1 Makabisi 3
3
Judasi aMakabisi
1Judasi uyo wakalinga kwiitwa ayi Makabisi, mwanaakwe Matatiyasi, wakabwesa musena wabeeshi. 2Bamakwabo boonse bakalinga kumucafwa, pantu pomwi abaabo bakalinga kukonkela beeshi. Boonse aba bakalinga kulwana nkondo akucafwa bene Isilaeli kabakondetwe.
3Judasi eenka uyu nguwakaletela
bulemu bantu bamushobo wakwe.
Wakafwala shakufwala shaceela
shankondo akwaangilila shilwanyo
shankondo mucibuno cakwe.
Wakalinga kulwana nkondo,
akutabilisha misumba yakwe amupeeni.
4Wakalinga anga ninkalamu pasheesho nshaakalinga kucita,
anga ngumwaana nkalamu utoobuluma pakusotokela munyama
5wakalinga kukonkela akunooya
cibatandaanya bantu abo bakaka
kukonkela milawo yakwe Lesa
akubatenta mulilo boonse bakalinga
kupensha bantu bamushobo wakwe.
6Bantu bakaka kupaila calushinisho bakanyumfwa boowa,
akutalika kunoomucica.
Boonse bamucita shibi bakatutuma.
Lyaansa lyakwe lyakaboosha lupulusho lukwene.
7Pakusebensa milimo yakwe,
wakakalasha bamaami baanji,
sombi wakasangalasha mukowa
wakwe Jakobo.
Aboobo mpuuwo yakwe inanoolumbaishikwa lyoonse alyoonse.
8Wakendeenda mumandabala abene Juda,
kuya bunyonyoola boonse bakalinga
kukaka kupaila kwancinencine.
Paceebo ceeci Lesa wakalensha bukali bwakwe
ayi butalwiiti bene Isilaeli.
9Liina lyakwe lyakanyumfwika kushikila
akumeelelesho acishi capaanshi,
lyalo wakabunjika abo bakalinga basoweka.
Nkondo shakutaanguna shakwe Judasi Makabisi
10Apolonyasi wakabunjika beshilumamba baanji batashomi alimwi a likoto lya bantu bakaswa ku Samaliya, ayi bakalwane abene Isilaeli. 11Judasi ndyaakanyumfwa makani ayo, wakesa wakumanaakwe, lyalo wakamukoma, wamucaya. Balwanibabo baanji bakacaikwa, bamwi bakacica 12Bene Juda bakasaala buboni bwabo, lyalo Judasi wakabwesa mupeeni wakwe Apolonyasi akunoolwanisha nguwo munkondo mubuumi bwakwe boonse.
13Seloni, mutanjilili wabeshilumamba bene Silya, wakanyumfwa ayi Judasi wakabunjika likoto lyabantu bamushoma alimwi bacishi kulwana nkondo. 14Ono uyo Seloni wakaamba ayi, “Ndisuni kupanga liina kwaamaba ayi ncane bulemu mu cishi. Ntoolwanaakwe Judasi abantu bakwe abo basampoola milawo yamwaami.” 15Aboobo wakanyamuka alakwe, pantu pomwi alikoto linene lyabeshilumamba lya bantu bakasha kulambila kwancinencine bakesa mukuboosha cishole kubene Isilaeli. 16Bantu abo ndibakashika pa kalundu ka Beti Oloni, Judasi wakaya abantu baniini mukukumanaabo. 17Bantu bakwe Judasi ndibakabona likoto linene lyabeshilumamba lyashika pafwaafwi, bakamwiipusha ayi, “Ino swebo sobaniini inga twalwana buyani alikoto linene ili? Kunungaawo, tulilefukite abuumi, ceebo taaku ncotwalya sunu.” 18Lakwe Judasi wakakumbula ayi, “Kukoma likoto lya bantu baanji kubantu baniini ncintu cili pafwaafwi. Kuli Lesa kupulusha bantu baanji nabi baniini ncintu comwibo. 19Bantu tabakomi munkondo muceebo cakufula kwabeshilumamba mbobacite, sombi cankusu shiswa kuli Lesa. 20Balwanibesu aba batoosa mukutulwana kwiinda mukulisumpula amukusebaanya Lesa, ayi batunyonyoole swebo, abamakeesu, banabesu, alimwi akutunyaya shintu shesu shoonse. 21Sombi swebo tutoolwana nkondo ayi tupulushe buumi bwesu akufuna kulambila kwesu. 22Ncakwiila Lesa ulabanyonyoola swebo katulangilishabo. Aboobo mutafwi boowa ambabo, sobwe.”
