1 Makabisi 13
13
Simoni mbwaakapekwa bweendeleshi
1Simoni wakanyumfwa ayi Tilayifo wabunganya likoto linene lyabeshilumamba, ayi ese alwane cishi caJuda. 2Wakabona ayi bantu batooloonda akutalika kututuma, aboobo wakaya kuJelusalemu, akubunjika bantu. 3Wakabancenjesha ayi, “Mulishishi shoonse isho nebo abakwesu shotwakacita ceebo camilawo aŋanda yesu yakulambilaamo. Mulishishi nkondo amapesho ayo ngotwakeendaamo. 4Ndalangilisha boonse bamakwesu bakafwita bene Isilayeli, ncakwaamba ayi nebo ndacaalabo neenka. 5Aboobo nebo shitoyeeya kupulusha buumi bwangu muciindi camapesho aya, ceebo nshishi mubotu kwiinda bakwesu. 6Sombi ntoboosha cishole ceebo ca shibiibi isho shakacitila mushobo wangu, Ŋanda yesu yakulambilaamo, alimwi abakwesu abanabesu, kucana kwaamba ayi bantu bamishobo imwi babungana ayi batunyonyoole ceebo balitupatite.”
7Bantu ndibakanyumfwa maswi aya boowa bwakamana. 8Aboobo bakakumbula amaswi apeculu ayi, “Mutanjilili wesu ndiwebo weenka camana mumusena wakwe Judasi amukwanu Jonasani. 9Kotulwanina nkondo shesu, lyalo shoonse sheshi unokwaamba tunooshicita.” 10Lyalo Simoni wakabunganya beshilumamba boonse. Wakafwa mbaana kumanisha kuyaka muumbu yaku Jelusalemu, akwiyumya mukuyaka shitabilisho mbasu shoonse. 11Kuswawaawo wakatuma Jonasani, mwanaakwe Abisalomu, kuJopa, pantu pomwi abeshilumamba bacishi kulwana. Lakwe wakatandaanya beshilumamba abo bakalinga kwikala mundabala iyo, lyalo wakekalaamo.
Simoni mbwaakatandaanya Tilayifo
12Tilayifo wakaswa kuPitolemaisi pantu pomwi abeshilumamba bakwe baanji, ayi akalwane cishi caJuda. Wakabwesa a Jonasani kaangitwe. 13Lakwe Simoni wakesa mukuyaka musumba yakwe yankondo ku Adida kailangene acinyika. 14Tilayifo wakanyumfwa ayi Simoni ngomutanjilili mumusena wamukwabo Jonasani, alimwi ulipafwaafwi kutalika kulwana anguwe. Lyalo wakamutumina nkombe akumwaambila ayi, 15“Mukwanu Jonasani twakamwaanga ceebo taakwe kulipila musonko wa mwaami mumaali ngakacana pakusebensa milimo yakwe. 16Ono bulya webo utume uno kweenka makilogilamu 3,000 asilifa, pantu pomwi abanabakwe bobilo shankole ayi tushinishe ayi teshi akatubukile. Namucite boobo tutomwaangulula.”
17Simoni wakanyumfwa kabotu akwishiba ayi maswi ayo nga kubeca. Sombi wakatuma maali abaana bobilo abo, kuloonda ayi bantu inga bamupata akutalika kwaamba ayi, 18“Jonasani wacaikwa ceebo Simoni taakwe kutuma maali ayo abaana.” 19Aboobo wakatuma baana bobilo a makilogilamu 3,000 alya. Sombi Tilayifo wakapwaya cipangano, taakwe kumwaangulula Jonasani.
20Ndishakamana ishi, Talayifo wakesa ayi alwane cishi ico akucinyonyoola. Wakeenda cakushinguluka, akwiinda nshila ya kuAdola sombi Simoni abeshilumamba bakwe bakalinga kweenda kabaya cimukonkela kuli koonse kwakalinga kuya. 21Beshilumamba balya bekala mu cicinjilisho cankondo cakuJelusalemu, bakamutumina nkombe Tilayifo yakumulwiita ayi ese bwangu pakusebesesha nshila yamuluyanga, alimwi ayi abatumine cakulya. 22Tilayifo wakabamba beshilumamba balwanina pa maaki ayi bakashikeeko, sombi pabushiku ubo kwakaloka caandwa cinene, cakwaamba ayi cakaala kuyako ceebo cacaandwa ico. Lyalo bakaswaako akuya kuGilyadi.
Tilayifo mbwaakacaya Jonasani
23Ndyaakashika pafwaafwi akuBasikama, Tilayifo wakacaya Jonasani, akumubika kweenka uko. 24Ndyaakamana wakaswaako akuboolela kucishi cinemishaabo.
25Ono Simoni wakatuma bantu ayi baye bakabwese shifuwa shamukwabo Jonasani, lyalo wakashibika ku Modeyini ndabala ya bashali bakwe. 26Bene Isilaeli boonse bakaba abuumba bunene lyalo bakamulila nshiku shiinji. 27Pashuumbwe shabashali bakwe ashabakwabo Simoni wakabumba cibumbwabumbwa cilaamfu cakalinga kuboneka palaale, ca mabwe abekabeka kunembo akwisule lyacico. 28Wakemika mabwe osanwe aobilo kalangene, limwi ndyabeeshi, limwi ndyabanyina, amwi ngabamakwabo bone. 29Wakaicatisha amacincilo malamfu. Pamacincilo ayo wakabika shakubesa shakalinga kubonesha shilwanyo, shibe cakwibalukilaawo citamaani. Pafwaafwi ashilwanyo isho wakabika cakubesa cibonesha maato, ayi bantu beendela mulweenge abalo banobonana. 30Mbocibete ubo cuumbwe ncakayaka kuModeyini, alimwi nkocicili asunu.
