1 Bene Kolinto 3
3
Basebenshi bakwe Lesa
1Nebo palwaangu nobamakwesu, ndakaalilwa kumwaambila mbuli bantu bacite Mushimu Usalashi. Sombi ndakamwaambila mbuli bantu bakunsengwe, nabi mbuli baana mubuKlistu. 2Ndakamupa mukupa kuteshi shakulya shiyumu ceebo kamutana kushikaawo. Alimwi abobulya tamweelete shakulya shiyumu.#Ebulu 5:12-13 3Mwebo mucicita shintu shakunsengwe. Ceebo na kapacili munyono akwaambana pakati kanu, sa ingayi ubo tamubete mbuli bakunsengwe? 4Na bamwi pakati kanu balaamba ayi, “Tulakonkela Paulo,” abalo bamwi ayi, “Tulakonkela Apolosi.” Sa ubo tamubete mbuli bakunsengwe?
5Anu Apolosi ngani? Alakwe Paulo ngani? Swebo tulibo basebenshi bakwe Lesa abo bakamulengesha ayi mushome. Womwi awomwi pakati kesu ulasebensa ncito iyo yakamupa Mwaami Lesa. 6Nebo ndi anga ngumuntu wakashanga mbuto, alakwe Apolosi washitilila, sombi nguLesa ulengesha ayi shikule.#Mili 18:4-11; Mili 18:24-28 7Mwaboona ayi ushanga autilila taaku mbobabete, sombi nguLesa ulengesha ayi shikule. 8Aboobo taaku bupusano pali wooyo ushanga autilila ceebo Lesa ulaakulambula womwi awomwi kweelana amilimo njaakacita. 9Swebo soonse tuli basebenshi bakwe Lesa, mwebo muli muunda wakwe.
Alimwi muli Ŋanda yakwe Lesa. 10Lesa muluse ulo ndwaakantondesha, nebo ndakakaba lwiimbi mbuli muyaki ucishi kabotu, sombi umwi muntu utooyakaawo. Ono womwi awomwi ulyeelete kucenjela mbuli mbwaatooyaka. 11Ceebo taaku muntu weenga wakaba lwiimbi lumwi kuleka loolo lwakakabwa kale. Lwiimbi ulo nguJesu Klistu. 12Mulwiimbi ulo muntu inga wayakisha golodi, silifa, mabwe amakwebo, nabi shisamu, bwiisu nabi matete. 13Ono Bushiku bwakwisa kwakwe Klistu, milimo ya muntu ilaakuboneka patuba ceebo Bushiku ubo bulaakwiitondesha. Bushiku ubo bulaakwisa amulilo uyo weshi ukeeleshe kubota kwa milimo ya muntu womwi awomwi. 14Na cakayaka muntu palwiimbi ulu capuluka mumulilo, muyaki uyo ulaakutambula cilambu. 15Ono na cashukuta, ingayi mulimo wakwe wayabo amaanshi. Teshi akatambule cilambu. Lakwe mwiine ulaakupulushikwa, sombi anga ngumuntu wayokolwabo mumulilo.
16Sa tamwishi kwaamba ayi mwebo muli Ŋanda yakwe Lesa alimwi ayi Mushimu wakwe Lesa ulekala muli ndimwe?#1 Koli 6:19; 2 Koli 6:16 17Aboobo na muntu wanyonyoola Ŋanda yakwe Lesa alakwe Lesa ulaakumunyonyoola. Ceebo Ŋanda yakwe Lesa ilisalalite alimwi mwebo ndimwe Ŋanda iyo.
18Mutalibeeci. Na kuli muntu pakati kanu uyeeya ayi ngumusongo mubwikaalo bwa cishi ca panshi, ulyeelete kuba anga ngumuluya kwaamba ayi abe musongo wancinencine. 19Ceebo busongo bwa buntu mbuluya mumeenso akwe Lesa. Bweenka bwaamba Malembo akwe Lesa ayi, “Lesa ulacatisha basongo mubucenjeshi bwabo.”#Jobo 5:13 20Aamwi Malembo alaamba ayi, “Mwaami Lesa ulishi kwaamba ayi miyeeyo ya basongo taaku mboibete.”#Kulu 94:11 21Ono anu taaku muntu weelete kulisumpula ceebo ca sheesho shicita bantu. Mukwiinga shintu shoonse nshanu. 22Paulo, Apolosi aPita, cishi cino, buumi nabi lufu, shiliiwo asheesho sheshi shikabeeko, shoonse nshanu. 23Amwebo muli bakwe Klistu, alakwe Klistu ngwakwe Lesa.
Currently Selected:
1 Bene Kolinto 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.