1 Makabisi 2
2
Kushomeka wakwe Motatiyasi
1Paciindi ceenka ico mupailishi umwi liina lyakwe ngu Mataityasi, mwanaakwe Joni, mwishikulu wakwe Simyoni, mupailishi wamumukowa wakwe Jeoyalibu, wakaswa kuJelusalemu, akuya mukwikala kuModeyini. 2Matatiyasi wakalinga kucite baana basankwa bosanwe. Meenaabo ngaya: Joni uyo wakalinga kwiitwa ayi Gadi, 3Simoni uyo wakalinga kwiitwa ayi Tasi, 4Judasi uyo wakalinga kwiitwa ayi Makabisi, 5Elyasa uyo wakalinga kwiitwa ayi Afalani alimwi a Jonasani uyo wakalinga kwiitwa ayi Afusi.
6Matatiyasi wakashibona shibiibi shakusebaanya Lesa isho shakalinga kucitika ku Juda alimwi akuJelusalemu. 7Lyalo wakaamba ayi,
“Maawe nebo! Ndakashalilwanshi ayi
mbone kunyonyoolwa kwamushobo wangu
alimwi andabala isalalite?
Sa nebo kaalebo kaangu mwiite,
ciindi ndabala kaitolwa kubalwani,
ayalo Ŋanda yakwe Lesa ili
mumaansa abantu batashomi?
8Ŋanda yakwe Lesa yaba anga
ngumuntu utacite bulemu.
9Nongo shanjiyo sheebeka
bakashibwesa anga shakusaala.
Banabakwe bakabacaila munshila.
Bacikula bwangu bakacaikwa abalwani munkondo.
10Sa nkooli mushobo womwi wabantu
uyo utakwe kubwesaako cipaansha
cabwaami bwanguwo alimwi akusaala
buboni?
11Bakabwesa shintu shibotu shoonse.
Wakalinga kulilela, sombi ono wasanduka busha.
12Ŋanda yakulambilaamo Lesa,
ibotu abuumbi alimwi icite bulemu, yaba litongo,
bantu batashomi bakaibisha.
13Ino ono swebo tukalilenshi abuumi?”
14Mpomunyaawo Matatiyasi abanabakwe bakakwamoona shakufwala shabo akufwala masaka. Lyalo bakalila abuumbi.
15Bushiku bumwi beshilumamba bamwaami beshikukakatisha bantu kucileka kulambila Lesa wabo, bakesa kundabala ya Modeyini ayi bakakatishe bantu kupa mukutula milambu yakutenta kutulesa. 16Bene Isilaeli baanji bakabunganaabo, sombi Matatiyasi abanabakwe bakeemikana palubasu. 17Beshilumamba bamwaami Antyokusi bakalwiita Matatiyasi ayi, “Webo ndiwe mutanjilili alimwi muntu ucite mpuuwo ankusu mundabala ino, banabako abeshikamukowa wako boonse bali pesule lyako. 18Utalike webo kukonkela mulawo wamwaami, bweenka mbuli mishobo imwi yabantu mboyacita, alimwi ambuli mbubacita batanjilili bene Juda pantu pomwi a bantu bakacaala muJelusalemu. Paceebo ceeco webo abanabako mulaakuba beshicibusa ba mwaami. Ulaakumulemenesha mukumupa golodi, silifa alimwi a shipo shimwi shiinji.”
19Peenka apo Matatiyasi wakakumbula aliswi lyapeculu ayi, “Nabi bantu bamishobo imwi yoonse, abo balelwa amwaami, balamunyumfwila akucileka kulambila mbuli bamashalibabo, akutalika kukonkela mulawo wakwe, 20nebo neenka, banabangu alimwi abakwesu, tulalama cipangano cabashalibesu.
21Lesa ulatucafwa kwaamba
ayi tutaleeki kukonkela Milawo yakwe.
22Teshi tunyumfwile kupingula kwa mwaami.
Teshi tucileekeewo kulambila
kwesu napaceyi kuleyela kulyaansa
lyalulyo nabi lyacipiko.”
23Ndyaakamana kwaamba ici,
muJuda umwi wakesa weemikana panembo,
bantu boonse kabalangilisha,
ayi ape mulambu pa cipaililo cine Modeyini,
pakusuna kukonkela mulawo wa mwaami.