Mwaami Demetiliyasi wanyumfwana abaJuda
31Tilayifo wakaya camaano akucaya mwaami cikula bwangu, Antyokusi, 32Wakaba mwaami mumusena wake, wakafwala mushini wabwaami bwakuAsiya, lyalo wakapensha cishi ico abuumbi. 33Simoni wakayaka alimwi muumbu shankondo kuJuda, akuyaka shaanda shilaamfu amakonko alaamfu ashisasa shakucalisha ampingilo. Wakabikaamo shakulya. 34Kuswawaawo wakasala bantu, akubatuma ku mwaami Demetiliyasi mukusenga ayi alekelele baJuda kubeenga misonko, ceebo camicito yakwe Tilayifo uyo wakalinga kuya bunyayabo bantu shintu. 35Mwaami Demetiliyasi wakamulembela nkalata akumukumbula bobulya:
36“Ndime mwaami Demetiliyasi, ntokwaansha webo Simoni, Mupailishi Munene alimwi shibucibusa wabamaami, alimwi abacinenenene ba mushobo woonse wabaJuda. 37Ndatambula cakukondwa mushini wabwaami wa golodi alimwi alilala lya golodi, ilyo ndiwatumina. Ono tulisuni kupangana amwebo sha luumuno lwancinencine akulembela beshikusonkeshabesu ayi abacileeke kubasonkesha baJuda. 38Shoonse shotwakapangana andimwe, shilyeelete kubaawo. Muumbu shankondo shomwakayaka shibe shanu. 39Twamulekelela shibiibi shoonse shomwakatucitila kushikila sunu, alimwi amaali oonse agolodi ayo ngo mwakalinga kweelete kupa nebo. Na bacisonkesha alimwi kuJelusalemu, bacileeke. 40Na bamwi muli ndimwe balyeelete kulembwa mulikoto lyesu lyabeshilumamba, babalembe, lyalo kube luumuno pakati kesu.”
41Aboobo mumwaaka wa 170, bene Isilaeli bakaangululwa kuswa kubulelo bwa mishobo imwi yabantu. 42Lyalo bantu bakatalika kulemba mumakalata amumapepala amwi shipango shabo amaswi akwaamba ayi, “Mwaaka utaanshi wakwe Simoni, uyo uli ngo Mupailishi Munene, mutanjilili wabeshilumamba aba Juda boonse.”
Simoni mbwaakabanyaya Gesa
43Munshiku sheenka isho Simoni wakaya mukuyaka misumba yakwe yankondo kufwaafwi andabala yakuGesa akutalika kwilwana. Wakapanga shilwanyo shinene shankondo, akushileta kufwaafwi a ndabala. Wakapwayoola ŋanda ilaamfu yankondo yakaba mumaansaakwe. 44Abo bakalinga mushilwanyo umo bakasotokela mundabala, akufulunganya ndabala yoonse. 45Basankwa bekala mundabala umo, bakaabo abanababo, bakatanta peculu pa muumbu, akukwamoona shakufwala shabo akusenga Simoni a maswi apeculu ayi kube luumuno. 46Bakasenga ayi, “Mutatucitili cili coonse pakulangilisha shibiibi shesu, sombi pakukonkela nkumbu shanu.” 47Lyalo Simoni wakabalekelela, wakacileka kubalwana. Sombi wakabakusha bantu mundabala umo, wakasalasha ŋanda yakalinga kucite tulesa. Wakanjila mundabala iyo abantu bakwe kabaya ciimba nyimbo shakulumbaisha akulumbaanya Lesa. 48Ndyaakamanisha kukusha shibiibi shoonse mundabala iyo wakakalikaamo bantu bakonkela milawo yakwe Lesa. Kuswawaawo wakeeyumya, akuyaka ŋanda yakwe mweenka umo.
49Bantu balya bakalinga kwikala mucitabilisho kuJelusalemu bakapenga ansala. Bamwi bakafwa, ceebo cakalinga kwaala kuswaamo ayi baye bakacite makwebo ali oonse. 50Lyalo bakasenga Simoni ayi abanyumfwile nkumbu kumwi kabalila ayi kube luumuno, lakwe wakasumina. Sombi wakabakusha mucicinjilisho, weesalasha kwiinda mukukushaamo shibiibi shoonse. 51Bene Juda bakenjilaamo pabushiku bwa 23 mumweenshi wabili mumwaaka wa 171. Bakenjila kabaya ciimba nyimbo shakulumba, kabanyamwite amalala mumaansa. Bakalinga kulisha tulumbu, misebe atunkobele, akwiimba nyimbo shakukondwa ceebo mulwani munene wakatandanishikwa mucishi cabene Isilaeli. 52Simoni wakapingula ayi bushiku ubo banoobwibaluka mwaaka uli woonse bube bwakusekelela. Wakayumyayumya muumbu yaku kalundu uko kwebetele Ŋanda yakwe Lesa, keelangene acicinjilisho ca nkondo cilya, amane wakekala kweenka uko abantu bakwe. 53Lyalo Simoni ndyaakabona ayi mwanaakwe Joni wakula, wakamupa nkusu shakutanjilila beshilumamba boonse. Joni wakalinga kwikala kuGesa.
Currently Selected:
1 Makabisi 13: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.