Matiye 20
20
Ɓi ngi migi slrahay ar guva ngi dudubun
1«Asi mike na, Zumabuy ngi muŋ a bam vu ati ɓi ngi buy ngi hay mibi ngi miprik prik nga hila migi slrahay ng'ar guva naŋ. 2A ɗiyaka ɓi nah ati migi slraˀahaya, mbur gar na, hiipasa suloy suloy#20.2 Suloy skat skat cuw, ar hin Yesu na, suloy pal i wuruk ngi mbur migi slra ngi huf ar hiipasa. Joˀ a slina taŋ ng'ar guva naŋ so. 3Ti pas ngi vula yam a pilis ma na, a bi ma, a pur mizli mekelemey deŋ deŋ ar li ngi luuma, anta gam slra ta. 4Buy ngi hay tuwa a ɓa taŋ: «Kumo kwana, a ram ng'ar guva ɗu aya, yi sa wurkukum kaslsla.» 5Dar mizli tuwa a ram. Ngi pas deŋ waɗ ngi pas ngi ɓula away ngi hay ma na, a ga kanah ma. 6Ngi pastaˀ wãˀ ma na, a bi, a lum mizli mekelemey deŋ deŋ lambaˀ. A ɓa taŋ: «Ki vam hiipas dedeŋ aka, ki gam slra ta vur mike» 7A mbiɗakaŋ di: «Asi mbur mucufuɗa ndra ngi gi slra anta.» Joˀ a ɓa taŋ: «Kumo, aram ng'ar guva ɗu aya.» 8Pas a diɗ le muduba, buy ngi guva a ɓa madiɗa ngi migi slra naŋhaya: «Zulo migi slraˀahaya, ɓa ki wurka taŋ migir taŋ. Zla avu mizli musoko ngi dirbahay, kisa kiɗa mi naŋ avu musoko mudumbuŋhoy.» 9Joˀ mizli mizlaka slra ngi pastaˀ wãˀ tuwa, a soko, mbur gar a lum gabal gabal. 10Mizli mizlaka slra dumbuŋ a soko aya, a wulkam kaɓa a sa lumam fineˀ mizli mekelemeye, amma taŋ kwana, a lumam gabal gabal vuna ya. 11Ti taŋ matiɓaka migir taŋ na, ara dirɗaka buy ngi haya cici, a ɓam: 12«Mizli ngi dirbahay a gam slra ler purla si. Ndra, i ɓusaka slra hiipas angi pas mucõˀcõˀ, amma ki wurka taŋ rak rak ati ndra mbrike?» 13Buy ngi guva a mbiɗa da mbur pal a wuzla taŋ, a ɓaŋ: ‹Ngama ɗu, yi zumuw ta. I ɗiyaka ɓi nah le ati ka ɓa yi wurkuw hiipasa gabal takwa? 14Tuɓa migir ɗike, a ru. Yi wuɗ i wurka mbur muso ngi dirba rak rak ati ka. 15Jiviɗ anta ɓa yi gi ti zlili ɗu ka ya mawuɗ ta kwa? Malla ki gi suloŋ vur yi mbur mezle na kwa?› 16Naŋ kine, mizli ngi dirbahay a sa tiram mudumbuŋhoy. Mudumbuŋhoy a sa tiram ngi dirbahay.»
Yesu miɓa ɓi ngi muc naŋ ati ngi slikiɗ naŋ ti wuzla mumucahaya sar mimakir naŋ
(Yo pura Mark 10.32-34; Luk 18.31-34)
17Yesu ati mizli mukuruˀ nga cuwoy tuwa, taŋ migweˀ ngi ru nga Zeruzalem na, a ngica taŋ pal taŋ, ti taŋ maram a jiviɗe, a ɓa taŋ: 18«Cinam, ani i ra ram nga Zeruzalem, a sa vulaka Mangal ngi mbur asi haŋ ngi masay madiɗahay waɗ asi haŋ ngi buy ngi ɓimujuwahay, a sa gakaŋ kiita ngi muc a diga. 19A sa vulakaŋ asi haŋ ngi mizli misi i Yudehey ta, ɓa a singiram angaŋ, a sliɗakaŋ, waɗ ɓa a dirakaŋ avu dum mizlira. Yo angi hin mimakir naŋ na, a sa slikiɗ a muŋ.»
