1 Bene Kolinto 2
2
Paulo mbwaakashimikila shapali Klistu
1Nobamakwesu, ndindakesa kooko mukushimikila makani abushishi akwe Lesa, nshikwe kusebensesha maswi ayumu alimwi akulitondesha busongo. 2Ceebo ndindakalinga amwebo, ndakayeeya kutamulwiita cimwi cintu, sombibo Jesu Klistu, bunene bunene lufu lwakwe lwa pamucilingano. 3Ndindakesa shindakalinga kuciteewo nkusu, aboobo ndakalinga kututumabo kuboowa.#Mili 18:9 4Ndindakalinga kwaamba nabi kushimikila nshikwe kusebensesha maswi a busongo bwa buntu, sombi ndakatondesha nkusu sha Mushimu Usalashi. 5Ndakacita boobo kwaamba ayi mutashomi ceebo ca busongo bwa buntu, sombi ceebo cankusu shakwe Lesa.
Busongo bwakwe Lesa bulaswa kuMushimu Usalashi
6Sombi tulaamba shabusongo kubaabo bayumu mulushomo. Nakubi boobo teshi busongo bwa buntu nabi bwa beendeleshi ba mucishi ca panshi ubo bumana. 7Busongo mbotwaamba mbwakwe Lesa ubo bwakalinga kushisitwe. Lesa wakabubambilabo limwi kaatana kulenga cishi kwaamba ayi aswebo tukabe abulemu bwakwe Lesa. 8Taaku nabi womwi pakati ka beendeleshi bamucishi wakalinga kwishi busongo ubu ceebo nebakalinga kubwishi, naakwiinga tabakwe kupopa Mwaami wa bulemu pamucilingano. 9Sombi kweelana abwaamba Malembo akwe Lesa ayi,
“Isho muntu nshaatakwe kubonaawo nabi kunyumfwaawo,
isho muntu nshaatakwe kuyeeyawo ayi shilaakucitika,
nshesheesho Lesa nshaakabambila baabo bamusuni.”
10Sombi Lesa wakatuyubulwita sheeshi kwiinda muMushimu Usalashi. Ceebo Mushimu Usalashi ngooshi shintu shoonse nabi miyeeyo yakwe Lesa ya bushishi. 11Sa kuli weenga weshiba miyeeyo ya muntu kwiinda moyo wakwe mwiine? Mbweeke ubo, taaku weenga weshiba miyeeyo yakwe Lesa, sombi Mushimu wakwe Lesa mwiine. 12Swebo tatukwe kutambula mushimu wa buntu, sombi twakatambula Mushimu uswa kuli Lesa kwaamba ayi twishibe shipo isho Lesa nshaakatupa.
13Nkokwaamba ayi tatushimikili maswi aswa mubusongo bwa buntu, sombi mumaswi aswa muMushimu Usalashi. Tuleesha shaMushimu Usalashi kubantu bacite Mushimu uyo. 14Uyo woonse utacite Mushimu Usalashi taakoonshi kutambula shipo shiswa kuMushimu. Muntu wamushobo uyo ulayeeya ayi taaku mboshibete alimwi taakoonshi kushishiba mukwiinga taaku muntu weenga washishiba kaatacite Mushimu. 15Muntu ucite Mushimu Usalashi ulakonsha kwishiba bubi abubotu bwa shintu shoonse alimwi taaku weenga wamukasha. 16Bweenka bwaamba Malembo akwe Lesa ayi,
“Ngani ushi miyeeyo ya Mwaami Lesa
alimwi ngani weenga wamulwiita shakucita?”#Isa 40:13
Ono swebo tulicite miyeeyo yakwe Klistu.
Currently Selected:
1 Bene Kolinto 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.