1 Makabisi 12
12
Jonasani mbwaakatuma nkombe ku Loma akuSipata
1Jonasani wakeshiba ayi shintu shitoomweendela kabotu. Aboobo wakasala bantu bamwi, akubatuma kuLoma ayi akayumye akushipye kunyumfwana kwa baJuda abaLoma. 2Wakabatuma abamwi kuSipata alimwi akushishi shimwi wakatuma makalata aamba sheenka ishi. 3Bantu aba bakaya kuLoma, bakanjila mulibungano lya bacinenenene lyalo bakaamba ayi, “Jonasani Mupailishi Munene, pantu pomwi abacinenenene bamushobo waba Juda, batutuma ayi twise tutalikishe cibusa alunyumfwano, bweenka mbucakalinga kataanshi.” 4Lyalo bacinenenene bakuLoma bakapa makalata akutola kubacinenenene bakumusena yoonse uko kobakalinga keelete kwiindako, ayi pakucita boobo bakashike muluumuno kucishi caJuda.
5Ngaya maswi Jonasani ngakalembela bene Sipata:
6“Ndime Jonasani Mupailishi Munene, abacinenenene babaJuda, bapailishi abene Juda bamwi, tutomwaansha bakwesu nobene Sipata. 7Paciindi cakalekale Aliyusi, uyo wakalinga womwi mubaami banu, wakatumina Onyasi, Mupailishi Munene wabantubesu, nkalata yakwaamba ayi muli beshicibusabesu. Yakalinga anga ninkalata iyo njetwaletelela. 8Onyasi wakamutambula kabotu akumupa bulemu muntu ngo mwakatuma, akusumina maswi amunkalata iyo, akalinga kwaamba shalunyumfwano alimwi shabucibusa. 9Lushinisho ndwakwaamba ayi tatusowekelwiiwo nabi comwi mulisheesho, pakucana kwaamba ayi tulicite mabuku asalalite atuyumya. 10Nakubi boobo twakayeeya kutuma bantu kuli ndimwe, kwisa mukutalikisha cibusa cesu, ayi tutaboneki anga mbeensu kuli ndimwe. Twabona ayi peenda ciindi cilaamfu kuswa bushiku mbomwakatuma bantu banu. 11Ono cindi coonse tulamwibaluka munshiku shakusekelela anshiku shimwi shisalalite, alimwi andyetubenga milambu yesu apakupaila, bweenka mbokweelete pakwiibaluka bamakwabesu. 12Tulikondetwe abulemu bwanu. 13Sombi swebo twekala katupenga ankondo shiinji shitatukaliki kabotu, ceebo bamaami batushingulukite balatulwana ciindi coonse. 14Nacibi boobo pakati kankondo ishi tatukwe kusuna kumupensha, mwebo nabi bamwi mbotunyumfwaanabo. 15Mukwiinga tulacana lucafwo kuswa kwiculu, aboobo twakapulushikwa kubalwanibesu, lyalo bakakomwa. 16Nceceeco twakasala Nyumenyasi, mwanaakwe Antyokusi aAntipate, mwanaakwe Jasoni, akubatuma kuLoma ayi tupangane alimwi cibusa alunyumfwano mbuli mbocakalinga kataanshi. 17Lyalo twakabaambila ayi beendile akumishaanu, akumupa mooni ankalata iyi yakushinisha cibusa cesu. 18Ono bulya tutoosenga ayi mukumbule nkalata iyi.
19Ngaya maswi ankalata iyo bene Sipata njakabatumina Onyasi: 20“Ndime Aliyusi, mwaami wabene Sipata, ndakwaansha Onyasi, Mupailishi Munene waboonse. 21Bamwi kuno bakacana mulibuku limwi maswi aamba ayi swebo sobene Sipata amwebo nobaJuda tulibamukowa, alimwi ayi soonse tuli lunyungu lwakwe Abulaamu. 22Ono ndyetwashiba sheenka ishi, mulakucita kabotu na mwatulembela akutulwiita mbuli mbomushiite kumishanu uko. 23Swebo kuno tutomulembela ayi shifubwa shanu abuboni bwanu nshesu, ashalo shesu nshanu. Twaamba ayi bankombebesu bamwishibishe makani ayo.”
Mbobakalwana aDemetiliyasi munkondo imwi
24Bamwi bantu bakalwiita Jonasani ayi batanjilili babeshilumamba bakwe Demetiliyasi bakese a likoto lyabeshilumamba linene kwiinda lyakataanshi lilya, ayi balwane anguwe. 25Ndyaakanyumfwa makani aya, Jonasani wakanyamuka kuswa kuJelusalemu, akuya mukukumana abo kucishi ca Amati, kutabapa ciindi cakwaamba ayi benjile kabalwana mucishi cakwe. 26Wakatuma bashikweena kumisumba yabo ya nkondo, lyalo ndibakaboolako, bakamushibisha ayi balwani batoolibaambila kulwana baJuda mashiku. 27Lisuba ndilyakepila, Jonasani wakaambila beshilumamba bakwe ayi balibaambile akucata shilwanyo shabo mumaansa, mashiku oonse bekale kabalibambite kulwana. Lyalo wakabika beshikulindilila, kushinguluka misumba yabo. 28Sombi balwani ndibakanyumfwa ayi Jonasani abantu bakwe balibambila kulwana, bakaba aboowa, bakatalika kututuma. Lyalo bakakunkabo mulilo mumisumba yabo, bamana kucica. 29Jonasani abantu bakwe tabakwe kwishiba cakacitika kushikila macuunsa, ceebo bakalinga kubona mulilo kauyaka. 30Nabi Jonasani wakabakonkela, taakwe kubacana, ceebo balo bakalinga basubuka kale Mulonga wa Eleyutelusi. 31Mpomunyaawo Jonasani wakasandukila baAlabu bakalinga kwiitwa ayi beneSabadeya. Wakabakoma akusaala buboni bwabo. 32Ndyaakaswa kooko, wakaya kuDamasikasi kaya ceenda mucishi coonse ico.
