Matiye 21
21
Yesu mici nga Zeruzalem
(Yo pura Mark 11.1-11; Luk 19.28-40; Zaŋ 12.12-19)
1Ti taŋ migweˀ avu Zeruzaleme, a ndilam le gweˀ avu Betfage, a sar muwã tutumbur. Dar Yesu a slin mizli ngi seˀehey cuw, 2a ɓa taŋ: «A ram ng'ar walahay ngi mbuŋ kum na, madiya zungu ada, mujuwa le kaˀ waɗ zinga naŋ, kisa lumaka kutum. Puskoko di, sikiy taŋ. 3Da mbur a cufuɗukum le na, kisa ɓakaŋ: ‹I Buy mawuɗ› si na, naɓa a sa pulukum taŋ kutumo si.» 4A gi kahana ɓa ɓi ngi mijiviɗ miɓa na, a gi muduba. A ɓi zleˀe na: 5«Ɓaka zuŋ diili ngi Siyoŋ na: Pura, Buy madiɗa ɗik ara so ng'avi ka! Naŋ i mbur mihina hirnga, naŋ gilaˀ ar madiya zungu, waɗ ar zinga naŋ.» 6Dar mizli ngi seˀehey a ram so, a gaka ka Yesu miɓa taŋ di tuwa. 7A soko ti madiya zungu ati zinga naŋ tuwa, a ciyaka zana taŋhay a duba taŋhaya. Joˀ Yesu a jiɗ araŋ. 8Zigiduw haɗi ara ciyaka zana taŋhay a jiviɗe. Mekelemey a ngumoko mihaŋ ngi widisey, a cupaka taŋ a jiviɗe. 9Zigiduw maru a mbuŋ Yesu ati mekelemey masipakaŋ na, a tilam mi, a ɓam: «Mangal ngi Davit misi ti dudok! Anja Buymisemuŋ a ɗuwula mi da mbur maso ti slimiɗ naŋ! Buymisemuŋ misi a muŋ misi ti dudok!» 10Ti Yesu maci nga Zeruzalem na, a ga welele teˀ da mizli gar, a cufuɗam vu, a ɓam: «Mbur hana i wa ma ska?» 11Zigiduw a mbiɗa: «I Yesu, mijiviɗ a Nazaret, hirwuy Galile.»
Yesu ar hay ngi Bumbulvuŋ
(Yo pura Mark 11.15-19; Luk 19.45-48; Zaŋ 2.13-22)
12A dirba nah na, Yesu a ci ng'ar hay ngi Bumbulvuŋ a Zeruzalem. A ɓula migi tererehey ati mihiɗika gwatay gar. Tebur ngi mimbiɗi dalahay ati janga ngi migi terere ngi ɗiyuw dirgwaɗay cek na, a putukuso taŋ gar avra. 13Dar a ɓa taŋ: «A tohoko na: ‹Hay ɗu a sa zilaka hay ngi dira dibiɗi.› Amma kumo, ki tiram di butum ngi muhuloy mbrike?» 14Dangaray ati jegwerey a soko ng'avi Yesu ar hay ngi Bumbulvuŋ, joˀ Yesu a ɗiya taŋ. 15Gwat ngi zuma hirngahay Yesu miga taŋ waɗ ziri matilam mi ar hay ngi Bumbulvuŋ, maɓam: «Mangal ngi Davite naŋ ti dudok» tuwa na, a ja mevel le haɗa da masay madiɗahay ati buy ngi ɓimujuwahaya. 16Joˀ a ɓaka Yesu: «Kˀada cin taŋ maɓam na ya?» Amma Yesu a mbiɗa taŋ di: «Hĩ! Na a tohoko na: ‹Ki ga ɓa ziri memeɗehey ati ziri gazahay a hunumukuw› na, ki slufaka ɓi nah ɗaˀ ta kwa?» 17Dar Yesu a pula taŋ hirkim akẽh, a bi tir walahaya, aru nga Betani, a hin wãˀ a diga.
