Matiye 22
22
Muguzlum madiɗa ngi vula ngwas
(Yo pura Luk 14.15-24)
1Yesu a wa ɓi weˀ ti wi da mizli ava ma, a ɓi: 2«Zumabuy ngi muŋ a bam vu ati ɓi ani: Buy madiɗa mekelem ada, a di ɗaf madiɗa ngi vula ngwas ngi mangal naŋ. 3A slina gawla naŋhay ɓa ara ziloko mizli naŋ mizila taŋ ngi vula ngwasa, amma mizli a ngumam soko ta. 4A slin gawla mekelemey ma, a ɓa taŋ: A ram, ɓaka mizli ya muzulo taŋ na: «Wurenna yi ɗiya gwat ngi zumoyo le si, gusoŋ ati ginew ɗu muzlumbraˀahaya, yi kiɗa taŋ le, yi ɗiya gwataya le gar si. Soko, ɓa i vulaka ngwasa muduba so.» 5Amma mizli naŋ muzulo taŋ tuwa a puraka ka ɓi ta wãˀ, a cohom gwaɗ taŋ: mbur numuŋ ng'ar guva naŋ, mekeleme nga gi terere naŋ. 6Mizli mekelemey a jaka gawlahay tuwa, a guzuvraka taŋ, a kiɗaka taŋ vagay vagay. 7Buy a zla a ji mevel, a slina soje naŋhay ɓa ara kiɗaka mizli mikiɗa hirnga tayna vagay vagay, a wuraka hay taŋhaya cek. 8Yo a ɓa gawla naŋhaya: «Ɗaf ngi vula ngwas a di le si, amma mizli ya muzulo taŋ na, a ndilaka ɓa a zumam ta. 9Wurenna, aram nga jiviɗ madiɗahay, ziloko mizli kum mulumam le gar, ɓa a soko zumam ɗaf ngi vula ngwasa.» 10Joˀ gawlahay a ram nga jiviɗey tuwa, a cikiloko mizli taŋ mulumam le gar, mizli mezlehey ati malambaˀhay gar. A nahaka hay ngi vula ngwasa ɗǝŋ ɗǝŋ. 11Buy a ci nga pura mizli naŋ muzulo taŋ tuwa, keɗ na, mbur mekelem akẽh, a ki di i zana ngi vula ngwas ta. 12Joˀ buy a ɓaŋ: «Ngama ɗu, ki co aka mbri manja zana ngi vula ngwasa ka?» Amma mbur tuwa naŋ teˀteˀe. 13Dar buy a ɓa gawlahaya: «Juwakaŋ saray ati haŋhaya, hizigaka ng'ar luvuŋ avra! A sa tuwuy, a sa humbuɗ sliŋ a diga.» 14«Gisiŋ, mizli mizilahaya, taŋ haɗi, amma muwunahaya, taŋ neˀkini si.»
Buutu mawurkaka da buy mimadiɗa
(Yo pura Mark 12.13-17; Luk 20.20-26)
15Dar Farisahay a kusom, a ngilam wuy ɓa a cam a kwacay Yesu, ɓa a jakaŋ ar mingiɓi naŋ. 16A slinaka mizli ngi si taŋhay ati mizli ngi si Herodoy, ara ɓaka Yesu: «Kumani, i sinaka le, ka ki ɓi ɓi mijeŋ, ki biga jiviɗ ngi Buymisemuŋ da mizli jeŋ jeŋ wãˀ gisiŋ. Ko k'anta zluwun ti mbur loŋ ta, asi ki pur di i deŋ ngi mbur ta. 17Inga ɓa ndra wuluk ɗike so: Jiviɗ ada ngi wurka buutu da buy mimadiɗa kwa, malla anta kwa?» 18Amma Yesu a si na wer taŋ le, a ɓa taŋ: «Kayya, mizli miɓi mi cuw cuwoy! Ki cam a kwacay ɗu vur mike? 19Bigikiy dala kum mawurkam di buutu vuna.» Joˀ a bigakaŋ dala purla. 20Yesu a ɓa taŋ: «Foto ati slimiɗ mutohoko anga na, i ngi waka?» 21A mbiɗakaŋ di: «I ngi buy mimadiɗa.» Dar Yesu a ɓa taŋ: «Wurkaka gwat ngi buy mimadiɗa da buy mimadiɗa, yo gwat ngi Buymisemuŋ kwana, wurkaka da Buymisemuŋ ya.» 22Taŋ micinaka ɓi hana na, a zuma taŋ hirnga le, joˀa pulakaŋ, a cohom.