23Ndyaakamanisha kwaamba boobo, wakatalika kumulwana Seloni pantu pomwi alikoto lyakwe, wakabanyonyeetabo limwi boonse. 24Wakabakonkela kutulundu twa Beti Oloni kushikila kucinyika. Wakacaya balwani bali myaanda makumi osanwe aotatwe, bakapuluka bakacicila kucishi cabene Filisiti. 25Aboobo mumisena yoonse ishingulukite, bantu bamishobo imwi bakatalika kuloonda Judasi abamakwabo, bakalinga kututuma akulefooka. 26Mwaami wakanyumfwa mpuuwo yakwe Judasi, alimwi bantu bamishobo imwi bakalinga kwaamba sha nkondo yakwe Judasi.
Mwaami mbwaatuma Lisiyasi
27Ndyaakanyumfwa sheenka ishi, mwaami Antyokusi wakakalala abuumbi. Lyalo wakapingula ayi abunjike beshilumamba bakwe mucishi cakwe coonse, kwaamba libe likoto linene. 28Ono wakacalula mwakubika buboni bwakwe, akupa beshilumamba malipilo a chaaka comwi. Wakabalwiita ayi balibambile kulwana nkondo kuli koonse. 29Mpomunyaawo wakabona ayi buboni bwakwe bwamana, alimwi musonko wa cishi cakwe wakaboola paanshi, ceebo cakupilinganishikwa amapesho ayo ngakaleta lakwe, pakukasha kukonkela milawo bantu njebakalinga kushibite kukonkela lyoonse. 30Lyalo wakatalika kunyumfwa boowa ayi utokwaalilwa kucana maali mbuli ayo ngakalinga kucite ka taanshi, akunokuulilako isho shasuni ayakuulila shipo shakalinga kupabo bantu, kwiinda bamaami bakalingaawo kwisule lyakwe. 31Wakapenshekwa abuumbi mumoyo wakwe pa makani aya, paceebo ceeci wakeeya kuya kuPesha, ayi akasonkeshe musonko ku misena yakooko, kwaamba ayi akacane maali maanji. 32Wakapa mulimo uyu mumaansaakwe Lisiyasi, muntu umwi ucite mpuuwo wamumukowa wa mwaami, kulela cishi, kutalikila ku mulonga wa Yufuletisi kuya mukushika kumanyinsa aIjipiti. 33Wakamupa mwanaakwe Antyokusi ayi anomwiisha kushikila akaboolele. 34Wakamupa alimwi cipaansa cabeshilumamba, pantu pomwi ansofu. Wakamupingwita ayi ulyeelete kucita shoonse sheshi akanooyeeya shabantu bakuJuda akuJelusalemu, 35Antyokusi wakalwiita Lisiyasi ayi akatume likoto lya beshilumamba kuya mukukumanaabo akubanyonyoola bene Isilaeli, abantu boonse bakacaala muJelusalemu, mpaka kushimingashila limwi liina lyabo. 36Wakamulwiita alimwi ayi akaleteleemo bantu beensu akubakalika mucishi ico, kubabaanya myuunda kwiinda mukuuma cisolo. 37Lyalo mwaami wapatula cipaansha cimwi ca likoto lya beshilumamba bakaswa ku Antyoki, ndabala yakwe inene, mucaaka ca 147, akusubuka mulongo wa Yufuletisi kwiinda kulubasu lya cishi cakumatwa.