Yesu minisa urufu
(Yo pura Mark 11.12-14,20-24)
18Ngi miprik ngi li naŋ muwun na, Yesu ara mawa ng'ar walahay, may ara jaŋ. 19A pur uruf kaˀ, gweˀ a ciki jiviɗe. A ngizli nga seˀeŋ, amma ko a lum yi ava loŋ ta, sey kalaf tewle si. Dar a ɓa urufo: «K'anta sa yi mata ndiɗaˀ wãˀ!» Uruf a muˀul sok a haŋhaŋ si. 20Mizli ngiseˀeheye mupuraka na, a zuma taŋ hirnga le, a ɓam: «Uruf hana a muˀul mbri sok a haŋhaŋ si ka?» 21Yesu a mbiɗa taŋ di: «Gisiŋ, yi ɓukum na: da kum ada ti tiɓi, kum anta wulkam cuw cuw ta na, kisa gam di i gwat ya miga da uruf hana tew ta, amma ko ki ɓaka muwã hana le: ‹Budugur ti kẽh, ara diɗ angi mubuliy› kwana, a sa gi si. 22Gwat kum masa cufuɗam gar ar dira dibiɗ ti tiɓi na, kisa lumakaŋ.»
Yesu a lumo gidaŋ ngi gi slra avu waka?
(Yo pura Mark 11.27-33; Luk 20.1-8)
23Ti Yesu mici ng'ar hay ngi Bumbulvuŋ a Zeruzalem, yo naŋ mira dubuna gwat da mizli na, masay madiɗahay ati micawwa ngi wuzla Yudehey a soko ng'avaŋ, a cufuɗakaŋ: «Ka maga gwat tayna vuna ti gidaŋ ngi waka? Muvuluw gidaŋ nah i waka?» 24Yesu a mbiɗa taŋ di: «Ya kwana, i wuɗ i cufuɗukum purla tewle si. Da ki mbiɗikiy di le na, i sa ɓukum ɓi ngi gidaŋ ya magi di gwat tayna vuna ya. 25Mislino Zaŋ ngi ci mizli ar yam i waka? I Buymisemuŋ kwa, malla i mizli kwa?» Hirik a ngilam wuy ar wala taŋ kwaɗay, a ɓam: «Da i mbiɗakaŋ di le: ‹I Buymisemuŋ› mislino di na, a sa ɓa ndra: «Na, ki tiɓaka ɓi naŋ ta vur mike?» 26Yo da i ɓam le: «I mizli mislinoko di» ma na, sey i zluwunam ti zigiduw maso, asi mizli gar a sinaka le, Zaŋ i mijiviɗi.» 27Dar a mbiɗaka da Yesu: «I si na ka ta» Yesu kwana, a ɓa taŋ: «Ya maga gwat hana ti gidaŋ ngi waka na, yi ɓukum di ta ya.
Ɓi ngi ziri cuw
28«Ɓi ani, ki wulkam anga mbrike? Mbur ada, naŋ ti ziri cuw. Aru ng'avi mangal mudumbuŋ, a ɓaŋ: «Mangal ɗu, ara gi slra ar guva ɗu dana takwa.» 29Mangal tuwa a mbiɗaŋ di: «Yi ngum ta.» Amma a dirba nah neˀ na, a mbiɗa wuluko, aru ng'ar guva tuwaŋ. 30Yo mbur tuwa a ɓa mangal mucuw naŋ kanah ma. Mangal a mbiɗaŋ di: «Yi ru, baha.» Amma ko aru mata. 31A wuzla ziri mucuwoy na, migi gwat cine taŋ muwuɗo, i wanaka?» A mbiɗakaŋ di: «I mangal mudumbuŋ na.» Dar Yesu a ɓa taŋ: «Gisiŋ, yi ɓukum na: micikila buutuhoy ati ngwas sulomehey a sa cam dumbuŋ angi kum ng'ar Zumabuy ngi muŋ. 32Asi mike na, Zaŋ a so avu kumo, a bugukum jiviɗ mijeŋŋe na, ki tiɓaka ɓi naŋ ta, amma i micikila buutuhoy ati ngwas sulomehey mitiɓaka ɓi naŋ jaka. Ko ti kum mupuraka kanah kwana, ki mbiɗaka mevel kumo ɓa ki tiɓaka ɓi naŋ ta na si.
