeli ndibakanyumfwana, bakaamba ayi bushiku mbocakapekwa. Cipaililo kuli Lesa bunokwibalukwa cakusangalala akukondwa mwaaka uli woonse panshiku shosanwe ashotatwe, kutalikila bushiku bwa 25 mumweenshi wa Kisilefu.
60Ciindi ceenka ico bakayaka muumbu shilaamfu amaanda alaamfu ayumu kushinguluka kalundu ka Siyoni, kuyeeya ayi mpani batashomi inga besa alimwi mukunyonyoola Ŋanda yakwe Lesa, bweenka mbobakalinga bacita. 61Ono Judasi wakabikaamo likoto lya beshilumamba ayi banoolindilila. Wakayaka alimwi muumbu shakuncinjilisha ndabala ya Beti-sula, kwaamba ayi bantu bakwe babe andabala iyumu ilangene aya Idumeya.
Currently Selected:
1 Makabisi 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.