ƁIMUNJUYO 4
4
Hunuma Buymisemuŋ a muŋ
1A dirba nah na, i pur miviŋ muwuna le baŋ a muŋ, joˀ ˀay ya micina mudumbuŋ ka tulum zleˀe tuwa, a ɓiy: «Jiɗo ng'aka, i sa buguw gwatay masa gam a dirba nah ma.»
2Angi nah si na, ˀUf Mipal a so angi ya. Keɗ na, janga ngi buy a muŋ waɗ mbur anga. 3Mbur mujoˀ vuna, a wucuɗ kaɓa ɗugur mupuɗaw kalaf kalaf gagaza zlopzlop, yo kaɓa ɗugur mupuɗaw gagaza coy coy. Gwat ka kwalay mogodonok mawucuɗ wilik wilik ka ɗugur mupuɗaw meɗelek meɗelek, gun hirnga janga ngi buy tuwa. 4Janga ngi buyoy kukur cuw nga mufaɗ gun hirnga janga ngi buy tuwa, waɗ mizli micawwahay kukur cuw nga mufaɗ joˀ angi janga ngi buyoy vuna. Zana babarahay ɓaˀ ɓaˀ avu vu, loppol ngi ɓiri tapasl tapasl, tuwaɗ tuwaɗ a hirnga, tuwaɗ tuwaɗ a hirnga. 5Wucuɗ ngi vuŋ, hurum ngi gwat ati ndisl ngi vuŋ a bo ti ngi janga ngi buy tuwa. Lampehey tarnaˀ ara tiɓam ciɗak ciɗak a mbuŋ naŋ. Tayna i ˀUf mitarnaˀhay ngi Buymisemuŋ. 6Gwat kaɓa mubuliy ngi dorogal njezlezlzle a mbuŋ janga ngi buy tuwa. Gwat misããmihey mufaɗ, gun hirnga naŋ, vu taŋ gar i hiri, ti mbuŋ ti dirba gar. 7Gwat misããmi mudumbuŋ, a bam vu ati mobor. Mucuw naŋ, a bam vu ati ngaari. Mimakir taŋ, mihiri naŋ kaɓa ngi mburu, waɗ mumufaɗ taŋ, a bam vu ati mulu mira bul a muŋ. 8Gwat misããmi mumufaɗ tayna, taŋ gar ti kirpasl merkeɗ merkeɗe, vu taŋ gar i hiri, ti vra ti huroˀo ma. A ra hunumaka Buymisemuŋ duvuɗ ti papas gar, mbak le anta, a ɓam:
«Bumbulvuŋ Buymisemuŋ, misi gidaŋ wãˀ,
ka pal, ka pal, ka pal.
Ka misi zleˀe, ka misi dana,
yo ka masa sawa.»
9Mbur muangi janga ngi buyo, naŋ misi ti siifa hã ngi set tuwa, da gwat misããmi mumufaɗay tuwa ara gakaŋ dudok, ara ɗuvakaŋ hirnga, yo da ara gakaŋ sise gar na, 10mizli micawwahay mizli ngir cuw nga mufaɗ tuwa, a dilkam a mbuŋ Mbur muangi janga ngi buy tuwa, a hunumaka misi ti siifa hã ngi sete, a paka loppol taŋhaya a mbuŋ janga ngi buyo, a ɓam:
11«Aw Bumbulvuŋ, Buymisemuŋ ndra,
ki ndila le ter ɓa mizli a gukuw dudok,
a ɗuvukuw hirnga, yo ɓa a sinaka, ka gidaŋ.
Asi miga gwatay gar, i ka.
Ki wuɗ le anja t'ada, yo a gam le.»
Currently Selected:
ƁIMUNJUYO 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.