MISE 6
6
Bumbulvuŋ mimbiɗa hirnga da mizli naŋhay
1Cinam so, Bumbulvuŋ a ɓi na:
«Slikiɗ, ara widi ti ɓi ɗu a mbuŋ muwãhay,
anja ɓa li miɗingir ɗingirey a cinam ˀay ɗike.»
2Kum muwãhay, cinaka Bumbulvuŋ mawidi ti mizli naŋhay ani so,
kum sivirzi ngi ruwuy migidaŋ gidaŋhay,
widi ngi Bumbulvuŋ ti mizli naŋhay ani,
yo ara gam ɓi ati Israyeleye.
3A ɓa taŋ na: «Mizli ɗuwoy, i gukum mike?
I girukum ti ɓi mike? Mbiɗikiy di so.
4I girukum ti ya mubo ti kum ti ruwuy Ezipte na kwa?
Ti ya mumbuɗu hirnga kum tir beke na kwa?
Ti ya muslinukum Moyis, Aroŋ waɗ Miriyam, ɓa a ndiram i mijigin kumoy na kwa?
5Mizli ɗuwoy, inga wulkaka ayɗi,
Balak, buy Moˀap a juwa le a kwacay naŋ zleˀe ngi gukum malambaˀa,
yo Balaˀam, mangal ngi Beˀor a mbiɗaŋ mingiɓi le,
yo ki cohom le zle a Sitim nga Gilgal,
hana gar na, ɓa kisa sinaka bugawla nga ya Bumbulvuŋ.»
Gwat Bumbulvuŋ mawuɗ hirdam hirdam avu mizli
6«Ɓa i ram nga mbuŋ Bumbulvuŋ,
yo ɓa i ra huruk hurukam a mbuŋ Buymuŋ vuna na, i sa ram ti mi a haŋ ka?
I ram a mbuŋ naŋ ɓa i gakaŋ mikuli mizlam zlamay kwa?
Malla i gakaŋ mikuli ti ziri sla ngi vi pal palay kwa?
7Bumbulvuŋ a wuɗ di i zlengerekey durmuk mbeˀ mbeˀ kwa?
Mal peɗe peɗe gwatay haɗa kwa?
I vulakaŋ ziri modogom ndrahay ar deɗe slikiɗa ɓi ndra na kwa?
Yo i vulakaŋ ziri ngi kwacay ndrahay ar deɗe ngi mungra ngi hirnga ndrahay na kwa?»
8Mburu, a bugukuw gwat mezle ngi gi le da ka,
gwat Bumbulvuŋ mawuɗ avu ka ani:
Naŋ, a wuɗ di i gi gwat mikaslsla,
wuɗa gi teŋteŋ,
yo sipi jiviɗ nga naŋ, Buymisemuŋ ɗike kuy kuy.
Migi gilaw da mizli ati misi moˀoreheye, Bumbulvuɓ a kuta taŋ
9Mizli mazluwunam ti Bumbulvuŋ na,
naŋ a sa laha taŋ,
Dar a zila mizli ngir walahayaya, a ɓa taŋ:
kum sukwi ngi mizli mukos kos ar walahay, cinam:
10«Haya mizli misi moˀorehey,
zlili muluma ti jiviɗ malambaˀ, yo agwada, kum muɓucoko ɓuc ɓuc le, mihiris le nah na,
ɓa i pula ɓi nah teˀ sukwa?
11Mizli miwi gwat ti kilo mezlehey ta,
yo gwat ngi wi dudok ngi gwat miɓaˀ ɓaˀ ar gabalaya i ngi tikina mizli na, i pula taŋ teˀ manja i mbiɗa taŋ hirnga sukwa?
12Walahay, mizli misi zlili ngi raˀahaya, i misi moˀorehey haɗa,
yo mizli ngi raˀahaya, maɓam mi ngi gi gilaw na,
mi ngi balam taŋ ati ngi irne taŋ, i ngi tikina vu tewle.
13Dar yi zla kiɗ kumo, hã a kukum jiji,
yo yi nguzlukum kuɗup, asi mungra kum na.
14Ani kisa zumam gwata so, amma kum anta sa mbam ta.
May a sa gi asi ruwuy kumo.
Ki sa pam gwata sek ngi wi vu, amma kum anta sa wam di vu gu ta.
Gwat kum masa wam di vu vuna, i sa vula ɓa vurum a zuma.
15Ki sa zligam gwata, amma kum anta sa gaka sifi naŋ ta.
Ki sa ɗucom mal ngi tutumburo, amma kum anta sa gam slra ti mala ta.
Ki sa ɗucom yi ngi gudubuno, amma kum anta sa sam mbaazla nah ta.
16Ɓimuɗuva ngi buy Omri
ati gi gwat malambaˀ ngi mizli ngi hay Akapay na,
kumo, ki sipam di i nah jaka.
Ki ra sipaka jiviɗ taŋ,
vurˀe, yi sa pula walahaya ɓa mizli a zumakaŋ,
yo kum mizli ngi raˀahaya, i sa ga ɓa mizli a singiram ar kum.
Pi mesem ngi mizli ɗuwoyo a sa ndir a hirnga kum.
Currently Selected:
MISE 6: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