24Matatiyasi wakakalala abuumbi
ndyaakamubona muntu uyo.
Lyalo wakatalika kututuma kubukali bululeme.
Wakamusotokela muntu uyo akumucaila
peenka pacipaililo.
25Ciindi ceenka ico wakacaya
munene wakalinga kukakatisha
kutula milambu, ndyaakamana
wakacipwayoola cipaililo.
26Muceebo cakusuna kukonkela
Milawo yakwe Lesa Matatiyasi
cakacitila sheenkeeshi,
bweenka mbuli mbwaakacita Fineyasi,
kucaya Simuli, mwanaakwe Salu.
Matatiyasi mbwaakalwana nkondo
27Pesule lyasheeshi Matatiyasi
wakalinga kuya caambilisha mundabala iyo ayi,
“Uliwoonse ushinishe kulama
cipangano a milawo yakwe Lesa ese akonkele.”
28Mpomunyaawo Matatiyasi abanakabwe bakacicila kutulundu, akushiya shoonse nshebakalinga kucite mundabala iyo.
29Paciindi ceenka ico bene Juda baanji bakalinga kusuni kulama kulambila kwabo mubululami, bakaya mukwikala muluyanga. 30Bakaya pantu pomwi abanababo, bamakaabo, alimwi ashifubwa shabo, ceebo mapesho abo akafula. 31Makani aya akashika kubatanjilili babeshilumamba ba mwaami alimwi akulikoto lyabeshilumamba lyakalinga kuJelusalemu, ndabala yakwe Defedi. Bakanyumfwa ayi bantu bamwi bakakaka kukonkela milawo yamwaami, bakacicila muluyanga kuya mukuyuba. 32Peenka apo beshilumamba baanji bakanyamuka akubakonkela cakufwambaana. Ndyebakabacana, bakayaka misumba ya nkondo kelangene ambabo, akulibambila kubalwana mubushiku bwa Cibelu. 33Bakoolobesha ayi, “Ciindi kocicili, amuswe, munyumfwile milawo ya mwaami, lyalo mutooba abuumi.” 34Ba Juda balya bakakumbula ayi, “Sobwe, swebo teshi tusweewo, teshi tukonkele milawo ya mwaami nabi kubisha bushiku bwa Cibelu.” 35Mpeeke apo beshilumamba bakatalika kubalwana bene Isilaeli. 36Sombi bene Isilaeli tabakwe kubaboosheshaamo, tabakwe kubawaala mabwe, nabi kuya mukucala kuminjililo ya shimfwengo shabo. 37Balo bakaambabo ayi, “Swebo soonse mutootucayabo pataapu mulandu, tatuciteewo cibiibi cili coonse, kwiculu a cishi ca paanshi mbobakambonibesu.” 38Sombi balo bakabalwana bushiku bwa Cibelu, kubacaya boonse, bakaabo, banababo alimwi ashifubwa shabo. Bantu aba bakalinga kukumana cuulu comwi.
39Matatiyasi ababye ndibakanyumfwa sheeka ishi, bakabalila abuumbi. 40Bakalwiitana ayi, “Swebo natucite mbuli bamakwesu aba shobacita, tubule kulwana nkondo abantu aba bamishobo imwi ayi tufune buumi bwesu amilawo yesu alimwi abwikaalo bwesu, nkokwaamba ayi batootunyonyweetabo limwi pacishi ca paanshi.” 41Lyalo bushiku ubo bakanyumfwana ayi, “Muntu uli woonse weshi akatulwaane nabi pabushiku bwa Cibelu, tukalwaane anguwe, tutaloobi soonsebo bweenka mbubakaloba bakwesu balya bakalinga mushifwengo.”
42Bamukowa wakwe Asida bakapaankana. Bakalinga bene Isilaeli bayumu alimwi basuni kucinjilisha milawo. 43Boonse bakacica mapesho bakapaankana ambabo, akufusha likoto lyabo. 44Ndibakabunjika likoto lyabo lyabeshilumamba, bakacaya benemishaabo bamucita shibi mubukali abaabo boonse bakacileka kulambila cancinencine. Abo bakapuluka bakacicila kubantu batashomi ayi babafuune.