Mumuŋ ngi Zak ati Zaŋ mucufuɗa Yesu
(Yo pura Mark 10.35-45)
20Mumuŋ ngi ziri ngi Zebedehey a kiroho ng'avi Yesu, naŋ ati ziri naŋhay, a girdiˀ a mbuŋ naŋ ɓa a cufuɗaŋ. 21Yesu a ɓaŋ: «Ki wuɗ mike?» Ngwas a mbiɗaŋ di: «Ar Zumabuy ɗik na, anja ki ɓa ziri ɗuwoy mucuw hanayna a sa cifam, pal tir vay hazum ɗik, pal numuŋ tir vay gula ɗiki.» 22Yesu a mbiɗaŋ di: «Ki sinaka gwat kum macufuɗama ta. Ani, sikiɗ ngi bonoy ya masa sa vuna, ki saka gu kwa?» Taŋ a ɓakaŋ: «I saka gu.» 23Yesu a mbiɗa taŋ di: «Ki sa saka sikiɗ ngi bonoy ɗu gisiŋ, amma cifi tir vay hazum ɗu ati tir vay gula ɗu na, i ya mavula ta. A sa vulaka da mizli Cine ɗu miɗiya vur taŋ.» 24Mukuruˀ mekelemey micinam ɓi hana na, a jam mevel haɗa ar sukumuŋhoy mucuw tuwa. 25Dar Yesu a zila taŋ, a ɓa taŋ: «Ki sinaka le, buy ngi sukwi ngi mizli gar ara tikakaˀay da mizli taŋhaya, mizli micawwahaya kwana, ara waka taŋ ti gidaŋ. 26Anja a gi kanah a wuzla kumo ta. Da mburo wuɗ le ɓa a tiri madiɗa a wuzla kumo na, anja a tiri gawla kum jaka. 27Da mbur a wuɗ le ɓa a tiri mbur ngi mbuŋ a wuzla kumo na, anja a tiri beke kum jaka. 28Naŋ kanah ya, Mangal ngi mbur a so ɓa mizli a tiram gawla naŋhay ta, amma ɓa a tiri gawla taŋ jaka, ɓa a vula hirnga naŋ ngi mbiɗa hirnga ngi mizli haɗi.»
Yesu muwuna hiri ngi dangaray cuw a Zeriko
(Yo pura Mark 10.46-52; Luk 18.35-43)
29Yesu ati mizli ngi seˀehey ara bam ti Zeriko, zigiduw haɗa ara sipaŋ. 30Dangaray ada joˀjoˀ cuw aciki jiviɗe. Taŋ micinam i Yesu macuh na, a zlaka a tilakaŋ mi, a ɓakaŋ: «Mangal ngi Davit, pura ndra ircece takwa Buy!» 31Zigiduw a buca taŋ ɓa a taˀaka mi, amma taŋ a tilam mi ti gidaŋ ma jak: «Mangal ngi Davit, pura ndra ircece takwa Buy!» 32Yesu tuwa a cici, a zilo taŋ, a ɓa taŋ: «Ki wuɗam ɓa yi gukum mike?» 33A ɓakaŋ: «I wuɗam ɓa hiri ndra a wun, Buy.» 34Yesu a pura taŋ geˀ ircece, dar a wusa taŋ avu hiri avu hiri. Angi nah si na, a puram kweŋ kweŋ muduba, a sipakaŋ.
Bible en Langue Guiziga © L’Alliance Biblique du Cameroun, 2011.