33Alakwe Simoni wakanyamuka, wakaya kushikila aku ndabala ya Asikaloni aku shicinjilisho shankondo shibambene anjiyo. Wakasandukila ndabala yaJopa, akusaala buboni kabatalibambite. 34Ceebo wakanyumfwa kwaamba ayi bantu bamundabala iyi bakalinga kuyeeya kupa cishitilisho cabo cankondo kubantu bacafwana aDemetiliyasi. Aboobo Simoni wakabikaamo likoto lyabeshilumamba bakwe ayi banoolindilila ndabala iyo.
35Ndyaakaboolela kuJelusalemu, Jonasani wakabunjika bacinenenene, akunyumfwanaabo shakuyaka muumbu shankondo kuJuda. 36Wakapanganaabo alimwi shakukomenesha muumbu shamuJelusalemu, akuyaka likonko lilaamfu pakati pacishitilisho ca nkondo a ndabala ayi shipansaane. Wakalinga kusuni ayi cishitilisho ico cibe ceenka, kwaamba ayi bantu bakwe batanocitako makwebo ali oonse. 37Aboobo bakabungana ayi bayake ndabala alimwi. Lubasu lumwi lwa likonko mweela lwalubumbu lwa Kidiloni kwiicwe nkokalinga lwawa. Bakabaamba a lubasu lwiitwa ayi Kafenata. 38Alakwe Simoni wakayaka ndabala ya Adida kusefela akwiyumya, babikaako shisasa ampingilo.
Tilayifo mbwaakacata Jonasani
39Ono Tilayifo wakalinga kusuni kuba mwaami wabene Asiya, akunyaya Antyokusi bwaami. 40Sombi wakalinga kuloonda, ndyaakeshiba ayi Jonasani teshi akasuminishe kucita isho, lyalo ulakwisa akamulwane. Aboobo wakayeeya kumucata akumucaya. Wakanyamuka, akuboola kuBetishani. 41Jonasani wakamukuncinsha akuya mukukumana aakwe abeshilumamba bayumu bali 40,000 wakashika kuBetishani. 42Ndyaakabona ayi Jonasani wesa abeshilumamba baanji baanji, Tilayifo wakaloonda kulwanaakwe. 43Wakamutambula mubulemu, wakamulemenesha pameenso ababye boonse, akumupa shipo. Wakaambila babye abeshilumamba bakwe ayi banomunyumfwila bweenka mbuli nguwe. 44Ono wakeepusha Jonasani ayi, “Nceebonshi wabalemya bantu boonse aba, mukwiinga taaku nkondo pakati kesu? 45Babooshe kumishaabo. Usalebo baniini beshi bakushindikile, wamana tuye anebo kuPitolemaisi. Ntooya nkupe ndabala yeenka iyo shikwabilisho shimwi shankondo amakoto amwi abeshilumamba bakacaala abatanjililibabo. Pesule ndakuboolela akuya kumisheesu. Nsheenka ishi nshendeshita.”
46Jonasani wakanyumfwa, akucita bweenka mbuli mubye mbwakaamba. Wakalwiita beshilumamba bakwe ayi baboolele kumishaabo kuJuda. 47Wakacashabo bali 3,000. Mulibaaba wakashiya bene Galili 2,000, lyalo bali 1,000 mbobakamushindikila. 48Sombi Jonasani ndyaakenjilabo mundabala ya Pitolemaisi, bantu bakooko bakacala minjililo, ya boonse abo mbakenjilaabo amupeeni.
49Ciindi ceenka ico Tilayifo wakatuma beshilumamba abeshikulwanina pa maaki bakwe kuGalili, ayi bakanyonyoole boonse abo bacafwana aJonasani. 50Sombi balo ndibakanyumfwa ayi Jonasani bamucata, bakayeeya ayi wafwa pantu pomwi ababye mbakalingaabo. Aboobo bakaliyumyayumya, akweenda mumindando yankondo, kabalibambite kulwana. 51Balwani balya ndibakashiba ayi batooliyumya muceebo cakufuna buumi bwabo, bakaboolelaamo. 52Mpomunyaawo baJuda balya bakaboolela muluumuno kucishi cabo. Bakamulila Jonasani ababye, lyalo bakaba aboowa. Bene Isilayeli bakalila abuumbi. 53Bantu boonse babashingulukite bakeelesha kubanyonyoola, kabaamba ayi, “Ono tabacite mwaami nabi shikubacafwa. Katiya tubalwane akumanisha mpuuwo yabo pakati kabantu.”
Currently Selected:
1 Makabisi 12: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.