45Matatiyasi pantu pomwi ababye bakaya bashinguluka cishi, kwaamba ayi bapwayoole shipaililo shabatashomi. 46Bakapalula baana boonse mbobakacana kabatapalitwe mucishi ca bene Isilaeli. 47Bakatandaanya balwanibabo bamusebaanya, alimwi milimo yabo iyi yakaswitilila. 48Bakacinjilisha milawo yabo ayi itasampoolwi abantu bamishobo imwi abamaami balya, alimwi tabakwe kusuminisha ayi batashomi banoosampoola milawo yabo.
Matatiyasi wabula banabakwe
49Matatiyasi ndyaakabona ayi uli pafwaafwi kufwa, wakalwiita banabakwe ayi, “Kulisumpula amusebaanya shitooya bukomena, kutondesha ayi cino nciindi camapesho akupatana kunene. 50Ono mwebo nobanabangu, amuboneshe kwaamba ayi mutookonkela milawo, mwaabe buumi bwanu ceebo cacipangano cabamashali banu.
51Amwibaluke milimo bashali banu
iyo njobakacita pa mashalane abo,
lyalo mulakuba abulemu bunene ampuuwo walyoonse alyoonse.
52Sa tamubwene ayi Abulaamu wakacanika
ayi ulashomeka ndyaakeleshekwa?
Te wakacanika uliluleme ceebo
ceebo cakunyumfwila kwakwe?
53Alakwe Josefe, ciindi camapesho akwe, wakakonkela mulawo,
wakaba munene akulama bene Ijipiti.
54Fineyasi mushali wesu,
wakatambula cishomesho cabupailishi butamaani
ceebo cakusunishisha Lesa.
55Alakwe Joshuwa, pakucana ayi wakasebensa
milimo yakwe akwiimanisha,
wakaba moomboloshi wabene Isilaeli.
56Alakwe Kalebi wakapekwa cipaansha cakwe ca cishi,
ceebo wakapa bukamboni bwancinencine pa libungano.
57Alakwe Defedi, ceebo cakushomeka kwakutaboola pesule,
wakapekwa cuuna cabwaami bwalyoonse alyoonse.
58Alakwe Elija, ceebo cakusuna kukonkela milawo,
wakatolwa kwiculu.
59Ananiya, Asaliya kubikaawo alimwi
aMishaeli bakapulushikwa mu cibili camulilo,
ceebo cakushoma Lesa.
60Danyele wakalinga kucita buumi bululeme,
paceebo ceeci wakafunwa kumeeno ankalamu.
61“Ono mushibishishe ayi mumashalane oonse,
mumashalane omwi awomwi,
bantu bashoma Lesa teshi bakalefukeewo.
62Mutaloondi maswi amuntu mubiibi ulya,
ceebo bulemu bwakwe bulaakuba bufumba amapila.
63Sunu ulalisumpula,
mancuunsa teshi akabonekeewo,
ceebo waboolela kubulongo,
lyalo shoonse nshatoopinga shamanina limwi.
64Ono mwebo nobanabangu,
mube bayumu pakukonkela milawo,
paceebo mulaakucana bulemu.
65“Amubone Simoni mukwabanu.
Ndishi kwaamba ayi ulicite maano akulwiita bamwi.
Muno munyumfwila ciindi coonse,
pakwiinga utooba anga mbeeshiwanu.
66Judasi Makabaeyasi ngu muntu
muyumu kuswitabo kubwanike bwakwe.
Lakwe uyu abe mutanjilili wa likoto lyabeshilumamba,
anoolwana abantu bamishobo imwi.
67Musenkane pantu pomwi abaabo
boonse bakonkela milawo yakwe Lesa,
lyalo mubooshe cishole kuli boonse
bapensha mushobo wanu.
68Mubaboosheshe batashomi isho shobakamucitila,
lyalo mubike maano kukonkela milawo.”
69Ndyaakamana kwaamba boobo, Matatiyasi wakapa coolwe banabakwe, pesule wakafwa. 70Wakafwa mumwaaka wa 146. Lyalo banabakwe bakamubika pafwaafwi pakoona bashali bakwe kundabala ya Modeyini.
Currently Selected:
1 Makabisi 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.