Ɓi ngi mizli misi moˀorehey ar guva ngi gudubun
(Yo pura Mark 12.1-12; Luk 20.9-19)
33«Cinam, y'ani wukum ɓi mekelem ani weˀ ti wi: Mbur ada, a gi guva ngi gudubun, a cup zluɓ gun hirnga naŋ, a li vigiɗ ngi ɗuco yi naŋ waɗ a ndir hay madiɗa ngi jigina guva. A pula guva tuwa asi haŋ ngi migi slrahay, a cuh nga mulak. 34Hin ngi ngila yi ngi gudubun a ndila le. Buy ngi guva a slin gawla naŋhay ng'avi migi slraˀahaya, ɓa a tiɓakaŋ mi nga naŋ aya. 35Amma migi slrahay tuwa a jaka gawlahaya, mbur pal mekeleme, a mbakaŋ ti kiɗ, pal numuŋ a kiɗaka vagay, mipal mekeleme ma na, a kuypakaŋ ti ɗugur. 36Buy ngi guva a slin gawla mekelemey haɗi fineˀ mudumbuŋhoy ma. Amma migi slrahay a gam ti taŋ kanah ma ni. 37Angi kiɗa mi naŋ na, hã mbur tuwa a slin mangal naŋ, a ɓi ti kwacay naŋ: «Ko mbri na, a sa sinaka mangal ɗu.» 38Amma migi slraˀahaya mupuraka mangal naŋ tuwa, a ɓam ar wala taŋ na: «Puraka, ngi diga na, i muzuma hay vuna. Akum, kuɗukum di vagay ɓa masa zumaka haya i ndra!» 39A jaka mangal tuwa, a bam di tir guva, a kiɗaka vagay. 40«Ani, da buy ngi guva a sa so le na, a sa ga migi slra tayna mbrike?» 41A mbiɗakaŋ di: «A sa ziza mizli malambaˀvu tayna ti bonoy haɗa, a sa pula guva naŋ asi haŋ ngi migi slra mekelemey, ɓa a sa vulakaŋ yi ngi gudubuno kaslsla angi hin naŋ.» 42Yesu a ɓa taŋ: «Ɓi misi ani na, ki slufaka ar Ɓimutoho ɗaˀ ta kwa? A ɓi na: ‹Ɗugur mindira hayay mihizigaka avra na, mitiri ɗugur hirnga ngi ji mivay#21.42 Pura Dim 118.22 , i naŋ. Hana i slra ngi Bumbulvuŋ, i gwat hirnga wãˀ avu ndra ngi pur hiri ngal ngal.›» 43Yo yi ɓukum ma, Zumabuy ngi muŋ, a sa zuɓaka avu kumo, a sa vulaka da mizli masa gam gwat mizlir le kaslsla avu Zumabuy nah vuna. 44Mbur masa diɗ ng'ar ɗugur nah na, a sa ngil. Yo da ɗugur nah a sa diɗ le ng'ar mburo na, a sa njirslaŋ.» 45Masay madiɗahay ati Farisahay micinaka ɓi Yesu miwa weˀ ti wi hana na, a sinaka le, a ɓi na, vur taŋ. 46Dar a puram jiviɗ ɓa a jakaŋ. Amma a zluwunam ti zigiduw, asi taŋ a sinaka le, Yesu i mijiviɗi.
Bible en Langue Guiziga © L’Alliance Biblique du Cameroun, 2011.