Matiye 15
15
Sirik muso ti vu dideˀ ngi Yudehey
(Yo pura Mark 7.1-13)
1Akẽh na, Farisahay ati buy ngi ɓimujuwa ngi Zeruzalemey a kirohoko ng'avi Yesu, a ɓakaŋ: 2«Mizli ngi si kahay anta sipaka sirik ndra mulumoko di avu dideˀ ndraˀahaya ta na, vur mike? Asi mike na, da ara zumam gwat na, anta bunaka haŋ ceɗ le kaɓa sirik ndra ta.»
3Yesu a mbiɗa taŋ di: «Na kumo, ki ngilaka ɓimuɗuva, ɓa ki sipam sirik ngi dideˀ kumoy na vur mike? 4Buymisemuŋ a ɓi na: ‹Ɗuva hirnga da bunuk ati munuko›, waɗ ma na, ‹Mbur manisa cine malla mumuŋ na, sey a kiɗaka vagay.›#15.4 Bi 20.12; Sluf m 5.16; Bi 21.17. 5Amma kumo, ki ɓam, ko wa gar maɓa cine malla mumuŋ: ‹Gwat ya mawuɗ i jinuw zleˀe ti naŋ na, i muvula le da Bumbulvuŋ› na, 6naɓa naŋ anta ti may ngi ɗuva hirnga da cine mata. Naŋ kanah, ki hiryaka ɓi ngi Buymisemuŋ le, ɓa ki sipam sirik ngi dideˀ kumoy. 7Kum miɓi mi cuw cuwoy! Ezayi a njika ɓi nga naŋ mijiviɗe le kaslsla vur kumo, a ɓi na:
8«Mizli tayna a ɗuvikiy hirnga ti mi tewle, amma mevel taŋ, naŋ kileŋ avu ya.
9Taŋ maputukulom a mbuŋ ɗu na, i ngataraŋ, asi ɓi taŋ madubunaka da mizli, i ɓi ngi mizli ɓi micicaka si.»
Gwat maci ti mbur ar dili
(Yo pura Mark 7.14-23)
10Yo Yesu a zila zigiduw, a ɓa mizli: «Cinam, yo slaka wala ngi ɓi anihĩ: 11Maci ti mbur ar dili i gwat maci nga balam ta, amma maci ti mbur ar dili na, i gwat mabo ti balam jaka.»
12Dar mizli ngi seˀehey a kirohoko, a ɓakaŋ: «Farisahay micinaka mingiɓi ɗik na, a jam mevel le na, ki si na le ya?»
13Yesu a mbiɗa taŋ di: «Widis gar, da i Cine ɗu misi a muŋ mihirva ta na, a sa muɗaka avra. 14Pulaka taŋ, i dangar miɗiɗa dangar cil taŋhay. Da dangar ara ɗiɗi dangar cil naŋ na, taŋ cuw taŋ a sa ndilam ng'ar vigiɗi.»
15Piyer a zla a ɓaŋ: «Ɓi hana a bo njak wãˀ ta, inga biga ndra pulaˀavra nah takwa.»
16Yesu a ɓi: «Hã wurenna, kumo kwana, kum i manja lesley aya kwa? 17Gwat mbur maca nga mi gar na, aru nga kwacay, a dirba nah, a sa bo ng'ar vigiɗ na, ki sinaka ta kwa? 18Amma gwat mabo ti balam mbur na, a bo zle a mevele, maci ti mbur ar dili na, i nah so. 19Asi wuluk malambaˀ, kiɗa hirnga, gi madama, gi sulome, hul, sedewo ti slir, zi vu gar na, i gwat mabo zle a mevel mburu. 20Maci ti mbur ar dili i naŋ. Amma zuma gwat manja buna haŋ na, anta ci ti mbur ar dili ta.»
