MISE 7
7
Tuwuy ngi mijiviɗ
1Kay! Yˀar bonoy! Ya kaɓa mbur,
misi ar hin ngi sifi ngi gwatay,
misi ar hin ngi ngila yi ngi gudubun.
Amma ko gudubun ngi zum anta,
ko yi naŋ micikiɗeffe, ya mawuɗ haɗa na, ko purla anta si!
2Mbur miteŋteŋ
anta asi ruwuyo mata.
Ko mbur mijeŋŋe anta a wuzla mizli ta.
Mizli gar a wam vu le weˀ ngi kiɗa hirnga,
mbur gar ara jiɗa cil naŋ.
3Haŋ taŋ i ngi gi malambaˀa.
Buyo ɓa a ga mezle da mburo na, a cufuɗ ɓa a vulakaŋ gwat naŋ mawuɗo ɗagay.
Migi kiita a cufuɗ, sey a vulakaŋ gwat taˀ le,
mizli madiɗahaya, gwat ngi kiɗa taŋ maya, a ɓaka ɓi nah ˀay paɗ a muŋ.
4Mbur mimezle ngi si taŋ na, naŋ kaɓa sisim,
mbur mijeŋŋe, gaɗay gaɗay wãˀ le, fineˀ zluɓ ngi hadaw.
Hin ngi kiita, mijigina li kumoy mitilam di mi zleˀe na, a ndilo le,
wurenna i hin ngi gukum gigisl.
5Ki tiɓaka mi ngi yeme kumoyo ta,
ki pulaka vu kumo mbak mbak wãˀ da ngama kumoyo ta.
Ko kum ati ngwas kumoy kwana,
jam lesl avu mi mabo ti balam kumoyo.
6Asi mangal a za cine, mibirngaŋ,
zuŋ mongoso a mbiɗi hirnga avu mumuŋ,
ngwasa, dideˀ naŋ mongoso a mbiɗi hirnga ava.
Mbur gar na, mesene naŋ i mbur ngi hay naŋ tehhe a muŋ.
7Amma ya, i mbiɗi ng'avu Bumbulvuŋ,
i njih hiri asi Buymisemuŋ, milih ɗu,
ya mazilaŋ na, Buymisemuŋ ɗu a sa ciniy di.
Njaha hiri ngi mizli ati diradibiɗ taŋ
8Kum mesene ndrahay, ki singiram ar ndra ta.
Ko da i ndilam le kwana, i sa slikiɗam a muŋ,
ko da ndra ar luvuŋ kwana,
Bumbulvuŋ i li minjahha ndra.
9Bumbulvuŋ miji mevel na,
sey i ɓusaka ɓi nah,
asi i gam mungra le ava.
Naŋ masa cik vu asi ndra,
yo naŋ masa ɗiya ndrakaslsla na,
hin naŋ a sa ndilawa.
A sa bo ti ndra ng'ar li minjahha,
dar i sa singilaka slra mijeŋŋe naŋ na.
10Mesene ndrahay a sa puraka keɗ keɗ na,
mesem a sirta taŋ ngbulum.
Taŋ a ɓam ndra zleˀe na:
«Bumbulvuŋ, Buymisemuŋ kumo, naŋ maka?»
A sa kirpaka taŋ asi sar,
kaɓa ndileɓ a jiviɗi,
joˀ ndr'i sa puraka taŋ cum cum.
11Ti hin taŋ masa ndiraka mohol kum, hiri naŋ a muŋ na,
a sa kirahaka maakway kumo ti hin nana.
12Tapasa, mizli a sa soko ngi hay kumo,
zle ti Asiri, hã a Ezipte,
yo zle ti ˀay zaw Nil, hã a Efrata,
zle ti mi mubuliy, hã a mi mubiliy mekelem,
waɗ zle ti muwã, hã a muwã mekelem ma.
13Hirwuy a sa tiri kirɗak kirɗak, asi moˀore ngi mizli ngi raˀahaya.
Nah na i migir ngi gwat ngi gi taŋ.
14Jigina mizli ɗikeye ti ganday ɗike.
I ginew ɗik mitaˀ gezleŋ, mi ngi ɗiki,
taŋ misek pal taŋ asi widis mingiriɗi,
a wuzla widis mayamay.
Anja a zumam ar pala ngi Basaŋ waɗ ngi Galaˀata
kaɓa ti hin misi zleˀe.
15Ga ndra gwat migam ɗaˀ tahay, ɓa i puraka taŋ,
kaɓa ti hin ka mubo ti ndra ti ruwuy Ezipte zleˀe na ya.
16Sukwi ngi mizli misa puraka taŋ le na,
ko ti taŋ migidaŋ haɗa na kwana,
mesem a sa sirta taŋ ngbulum.
Tˀanta sa ɓam ɗaˀ purla gu ta,
yo a sa gam kaɓa t'anta cinam ta.
17A sa bugumom mereɓ kaɓa kaway,
kaɓa gwat misahmihey maram ti kwacay.
Taŋ misi ar li taŋ ngi ndil ng'ara ti tuwaˀ na,
a sa boko ti jijik ng'avi ka Bumbulvuŋ, Buymisemuŋ ndra,
didak a sa muɗa taŋ,
a sa zluwunam ti ka.
18Buymisemuŋ, ka mapuy mungra,
yo ka mapula slikiɗa ɓi
ngi mizli ɗikey mindiram ti siifa na,
ngi wi ati ka vuna i kuli wanaka?
K'anta ki ji mevele ngi wãˀ ta,
ka, ki wuɗ di i gi mezle da ndra.
19Ki sa pura ndra ircece ava ma,
kisa ɗuva sar ar mungra ndraˀahaya.
kisa zliɗa malambaˀ ndraˀahaya gar
ng'asi mubuliy.
20Ki sa gi teŋteŋ avu dideˀ ngi Zakopoy,
waɗ kisa pura dideˀ ngi Abrahama ti hiri mezle.
Ka muhudum zleˀe avu dideˀ ndrahay,
zle misi ngadana ta tuwa na, hana i nah so.
Currently Selected:
MISE 7: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
