1 Makabisi 14
14
Simoni wakalela kabotu cishi cakwe
1Mumwaaka wa 172, mwaami Demetiliyasi wakabunganya beshilumamba bakwe akuya kuMediya, ayi akacane beshikumucafwa kulwana Tilayifo. 2Asakesi, mwaami waku Pesha akuMediya, ndyaakanyumfwa ayi Demetiliyasi wenjila mucishi cakwe, wakatuma womwi mutanjilili wabeshilumamba bakwe ayi akamucate kaali muumi. 3Mutanjilili uyu wakaya, wakakoma likoto lya nkondo lyakwe Demetiliyasi. Wakamucata akumuleta kuli Asakesi, lakwe wakamubika muntolongo.
4Cishi cabene Juda cakaba aluumuno
munshiku shoonse shakwe Simoni
Wakalinga kusuni lusumpuko lwa bantu bakwe.
Bulelo bwakwe bwakalinga
kusangalasha bantu bakwe,
bweenka mbobwakalinga kumupa,
pa nshiku sha buumi bwakwe boonse.
5Wakanungaako bulemu bwakwe,
wakakoma ndabala ya Jopa
akuyakaako cito ca maato kwaamba
ayi maato akanooshikila kunsumbu sha mulweenge.
6Wakakomenesha manyinsa
acishi camushobo wakwe,
akuyumya bulelo bwakwe mucishi coonse.
7Wakaboosha baJuda baanji bakalinga basha.
Wakabwesa ndabala yaGosala,
Betisuwa alushito lwaku Jelusalemu.
Wakakushaamo shibiibi shoonse,
lyalo tapakwe kucanika muntu
nabi womwi wakalinga kumukasha.
8Bantu bakalinga kulima
myuunda yabo muluumuno.
Myuunda yabo yakalinga kucata kabotu,
lyalo shisamu shakalinga
kucata shisepo shashisho.
9Bamanene bakalinga kwikala
palubansa kababandikabo sha
shintu shikondelesha.
Bacikula bwangu bakalinga kufwala
shakufwala shibotu shankondo.
10Somini wakalinga kutola
shakulya kundabala shoonse,
alimwi wakalinga kuyumya amuumbu
ashilwanisho shankondo.
Aboobo liina lyakwe lyakapuka
kuya mukushika kumanyinsa acishi capaanshi.
11Wakaleta luumuno mucishi cakwe,
lyalo bene Isilaeli bakakondwa abuumbi.
12Muntu uli woonse wakalinga
kwikala mucimfule ca cisamu
cakwe caminyansa nabi ca mukuyu
taaku wakalinga kubaloondesha.
13Takuna kucaalawo nabi womwi
wakalinga kulwana abo,
bamaami babalwanibabo bakomwa munshiku isho.
14Bantu bamushobo wakwe Simoni
bakalinga kucafwa bapengete boonse,
bakalinga kucita ishi pakukonkela milawo,
lyalo bakatandaanya boonse bakaka
kulambila Lesa abamucita shibi.
15Wakabotesha bulemu bwa Ŋanda yakwe Lesa,
akubikilaawo nongo shimwi mumusena usalalite.
Simoni mbwakanyumfwana alimwi abene Loma abakuSipata
16Ndyaakanyumfwika makani kuLoma akuSipata ayi Jonasani wakafwa, bantu bakooko buumba bwakabacata abuumbi. 17Bakanyumfwa alimwi ayi Simoni nguwabwesa musena wamukwabo kuba Mupailishi Munene, alimwi utoolela cishi coonse a ndabala sha ncico. 18Aboobo bakamulembela nkalata maswi kaali pa mabwe abulonse ayi batoopangana anguwe cibusa bweenka mbobapangana aJudasi, alimwi aJonasani bamakwabo.
19Simoni wakabelenga makalata ayo pa libungano kuJelusalemu. 20Ngaya maswi bene Sipata ngobakatumisha:
“Swebo sobacinenenene bene Sipata abantubesu twakwaansha Simoni Mupailishi Munene, abacinenenene, abapailishi abaJuda bamwi boonse. 21Beshikukwimikanina mbomwakatuma kwisa kokuno batwaambila shabulemu alusumpuko lwanu, lyalo twakakondwa akushika kwabo. 22Lyalo twakalemba mulibuku lyesu lyaliungano maswi aya atwibalusha sheenka ishi: ‘Numenyasi mwanaakwe Antyokusi alimwi aAntipate mwanaakwe Jasoni, beshikwimikanina babaJuda, bakesa kuli ndiswe ayi bapangane aswebo cibusa.’ 23Aboobo bantubesu bakakondwa pakubatambula mubulemu, ono twabika nkalata yamaswi aya mumabuku motubika shamucishi, ayi bene Sipata banookwaibaluka. Twalembela alimwi Simoni. Mupailishi Munene, nkalata isansulula sheenka ishi.”
24Pesule lyasheeshi Simoni wakatuma Numenyasi kuLoma Oliyawo lyankondo lya golodi, lyakalinga kulema makilogilamu 500, kwaamba yi aboneshe lushinisho calunyumfwano.
