ƁIMUNJUYO 3
3
Ɓi mutohoko da cikil ngi misikristu ngi Sardesey
1«Toho da modro ngi cikil ngi misikristu ngi Sardeseye ɓaŋ na: Mbur misi ti ˀUf ngi Buymisemuŋhoy tarnaˀ waɗ wurzlaŋhay tarnaˀ ma na, a ɓi: i si na gwat ngi gi ɗike le, slimiɗ ɗik ada zil, a ɓam ka ti siifa, dambalaka na, ki mumucaŋ. 2Ndir ɗeŋ ɗeŋ, vula gidaŋ da mizli mindiram migweˀ ngi mucoy na, asi i pura gwat ngi gi ɗik a mbuŋ Buymisemuŋ ɗu, a ndila kaslsla ta. 3Ɓi taŋ mudubunukuw di, ka micina na, wulka so, ja a hirnga, mbiɗa mevel ɗike. Da ki puɗuk ta na, i sa lumuw gurjik kaɓa muhul, manja ki si na pas naŋ. 4Amma mizli mekelemey ada a Sardese, a jupaka zana taŋhaya ta. A sa ram asi ya, zana babarahay ɓaˀ ɓaˀ avu vu, asi a ndilaka le ngi ki naŋ. 5Ɓa kanah na, mbur mulum bugawla le na, a sa kakaŋ zana babaraŋ. Y'anta sa kiɗa slimiɗ naŋ tir ɗerewol ngi siifa ta. I sa biga slimiɗ naŋ njah a mbuŋ Baha ati modro naŋhaya. 6Mbur misi ti slimiɗ macin na, anja a cine ɓi ˀUf Mipal maɓa da cikil ngi misikristuhoyo.»
Ɓi mutohoko da cikil ngi misikristu ngi Filadelfihey
7«Toho da modro ngi cikil ngi misikristu ngi Filadelfiheye ɓaŋ na: Mbur ngi Buymisemuŋ, mbur mikaslsla, mbur maja lakle ngi buy Davit a ɓi na, da naŋ muwuna gwata le na, mbur masa gica gu anta. Yo da naŋ migica le kwana, mbur mawuna gu anta na, a ɓi: 8I si na gwat ngi gi ɗike le. Gidaŋ ɗike, naŋ neˀkini. Gar ti nah kwana, ki ja ɓi ɗu le a hirnga, yo ko ki ji mi ti slimiɗ ɗu ta. Pura, yi wuna mizlingre le baŋ a mbuŋ ɗike, ko mbur magica gu anta. 9Pura, y'ani vuluw jum ngi mizli ngi Satanay, misi slir tayna, mawaka vu taŋ ka Yudehey, dambalaka i Yudehey ta. Ani i sa tika taŋ ˀay, ɓa a soko dilkam a mbuŋ ɗike, yo ɓa a sa sinaka, i wuɗ ka le. 10Asi ki hurdum le ngi ja ɓi ɗu a hirnga. Ya kwana, tapas bonoy masa so ar mizli keɗeɗe gar, ngi pura mizli ngi si ruwuyoy na, i sa jiginuw aya. 11I ra so gweˀe. Gwat ka misi ti naŋ na, ja kaw ɓa loppol ɗike, mbur masa tuɓuw di anta. 12Mbur mulum bugawla le na, i sa tiri di ɓamtal angi hay ngi Buymisemuŋ ɗu, anta sa bi ti raˀa mata ndiɗaˀ wãˀ. Yo i sa toho slimiɗ ngi Buymisemuŋ ɗu ati slimiɗ ngi walahay madiɗa ngi Buymisemuŋ ɗu a hirnga naŋ. Walahay nah vuna, i Zeruzalem nawaya mapo sar paɗ ti muŋ ti ciki Buymisemuŋ. Yo i sa toho slimiɗ ɗu nawaya a hirnga naŋ ma. 13Mbur misi ti slimiɗ macin na, anja a cine ɓi ˀUf Mipal maɓa da cikil ngi misikristuhoyo.»
Ɓi mutohoko da cikil ngi misikristu ngi Lawdisehey
14«Toho da modro ngi cikil ngi misikristu ngi Lawdiseheye ɓaŋ na: Mbur mazilaka ‹Amin›, migi sedewo miteŋteŋ, mikaslsla, buy ngi gwat Buymisemuŋ miga taŋ, a ɓi ani: 15I si na gwat ngi gi ɗike le, ka yaɓ yaɓ ta, yo culok ta ma. Yi wuɗ zleˀe, anja ki tiri yaɓ yaɓ malla culoko. 16Ani, ka yaɓ yaɓ ta, yo ka culok ta ma, ka luh luh. Vurˀe, i sa mbursuw avra ti balam ɗu. 17Asi ka maɓi: ‹Yi misi zlili, yi gi zlili le ar gwat gar, gwat makiciy anta.› Dambalaka ki muvuso, ka geˀ ˀircece, ki misi viya, ka gulndiŋ kine, yo ki dangar na, ki si na ta. 18Vurˀe, i ra kutuw ɓa ki so hiɗik ɓiri tapasl tapasl avu ya, mubaka malambaˀ naŋ le avra ti vu, ɓa ki gi zlili. So hiɗik zana babara, ɓa ngi ɗumo mesem ngi vu ɗik mugulndiŋ na, yo so hiɗik slalak ngi pi a hiri, ɓa ki pur. 19Mizli, ya mawuɗ taŋ gar na, i mbiɗa taŋ hirnga, i kuta taŋ ti bonoy. Ndir wirwir so, zil marava. 20Cin, y'ani deŋ a miviŋ, i ra zil vu. Da mbur a cin ˀay ɗu le, yo a wuniy miviŋ le na, yi sa ci ng'avaŋ, i sa zumam cuwa. Ya ati naŋ, yo naŋ ati ya. 21Mbur mulum bugawla le na, i sa vulaŋ jiviɗ ɓa a cifi aciki ɗu angi li zumabuy ɗu, kaɓa ya mulum bugawla, ya mura cifi aciki Baha, ar janga nga naŋ buy na ya. 22Mbur misi ti slimiɗ macin na, anja a cine ɓi ˀUf Mipal maɓa da cikil ngi misikristuhoyo.»
Currently Selected:
ƁIMUNJUYO 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.