1 Bene Kolinto 4
4
Basebenshi bakwe Klistu mbobeelete kuba
1Mwebo mulyeelete kutubona ayi tuli basebenshi bakwe Klistu abo bakapekwa kweendelesha mumakani abushishi akwe Lesa. 2Ono ciyandikabo kubakapekwa mulimo uyu nkwaamba ayi bashomeke kumwaami wabo. 3Nebo palwaangu, tacicite mulandu nabi mwaŋombolosha nabi nkuta imwi ya bantu, alimwi ncakwiila nshilyoomboloshi nemwiine. 4Mumiyeeyo yangu taaku ncentooyeeya ayi ndakabisha. Nakubi boobo ici tacaambi ayi nshicite mulandu. Mwaami Lesa ngooŋombolosha. 5Aboobo mutoomboloshi muntu nabi womwi kushikila Jesu Klistu akese mukoombolosha. Lakwe aakwisa ulaakuyubulula shabushishi bwa mumunshinshe alimwi ulaakubika patuba miyeeyo ya mumyoyo ya bantu. Lyalo Lesa ulaakulumbaisha muntu woonse kweelana ambwaaelete.
6Mumakani oonse aya ngondaamba nobamakwesu, ndasebensesha liina lyangu alyakwe Apolosi mbuli citondesho ayi mwishibe caamba makani ayo aamba ayi, “Amubambe shaamba Malembo akwe Lesa.” Lyalo mutanoolisumpula ceebo ca muntu womwi akusuula umwi. 7Anu ngani wakakupa bunene pabamwi? Sa te nguLesa wakakupa shintu shoonse nshoocite? Ino ono inga walisumpula buyani pashintu shakupekwabo?
8Sa nkokwaamba ayi mwaba kale ashintu shoonse shiyandika? Sa mwabila kale? Sa mwaba baami swebo katutana? Necabota nemwalinga baami cancinencine, naakwiinga tweendelesha pantu pomwi. 9Ceebo ndabona kwaamba ayi swebo sobatumwi Lesa wakatubika kwisule kwiine anga mbantu bapingulwa kucaikwa. Twaba anga ncintu cakweebela kushilengwa shoonse, kuteeshibo kubantu, sombi abaanjelo boonse. 10Swebo tuli baluya ceebo cakwe Klistu. Sombi mwebo muli basongo muli Klistu. Swebo tuli batentu, sombi mwebo muli bayumu. Mwebo mulalemekwa, swebo tulasuulwa. 11Abobulya tuloona nsala alimwi tuleendabo anyotwa. Tatufwali kabotu tuloomwa abuumbi, tuli beshikulongalonga. 12Tulasebensa cankusu kwaamba ayi tucane shiyandika. Na bantu batushingana tulasenga Lesa kwaamba ayi abape coolwe. Na batupensha, nkuumunabo.#Mili 18:3 13Ciindi ndibatubekesha tulabakumbulabo mumaswi abombu. Ono kushikila cino ciindi twaba anga ngamatombe a cishi ca panshi nabi shintu shisuulitwe kubantu boonse.
14Nshintoolembela ayi mulenshe nsoni, sombi kwaamba ayi mucenjesheeko mbuli bana bangu mboonsunishi. 15Nakubi kwaamba ayi mulicite bafundishi bashika kushuulu likumi mubuumi bwanu bwa buKlistu, tamucite bamaishiwanu baanji. Mukwiinga kwiinda muli Klistu Jesu ndakaba ishiwanu ceebo cakumushimikila Makani Abotu. 16Aboobo ndamusenga kwaamba ayi mukonkele nsheencita.#1 Koli 11:1; Fili 3:17 17Paceebo ceeco ntoomutumina Timoti, uli anga ngumwanaangu musankwa ngoonsunishi alimwi uyo ushomeka muMwaami Lesa. Ulaakumwiibalusha shabwikaalo bwangu muli Klistu Jesu ubo bweendelana ansheenjiisha kuli koonse mushoonde shoonse.
18Bamwi batalika kulisumpula anga teshi nkeseeko uko. 19Sombi na Mwaami kaayanda, ndaakwisa uko onoonobo. Lyalo ndaakwiipushepusha akwishiba, kuteshibo nshebaamba abo, sombi ankusu nshibasebensesha bantu abo balisumpula. 20Ceebo Bweene bwakwe Lesa tabweelibo mukwaamba, sombi buleela mumicito. 21Ono amusaleewo ncemusuni, nkese amusako, na amoyo wa lusuno akulibombya.
Currently Selected:
1 Bene Kolinto 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.