Cufuɗ ar slikiɗ ngi mizli mumucahay
(Yo pura Mark 12.18-27; Luk 20.27-40)
23Kalla tapas nah vuna, mekelemey a wuzla sadukihey a soko ng'avi Yesu. Sadukiheye, taŋ a ɓam na, mizli mumucahay anta sa slikiɗam ta. A cufuɗaka Yesu: 24«Kumani, Moyis a ɓi na: «Da mbur a muc le, a pul zuŋ ta na, sey sukum naŋ a ngila ngwasa, ɓa a yi ziri da vagay sukum naŋ na.» 25Na, mizli sukumuŋhoy ada zleˀe tarnaˀ a wuzla ndra. Mudumbuŋ muɗuf ngwas a mucu, ko a pul zuŋ ta, a pula ngwasa da sukum naŋ. 26Mucuw taŋ a ngila ngwasa, naŋ kwana a muc, ko a pul zuŋ ta ma. A gi kanah avu mimakir taŋ ya, hã avu mitarnaˀ taŋ, a micam, ko a pulam zuŋ ta. 27A dirba taŋ gar na, ngwas tuwa muc aya. 28Ani so na, tapas mumucahay masa slikiɗam na, ngwas a sa ndir da wa asi taŋ ka? Asi taŋ tarnaˀ taŋ gar, a ɗuvakaŋ le.» 29Yesu a mbiɗa taŋ di: «Kumo, ki ra zizam, asi ko ki sinaka Ɓimutoho ta, ko gidaŋ ngi Buymisemuŋ, ki sinaka ta ma. 30Asi mike na, mizli mumucahay masa slikiɗam na, ziley ati ngwasay anta sa zuɓam vu mata, amma a sa ndiram kaɓa modrohoy a ciki Buymisemuŋ. 31Yo Buymisemuŋ muɓukum vur slikiɗ ngi mizli mumucahay na, ki slufaka ɓi nah ɗaˀ ta kwa? 32«Yi Buymisemuŋ ngi Abraham, Buymisemuŋ ngi Izak, Buymisemuŋ ngi Zakop.» I Buymisemuŋ ngi mizli mumucahay ta, amma i Buymisemuŋ ngi mizli misi ti siifahay.» 33Zigiduw micina mingiɓi naŋ cin cin na, gwat naŋ mudubuna taŋ di a zuma taŋ hirnga teˀe.
Ɓimuɗuva madiɗa mifineˀ mekelemey
(Yo pura Mark 12.28-34; Luk 10.25-28)
34Farisahay micinaka, Yesu a guco mi le da Sadukiheye na, a kusom. 35Mbur pal asi taŋ, i buy ngi ɓimujuwa, a cufuɗa Yesu, ɓa a ci a kwacay naŋ, a ɓaŋ: 36«Kumani, ar Ɓimujuwa na, ɓimuɗuva madiɗa anga i wanaka?» 37Yesu a mbiɗaŋ di: «Sey ki wuɗ Bumbulvuŋ ɗike, ti mevel ɗik wãˀ, ti membezleŋ ngi vu ɗik wãˀ, ti lesl ɗik wãˀ.» 38Ɓimuɗuva madiɗa yo mupuɗaw i nah. 39Mijingaˀ naŋ kwana, i madiɗa ma: «Sey ki wuɗ mbur cil ɗike, kaɓa ka mawuɗ vu ɗik vuna.» 40Ɓimujuwa ngi Moyisey gar ati ɓi ngi mijiviɗey gar na, a jumom ar ɓi mucuw hanayna.»
Kristu ati Davit
(Yo pura Mark 12.35-37; Luk 20.41-44)
41Yo Farisahay mukusom tuwa na, Yesu a cufuɗa taŋ: 42«Ki wulkam mbri ar Kristu ka? I mangal ngi waka?» A mbiɗakaŋ di: «I mangal ngi Davit.» 43Yesu a ɓa taŋ: «Na Davite, ˀUf Mipal a bigaŋ di, a zila Kristu ‹Buy› mbri mbri maka? Asi mike na, Davit a ɓi na: 44«Bumbulvuŋ a ɓa Buy ɗu: So cifi joˀ tir vay hazum ɗu, ɓa hã yi hina mesene ɗikey asi sar ɗiki.» 45Da Davit a zila Kristu ‹Buy› na, a sa tiri mangal naŋ mbri mbri maka?» 46Ko mbur pal mumbiɗaŋ di gu, anta. Zle ti hin nah na, ko mbur matum vu ngi cufuɗaŋ, anta mata.
Bible en Langue Guiziga © L’Alliance Biblique du Cameroun, 2011.