BaJuda mbubakalumbaisha Simoni
25BaJuda ndibakanyumfwa sheenka ishi, bakatalika kwipushanya ayi, “Ino tubacitile nshi ba Simoni a banabakwe, ayi tubalumbe? 26Muceebo bantu aba mbobatuncinjilisha, lakwe ulya pantu pomwi abamakwabo alimwi boonse bamumukowa wabeeshi. Pakulwana nkondo, bakusha balwani mucishi cabene Isilaeli, lyalo batukalika muluumuno.” Ono bakalemba shoonse ishi pamabwe abulonse ayo ngobakabika pamacincilo Mukalundu kaSiyoni. 27Maswi aya akalinga bobulya:
“Pabushiku bwa 18 mweenshi wa Eluli, mwaaka wa 172, mwaaka watatu mubulelo bwakwe Simoni, Mupailishi Munene, kuAsalameli, 28kulibungano linene lyabapailishi, bantu, abatanjilili bamukowa wesu alimwi abamaloba bacishi, shintu shakaambwa sheeshi:
29“Pankondo shiinji shakatupolela mucishi cesu, Simoni mwanaakwe Matatiyasi, womwi mu banabakwe Jeolibu, pantu pomwi abamakwabo, bakabeenga buumi bwabo kushintu shiloondesha, bakalwana nkondo abalwani bamushobo wabo. Bakacita boobo ayi balame Ŋanda aMilawo yakwe Lesa. Aboobo bakaleta bulemu kumushobo wesu. 30Jonasani wakacita ayi bantu bamushobo wakwe banyumfwane pantu pomwi, lyalo wakaba Mupailishi Munene. Kuswawaawo wakafwa. 31Ciindi cimwi balwani bakayeeya kulwana bene Isilaeli ayi babanyonyoole akubanyaya Ŋanda yakwe Lesa. 32Peenka apo Simoni wakanyamuka akulwanina mushobo wakwe nkondo. Wakasowa maali akwe maanji maanji. Wakabapa shilwanyo bantu bakalinga kulembwa mulikoto lyabeshilumamba bacishi cakwe, akunoobalipila. 33Wakayumya muumbu sha ndabala shaku Juda andabala shaku Betisuwa. Ndabala yeenka iyi ilibetele kumanyinsa yabalwani. Lakwe wakayakaako lushito lwankondo yabeshilumamba bene Juda. 34Wakayumya muumbu yaku Jopa, ndabala ibete kulweenge, alimwi aya Gesa, ndabala ibete kumanyinsa aAshidodi, uko kalekale kwakalinga kwikala balwani. Wakakalikaako bene Juda, alimwi wakalinga kubapa shoonse shebasuni mubuumi bwabo.
35“Bantu boonse bakabona milimo yakushomeka njakalinga kucita Simoni abulemu ubo lakwe mbwakalinga kusuni kupa kucishi cakwe. Ono bakamusala kuba mwaami wabo a Mupailishi Munene, ceebo ca milimo yakwe yoonse yakaleta bululami ayakubonesha kushomeka kumushobo wakwe. Wakeelesha munshila ili yoonse kusumpula bantu bakwe. 36Munshiku buumi bwakwe, shintu shakalinga kweenda kabotu akuya panembo. Wakatandaanya bantu batashomi kuswa mucishi cabaJuda. Wakabatandaanya bantu bakalinga kukala mulushito lwamundabala yakwe Defedi kuJelusalemu. Bantu abo bakalinga kuya bwendeenda akubisha musena ubambene aŊanda yakwe Lesa. Paceebo ceeci bakalinga kusampula kusalala kwanjiyo. 37Wakabikaamo beshilumamba bene Juda, lyalo wakayumya lushito ulo ayi acikoonshe kucinjilisha cishi pantu pomwi andabala. Muumbu shaku Jelusalemu wakashilampisha. 38“Mulandu washintu sheenka ishi mwaami Demetiliyasi wakashinisha shakwaamba ayi Simoni abe Mupailishi Menene. 39Aboobo wakamubelengela pantu pomwi ababye mwaami, lyalo wakamulemenesha abuumbi. 40Wakacita boobo ceebo wakanyumfwa ayi baLoma bakapangana cibusa akunyumfwana abaJuda alimwi ayi bakabatambula abulemu beshinkombe bakwe Simoni.
41“Lyalo baJuda abapailishi bakanyumfwana ayi Simoni abe muntanjilili wabo alimwi Mupailishi Munene wa lyoonse alyoonse, kushikila Mulaluki Ushomeka akaboneke. 42Bakaamba alimwi ayi abe mutanjilili wa beshilumamba, akuba shikulama Ŋanda yakwe Lesa. Lakwe eenkabo akanosala bashikweendelesha milimo ya mucishi coonse, shilwanyo shankondo aŋanda ya nkondo. Alimwi anoolama musena usalalite. 43Bantu boonse balyeelete kumunyumfwila. Lyalo pa shipangano shoonse shamucishi umo, lakwe akalembewo liina lwakwe, alimwi ulyeelete kunoofwala shisani shabulemu shifubeluka alaamba wagolodi.
44“Kutacaniki muntu uli woonse, nabi mupailishi, ukasha shintu ishi shotwaamba, nabi kwiita libungano cakutasuminisha lakwe, nabi welesha kufwala shisani shifubeluka alaamba wagolodi. 45Muntu woonse utakonkeli mulawo uyu nabi kuyansha nabi comwi mulishoonse ulyeelete kupekwa mulandu.”
46Bantu boonse bakasumina kupa nkusu Simoni abulemu bweenka mbuli mbobakapingula abo bakaamba milawo iyo. 47Simoni wakasumina, wakaba Mupailishi Munene, alimwi ashikunjilisha bene Juda boonse.”
48Bantu bakanyumfwana ayi maswi aya alembwe pamabwe a bulonse akwabika patuba mu Ŋanda yakwe Lesa. 49Bakanyumfwana alimwi ayi mabwe amwi alembwe akwaabika mucipinda mulaminwa buboni bwa mu Ŋanda yakwe Lesa, kwaamba ayi Simoni abanabakwe banoobikako maano.
Currently Selected:
1 Makabisi 14: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.