ƁIMUNJUYO 2
2
Ɓi mutohoko da cikil ngi misikristu ngi Efezey
1«Toho da modro ngi cikil ngi misikristu ngi Efezeye na: Mbur misi ti wurzlaŋhay tarnaˀ a hur haŋ hazum, yo maliˀi a wuzla li ɗuva lampehey tarnaˀ mipa taŋ ti ɓiri tapasl tapasla, a ɓi na: 2Gwat ngi gi ɗik, gir ɗik mukupuyah waɗ ɓusaɓi ɗike, i si na le. Yo i si na le, k'anta pula mizli misi moˀoreheye mbak a gam ta. Mizli maɓam, taŋ i mislin ɗuwoy na, ki ci le a kwacay taŋ, ki luuma taŋ na, i misi slirey.
3Kˀada ki ɓus ɓi, ki si bonoy le asi ya, amma ko ki gi vagas ta. 4Amma gwat ya mambuɗuw hirnga aseˀe na, n'anihĩ: k'anta wuɗiy kaɓa angi zli virzi naŋ zleˀe mata ɓula. 5Wuluk ɗagay, ka muzlo diɗ na zle a maka? Zil marava a mevel ɗike, yo ga slra ɗik misi zleˀe a muŋ. Da kanah ta na, i sa so lumuw, da ki zil marava ta na, i sa zuɓa lampe ɗike tir li naŋ avra. 6Amma gwat ya mahĩyã avu ka anihĩ: gwat ngi gi ngi misipi Nikolasay#2.6 Gwat Nikolasay madubunaka da mizli, yo gwat ngi gi taŋ na, a gaka taŋ kiita le aseˀe. Weˀ na, i mizli muvulaka vu taŋ le angi sipi kulihey, waɗ angi gi madama. Amma so na, mbur muzla ɗuva virzi ngi jum taŋ hana vuna, i mana, ti hin hana, malla ar li hana kini na, mbur a si na dar naŋ gu ta (Pura sap. 2.15). na, k'ada hirsa ka ya vuna mahirsa na ya. 7Mbur misi ti slimiɗ macin cin na, anja a cine ɓi ˀUf Mipal maɓa da cikil ngi misikristuhoyo. Widis ngi siifa misi aciki Buymisemuŋ na, i sa pula jiviɗ da mbur mulum bugawla le, ɓa a zum yi naŋ.»
Ɓi mutohoko da cikil ngi misikristu ngi Simirnehey
8«Toho da modro ngi cikil ngi misikristu ngi Simirneheye ɓaŋ na: Mbur mazilaka Mudumbuŋ, yo ngi Dirba, mbur mumuc pam le zleˀe, mumo ti siifa ti mi a muŋ na, a ɓi: 9I si na bonoy ɗik waɗ murga ɗike le, amma ki misi zlili. Yo mizli mawaka vu taŋ ka Yudehey, dambalaka i Yudehey ta ma na, i si na le, ara jukuw ɓi. Taŋ i jum ngi mizli ngi Satanay. 10Bonoy ka masa sa na, anja ki zluwun di ta. Pura, Satan a sa pi mizli mekelemey a wuzla kumo ng'ar dangay, ɓa a ci a kwacay kumo. Ki sa gam hin kuruˀ angi bonoyo. Ndir teŋteŋ hã gbaˀ avu mucu. I sa vuluw loppol ngi siifa. 11Mbur misi ti slimiɗ macin na, anja a cine ɓi ˀUf Mipal maɓa da cikil ngi misikristuhoyo. Mbur mulum bugawla le na, anta sa si bonoy ti muc mucuw naŋ mata wãˀ. Ndir teŋteŋ gbaˀ avu mucu, i sa vuluw loppol ngi siifa.»
