Matiye 19
19
Ɓi ngi wuɗuk ngi zil ati ngwas naŋ
(Yo pura Mark 10.1-12)
1Ti Yesu mikiɗa mi ngi ɓi nah na, a pula Galile, aru nga hirwuy Yude, a dubazaw Zurdeŋ. 2Zigiduw haɗa aru aseˀe, a mbul misi jijihey a diga. 3Farisahay a kirohoko ng'ava ɓa a cam a kwacay naŋ, a ɓakaŋ: «Mburo, naŋ da ti jiviɗ ngi ɓula ngwas naŋ vur ɓi ko wanaka gar kwa mbrike?» 4Yesu a mbiɗa taŋ di: «Zle avu zli virzi naŋ, Buymisemuŋ miga mbur na, a gi zil ati ngwas na, ki slufaka ɓi nah ɗaˀ ta kwa? 5Yo Buymisemuŋ vuna a ɓi ma: «Vurˀe, zil a sa pula cine ati mumuŋ naŋ, ɓa a sa jumom ati ngwas naŋ. Taŋ cuw taŋ a sa tiram dumvu purla.» 6Naŋ kine, t'anta cuw mata, amma i dumvu purla. Gwat Buymisemvuŋ mujumo le na, anja mbur a wunka ta!» 7Farisahay a ɓakaŋ: «Na, Moyis a ɓi: «Da mbur ara ɓula ngwas naŋ na, sey a vulaŋ ɗerewol mabiga a ɓula le na, vur mike?» 8Yesu a mbiɗa taŋ di: «Moyis a pulukum jiviɗ ngi ɓula ngwas kumoyo na, asi hirnga kumo gidaŋ haɗa. Amma angi zlivirzi naŋ na, naŋ zleˀe kanah ta. 9Yi ɓukum na: da mbur ara ɓula ngwas naŋ, ɓa a zuɓ mekelem na, a gi di i madama, sey da a zuɓa zleˀe kaɓa Ɓimujuwa mawuɗ ta far.» 10Joˀ mizli ngi seˀehey a ɓakaŋ: «Da ɓi ngi zil vur ngwasa, naŋ kahana na, zuwen a zuɓam vu mata si.» 11Yesu a mbiɗa taŋ di: «Mizli gar anta slaka wala ngi ɓi hana ta, sey mizli Buymisemuŋ muvula taŋ di le far. 12Asi mike na, mizli munguɗo miyaka taŋ cak ti yi ada. Mekelemey i mizli munguɗoko taŋ ti nguɗ. Numuŋhoy anta zuɓam vu ta asi Zumabuy ngi muŋ. Mbur masla wala naŋ gu na, anja a slaŋ!»
Yesu muɗuwula mi da ziri memeɗehey
(Mark 10.13-16; Luk 18.15-17)
13Akẽh na, mizli a soko ti ziri ng'avi Yesu ɓa a buca haŋ a hirnga taŋ ti dira dibiɗ, amma mizli ngi seˀehey a bucaka taŋ. 14Yesu a ɓi: «Pulaka ziri a soko ng'avi ya, ki tikaka taŋ ta, vur Zumabuy ngi muŋ i ngi mizli misi ka taŋ na.» 15A dirba naŋ mubuca haŋ a hirnga taŋ na, a cuh ti kẽh.
Mbur gawla misi zlili
(Yo pura Mark 10.17-31; Luk 18.18-30)
16Mbur mekelem ada, a kiroho ng'avi Yesu, a ɓaŋ: «Kumani, sey yi gi gwat mezle wana ɓa yi lum siifa ngi sete ka?» 17Yesu a ɓaŋ: «Ki cufuɗiy vur gi gwat mezle vur mike? Mbur mezle naŋ purla tewle. Da ki wuɗ le ɓa ki lum siifa na, ja ɓimujuwa a hirnga.» 18Mbur tuwa a cufuɗa Yesu: «I ɓi wanahay ka?» Yesu a mbiɗaŋ di: «Ki kiɗ hirnga ta. Ki gi madama ta. Ki hul ta. Ki gi sedewo ti slir ta. 19Ɗuva hirnga da bunuk ati munuko. Yo wuɗ mbur cil ɗike, kaɓa ka mawuɗ vu ɗik vuna na.» 20Gawla tuwa a ɓaŋ: «Ɓi tayna, yi ja taŋ le a hirnga gar. Mikic avu ya i mi maka?» 21Yesu a ɓaŋ: «Da ki wuɗ le ɓa ɓi a kic avu ka ta na, a ru, hiɗika gwat ɗikey gar avra, vula dala nah da misi murgahay, ɓa kisa lum zlili ngi muŋ. A dirba nah, so sipiy so!» 22Gawla tuwa micina ɓi hana na, a cuh ti ndurɓo hiri, asi zlili ava haɗa. 23Dar Yesu a ɓa mizli ngi seˀeheye: «Gisiŋ, yi ɓukum na, naŋ tuwaˀ ɓa mbur misi zlili a ci ng'ar Zumabuy ngi muŋ. 24Yi mukum hiri naŋ ava ma, zlogomo a ci kutum tir vigiɗ ngi batala fineˀ mbur misi zlili maci ng'ar Zumabuy ngi muŋ.» 25Mizli ngi seˀehey micinaka ɓi hana na, a zuma taŋ hirnga teˀe, a ɓam: «Da kine na, mbur masa lih ada kwa?» 26Yesu a ɗuva hiri taˀ angi taŋ, a ɓa taŋ: «Avi mizli na, a gi ta wãˀa, amma avu Buymisemuŋ, gwat gar a gi gu.» 27Joˀ Piyer a ɓaŋ: «Ani, ndra i puloko gwat ndraˀahaya le gar, i supukuw le. Masa gi avu ndra i mi ska?» 28Yesu a ɓa taŋ: «Gisiŋ, yi ɓukum na: Tapas gwatay gar masa mbiɗam nawayaŋ, yo tapas Mangal ngi mbur masa cifi ar janga naŋ ngi buy misi ti dudok na, kum misipi ɗuwoyo, kisa cifam ar janga ngi buy madiɗahay kuruˀ nga cuw aya, ɓa ngi gi kiita da sukwi ngi Israyel muwunuk taˀ taˀ kuruˀ nga cuw na. 29Ko wa gar mupulo hay naŋ le asi ya, sukum naŋ mizilehey ati mongosohoy, cine, mumuŋ, ziri naŋhay, malla guva naŋhay na, a sa lum fineˀ tayna makaw mbeˀ mbeˀe, yo a sa lum siifa ngi sete. 30Mizli mudumbuŋhoy wurenna haɗi a sa tiram ngi dirbahay, yo ngi dirbahay wurenna haɗi a sa tiram mudumbuŋhoy.
Bible en Langue Guiziga © L’Alliance Biblique du Cameroun, 2011.