Ngwas Kanaˀan mitiɓa Yesu a mevele
(Yo pura Mark 7.24-30)
21Yesu a slikiɗ baɗ akẽh, aru ng'ar hirwuy Tir ati Sidoŋ. 22Keɗ na, ngwas Kanaˀan a so ti kẽh, a zla tila mi da Yesu, a ɓaŋ: «Aw mangal ngi Davit, puriy ircece takwa Buy! Zuŋ ɗu ani, setene a hirnga, ara gaŋ bonoy haɗi teˀe.»
23Amma Yesu a mbiɗaŋ mi ko pal ta. Mizli ngi seˀehey a kirohoko ng'ava, a ɓakaŋ: «Ɓula ngwas hana, ɓa aru so, vur ara sipa ndra ti widi.»
24Yesu a mbiɗa: «A slinoko ya ng'avu tumuŋ miziza ngi Israyeley tewle.»
25Amma ngwas tuwa a so girdiˀ a mbuŋ naŋ, a ɓaŋ: «Aw Buy, jiniy!»
26Yesu a mbiɗaŋ di: «Ɓa ngi zuɓa gwat ngi zum ngi ziri, ngi hiziga da ziri kirihey na, a zlir ta.»
27Ngwas a ɓaŋ: «Kanah ɓula Buy, amma ko ziri kirihey vuna kwana, a zumam di i misi mi ngi buy taŋhay madiɗo nga ruwuy na takwa?»
28Akẽh na, Yesu a mbiɗaŋ di: «Ngwasa, tiɓi ɗike naŋ haɗa! Anja a gi kaɓa ka mawuɗo.» Joˀ zuŋ naŋ a ɗiyi hirak ti nah vuna si.
Yesu mumbul misi jijihey haɗi
29Yesu a slikiɗ baɗ ti kẽh, aru nga mi yam madiɗa ngi Galile. A jiɗ nga muwã, a cifi a diga. 30Zigiduw haɗa a so ng'ava, a soko ti jegwerey, dangaray, mumuca haŋ malla saray, mizli misi irne mingbaˀahay ati misi jiji mekelemey wal wal haɗi. A soko taŋ a mbuŋ Yesu, a ɗiya taŋ. 31Mizli misi irne mungbaˀahay ara ɓam calala, mumuca haŋ malla saray a ɗiyam le kuy kuy, jegwerey ara ram kuy kuy, dangaray ara puram. Zigiduw mapura taŋ gar na, hã ɓi nah a zuma taŋ hirnga haɗa. Joˀ a gaka dudok da Buymisemuŋ ngi Israyele.
Yesu mimba mizli durmuk mufaɗa
(Yo pura Mark 8.1-10)
32Yesu a zila mizli ngi seˀeheye, a ɓa taŋ: «Yi pura mizli hanayna geˀ irceceˀ, ani a gam le hin makir a ciki ɗu aka, t'anta ti gwat ngi zum ta. Ɓa yi waha taŋ, a ram ti may na, i ngum ta, naɓa may a sa sla taŋ zlambar a jiviɗe.»
33Mizli ngi seˀehey a ɓakaŋ: «Zigiduw mitaˀ hana, i sa lumoko ɗaf zliv ngi mba taŋ ama a ɓuh aka ka?»
34Yesu a ɓa taŋ: «Kum ti ɗaf kite ka?» A mbiɗakaŋ di: «Tarnaˀ waɗ kilif memeɗehey ada neˀ ma.»
35Dar Yesu a ɓa zigiduwo, ɓa a cifi a ruwuy. 36A dirba nah na, a hila ɗaf mitarnaˀ ati kilif memeɗehey tuwa, a ga sise da Buymisemuŋ, a ngila taŋ, a vula da mizli ngi seˀeheye, joˀ taŋ kwana, a vulaka da zigiduw aya. 37Taŋ gar a zumam, hã a mbam. A cikilaka is naŋ mindire gadagar caɓ caɓ tarnaˀ. 38Mizli muzumama, zileye taŋ durmuk mufaɗ, mbak ngwasay ati ziri le. 39A dirba Yesu muwaha zigiduwo na, a ci palalam, aru ng'ar hirwuy Magadaŋ.
Bible en Langue Guiziga © L’Alliance Biblique du Cameroun, 2011.