Shakwe Gogiyasi aNikanoli
38Lisiyasi wakasala Pitolemi, mwanaakwe Dolimenesi, Nikanoli a Gogiyasi, bantu botatwe bayumu alimwi babye mwaami. 39Aba basankwa wakabatuma pantu pomwi abeshilumamba balwanina paanshi 40,000, beshikutanta pamaaki 7,000, ayi bakasaale cishi cabene Juda akucinyonyoola bweenka mbuli mwaami mbwakapingula. 40Balo bakaya abeshilumamba boonse, bakashika pafwaafwi andabala ya Emausi kucinyika, akuyaka misumba ya nkondo. 41Beshimakwebo amucishi ici ndibakanyumfwa makani aya, bakabwesa silifa agolodi uunji ancetani. Bakesaasho ku misumba yankondo yabalwani abo, ayi boole bene Silya aba kucishi cabene Filisiti bakapaankana pantu pomwi a likoto lya mwaami.
42Judasi abakwabo bakabona ayi mapesho abakomenena, alimwi ayi balwanibabo benjililalimwi mucishi cabo. Bakanyumfwa a mulawo wamwaami ayi banyonyoole akushiminganya mushobo wabene Isilaeli. 43Lyalo bakatalika kulwiitana ayi, “Katiya tubushe mushobo wesu wanyonyooka, lyalo tulwane nkondo kufuna mushobo wesu alimwi amusena usalalite.” 44Mpomunyaawo bantu boonse bakabungana ayi balibaambile kulwana, alimwi akupaila kusenga nkumbu shakwe Lesa.
45Jelusalemu taakalinga kucite bantu anga nduyanga,
te kwakalingaawo nabi womwi mwanaakwe
wakalinga kwinjilamo nabi kuswaamo.
Musena wakwe Usalalite wakalyatoolwa.
Beensu bakoonyaya maanda alaamfu ankondo,
lyalo bantu batashomi bakekala mweenka umo.
Tekwakalinga kusangalala kubene Isilaeli,
mitolilo atulumba shakacileka kunyumfwika.
Ba Juda mbobabungana kuMisipa
46Ba Juda bakabungana kuMisipa, kulangene andabala ya Jelusalemu, ceebo kalekale musena uyo wakalinga wakulambilaako bene Isilaeli. 47Pabushiku ubo bakalikasha kulya, bakafwala masaka, akulinanika milota pamitwi. Shakufwala bakashikwamoona kubonesha buumba mbobacite. 48Kwaamba ayi basalikwe ncebeelete kucita bweenka batashomi mbubakalinga kusonda kutulesa twabo, bakacalula libuku lya milawo. 49Bakeesa ashakufwala shabupailishi, shisepo shitaanshi kupya ashipo shalikumi, bakeeta ba Nasili abo bakalinga bamanisha nshiku shabo shobakashomesha. 50Lyalo bakapaila a maswi apeculu kuli Lesa ayi:
“Ino tubacite buyani
ba Nasili abo?
Tubatole kuli?
51Musena wako Isalalite
wakalyatoolwa akubishikwa,
bapailishi bako batoolilabo
balicite nsoni abuumbi.
52Bona, bantu bamishobo imwi
babungana ayi batunyonyoole.
Webo ulishi isho shobapangana kutucita.
53Ino swebo inga twalwanaabo buyani,
na webo wabula kutucafwa?”
54Lyalo bakalinga mapeenga,
mpeeke ciyobeyobe cinene.
55Pesule Judasi wakasala bamatanjilili babantu, bamwi mbeshikulangilisha makoto a bantu bakalinga shuulu, makoto abantu bakalinga myaanda, bamwi makumi osanwe, alimwi abantu likumi. 56Pakukonkela mulawo, wakalwiita abo bakaswa mukuyaka maanda onoono, abaabo bakaswa mukweeba aboobo bakaswa mukushanga minyasa alimwi aboonse abo bakalinga kucite boowa, ayi baboolele kumishaabo. 57Lyalo likoto lya beshilumamba lyakanyamuka akuya mukuyaka misumba ya nkondo ku malenge pafwaafwi andabala yaku Emausi. 58Judasi wakabalwiita ayi, “Amufwale sha nkondo akuliyumya. Mulibambile ayi macuunsa tukalwane a makoto abantu bamishobo imwi aba babungana ayi batunyonyoole pantu pomwi a musena wesu usalalite. 59Ceebo ncibotu kufwita munkondo, kwiinda kwaamba ayi tubone mapesho eshi akawiite mushobo wesu amusena wesu usalalite. 60Sombi shoonse shitoocitika bweenka mbwaasuni Lesa.”
Currently Selected:
1 Makabisi 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.