Ɓi mutohoko da cikil ngi misikristu ngi Pergamay
12«Toho da modro ngi cikil ngi misikristu ngi Pergamaya ɓaŋ na: Mbur misi ti maslalam muyoŋ mi, mazum ti ka ti ka, a ɓi: 13I si na li ka micifi a nga na le, i li Satan mazum buy anga. Amma k'ada zlak gidaŋ gidaŋ avu ya. Yo ka mitiɓiy na, ki ji di mi ta. Antipas, migi sedewo ɗu miteŋteŋ, ko ti taŋ mikiɗaka vagay angi li Satan micifi anga a hay kum na tekeɗe kwana, ki ji mi ta. 14Amma i wuɗ i mbuɗuw hirnga neˀe: mizli madubunam ɓi ngi Balaˀam na, ada a hay ɗike. Balaˀam nah na, a pa mi da Balaka#2.14 Balak i buy madiɗa ngi Moˀap, hirwuy misi tisi virzi ngi pas ngi miprik ngi Mubuliy mumucaŋ. Balaka, a ɗiɗa Israyeleye ɓa a dilkam avu kulihey (Pura Sluf 22.1 hã ndila 24.25)., ɓa a gi gwat ngi hizigiɗa Israyeleye, ɓa a zumam ˀuse ngi kulihey, yo ɓa a gam sulome. 15A hay ɗik vuna ma na, mudubuna ɓi ngi Nikolasay ada ma. 16Zil marava a mevel ɗike so. Da kanah ta na, i sa lumuw kutum, i sa nguma mizli tayna ti maslalam ngi balam ɗu na. 17Mbur misi ti slimiɗ macin na, anja a cine ɓi ˀUf Mipal maɓa da cikil ngi misikristuhoyo. Mbur mulum bugawla le na, i sa vulaŋ man muɗumoŋ, i sa vulaŋ ɗugur bara, yo ar ɗugur nah na, a tohom slimiɗ nawaya le anga nguɗ nguɗu. Mbur misina slimiɗ nah anta, sey mbur micakaŋ di le.»
Ɓi mutohoko da cikil ngi misikristu ngi Tiyatirey
18«Toho da modro ngi cikil ngi misikristu ngi Tiyatireye ɓaŋ na: Mangal ngi Buymisemuŋ, mbur misi hiri njilim njilim, kaɓa vu matiɓi haɗa haɗa, yo saraya kaɓa ɓiri gaza mukuleɗ kuleɗ, mipaka ti pi, a ɓi: 19I si na gwat ngi gi ɗike le, wuɗavu ɗik, tiɓi ɗik, vula vu ɗik ngi gi slra waɗ ɓusaɓi ɗike. I si na le, slra muwurenna, a funa mudumbuŋ le vah vah. 20Amma gwat ya mambuɗuw hirnga aseˀe anihĩ: Zezabel, ngwas mapura vu naŋ ka i mijiviɗ ngi Buymisemuŋ na, ara ziza gawla ɗuwoyo. A dubuna taŋ gi sulome waɗ zuma ˀuse ngi kulihey ma na, ki pulaŋ mbaka si. 21I vulaŋ hin le ɓa a zil marava, amma anta ngum ɓa a zil marava ngi pula gi sulome naŋ na ta. 22Vurˀe, i ra hizigaŋ ng'ar arngawo ngi bonoy mukuy ta wãˀ, jom ati mizli magam madama ati naŋ na. Amma sey da taŋ mizilam marava le ar gwat ngi gi taŋ malambaˀ na far. 23I sa kiɗa zir naŋhaya vagay vagay, ɓa kahana na, cikil ngi misikristuhoy gar a sa sinaka, ya, yi misina wuluk ngi mizli ati gwat taŋ mawuɗam a mevel taŋ. Yo ko wa gar a wuzla kumo, yi sa vulaŋ migir naŋ weˀe avu slra naŋ. 24Amma kum mekelemey misi a Tiyatire, kum masipam ɓi nah ta, yo kum madubunam ɓi mazilaka sinmijileŋ ngi Satan ta na, yi ɓukum: y'anta ɗuvukum jijir mekelem ta. 25Amma, gwat kum misi ti naŋ na, jaka gidaŋ gidaŋ hã ti ya misa mo le. 26Mbur mulum bugawla le, yo maru ti gi slra hã gbaˀ avu kiɗa mi naŋ na, i sa cufaŋ madiɗa a hirnga sukwi ngi mizli gar. 27Yo a sa jigina taŋ ti ganday ngi ɓiri kaw a haŋ. A sa waha taŋ kaɓa mawaham magayaka. 28I sa vulaŋ bangay ngi wuna li ka Baha muvuliy madiɗa na ya. 29Mbur misi ti slimiɗ macin na, anja a cine ɓi ˀUf Mipal maɓa da cikil ngi misikristuhoyo.»
Currently Selected:
ƁIMUNJUYO 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.