Matiye 16
16
Farisahay ati Sadukihey mucufuɗam cekene
(Yo pura Mark 8.11-13; Luk 12.54-56)
1Farisahay ati Sadukihey a kirohoko ng'avi Yesu, ɓa a cam a kwacay naŋ. A cufuɗakaŋ ɓa a ga taŋ cekene maso ti vu Buymisemuŋ. 2Amma Yesu a mbiɗa taŋ di: «Da pas a diɗ le na, ki ɓam: ‹Tiprike muŋ njoŋ, asi muŋ naŋ gagaza ciihe.› 3Ti miprike ma na, ki ɓam: ‹Dana, muŋ kuy ta, asi muŋ naŋ gagaza, ndilimme.› Gwatay magam a muŋ kanah na, ki slaka wala taŋ gu ɓula. Na, cekene ya maga taŋ angi hin dana na, ki slaka wala taŋ gu ta mbrike! 4Mizli malambaˀ migwenehey, migi madamahay. Ki cufuɗam cekene avu ya, amma kum anta sa lumam cekene ko pal ta, sey ngi Zonas na si.» Yesu a cuh, a pula taŋ hirkim akẽh.
ˀIs ngi slikiɗa hapa ngi Farisahay ati ngi Sadukihey
(Yo pura Mark 8.14-21)
5Mizli ngi si Yesuhoyo, ti taŋ matuwuɗam nga dubazaw mekelem na, a puyukam hirnga le ngi ru ti ɗaf a haŋ. 6Dar Yesu a ɓa taŋ: «Jam lesl, wam vu avu ˀis#16.6 ˀIs i gwat ngi slikiɓa hapa ngi di ɗaf. ngi slikiɗa hapa ngi Farisahay ati ngi Sadukiheye.» 7Mizli ngi seˀehey a wulkam a mevel taŋ, a ɓam: «Asi ndra musoko ti ɗaf a haŋ ta na.» 8Amma Yesu a si na wuluk taŋ le, a ɓa taŋ: «Kum mizli misi tiɓi keɗeccehey, ki wulkam a mevel kumo vur kum musoko ti ɗaf a haŋ ta vur mike? 9Ki cinam t'aruŋ kwa? Peŋ zlum muwunkaka da mizli durmuk zlum na, mindir naŋ, ki naham di gadagar caɓ caɓ kite ka? Anta sukum ŋkeŋ a hirnga ta kwa? 10Yo ɗaf tarnaˀ muwunkaka da mizli durmuk mufaɗ na, mindir naŋ, ki naham di gadagar caɓ caɓ kite ka? Anta sukum ŋkeŋ a hirnga ta kwa? 11Ya muɓukum: wam vu avu ˀis ngi slikiɗa hapa ngi Farisahay ati ngi Sadukihey na, i ɓukum di i ɓi ngi ɗaf ta na, ki cinam ta mbrike?» 12Joˀ a sinaka muduba, Yesu miɓa taŋ na, ɓa a wam vu avu ˀis ngi slikiɗa ɗaf kanah ta, amma ɓa a wam vu avu gwat Farisahay ati Sadukihey madubunaka da mizli.
Piyer miɓa njah, Yesu i Kristu
(Yo pura Mark 8.27-30; Luk 9.18-21)
13Ti Yesu mindil ar prok ngi Sezare ngi Filip na, a cufuɗa mizli ngi seˀeheye: «Mizli a ɓam mbri vur Mangal ngi mburo ka?» 14A ɓakaŋ: «Mizli mekelemey a ɓam: ki Zaŋ mici mizli ar yam. Numuŋhoyo, ki Eli. Mekelemeye ma na, ki Zeremi, malla ki mbur purla ngi si mijiviɗey.» 15Yesu a ɓa taŋ: «Na kumo, ki ɓam yi waka?» 16Simoŋ Piyer a slaŋ di: «Ki Kristu, Mangal ngi Buymisemuŋ misi ti siifa.» 17Dar Yesu a mbiɗaŋ di: «Ki ra mumul, Simoŋ mangal ngi Zonas! Asi ɓi ka miɓa na, i mbur titra mubuguw di ta, amma i Baha misi a muŋ mubuguw di. 18Ya i ra ɓuw njah Piyer: ka ki mandazlay muwã, Cikil ngi misikristuhoyo, i sa ndira ar mandazlay hana, ko gidaŋ ngi muc anta sa gaŋ gwat neˀ ta. 19I sa vuluw lakle ngi Zumabuy ngi muŋ. Gwat gar ka misa juwa ɓi nah le a ruwuyo na, a sa juwaka ɓi nah a muŋ aya. Gwat gar ka misa pusuka ɓi nah le a ruwuyo na, a sa puskaka ɓi nah a muŋ aya.» 20Joˀ Yesu a buca mizli ngi seˀeheye, ɓa a ɓaka mizli, naŋ i Kristu ta wãˀ.
Yesu miɓa ɓi ngi muc naŋ ati ngi slikiɗ naŋ ti wuzla mumucahay
(Yo pura Mark 8.31—9.1; Luk 9.22-27)
21Zle tapas nah na, Yesu a zla a biga njah da mizli ngiseˀeheye, a ɓa taŋ: «Anja yi ru nga Zeruzalem ɓa ngi si bonoy haɗi a haŋ mizli micawwahay, a haŋ madiɗa migi mikulihey ati buy ngi ɓimujuwahay, ɓa a kiɗikiy vagay, amma angi hin mimakir naŋ na, i sa slikiɗ a muŋ.» 22Piyer a zila Yesu baˀ pal naŋ, a zla a mbiɗaŋ hirnga: «Kay, anja Buymisemuŋ a tika Buy! Anja gwat hana a gi avu ka ta wãˀ si!» 23Amma Yesu a mbiɗa duba da Piyere, a ɓaŋ: «Kirih kileŋ avu ya, Satan! Ki ra wuɗ ɓa ki biy sar, asi wuluk ɗik i wuluk ngi Buymisemuŋ ta, amma i wuluk ngi mizli si.» 24Dar Yesu a ɓa mizli ngi seˀeheye: «Da mbur a wuɗ ru le asi ya na, sey a pula wuluk vur hirnga naŋ, a zuɓa dum naŋ mizlira, a sipa sar ɗu. 25Vur ko wa gar mawuɗ laha siifa naŋ na, a sa zizaŋ, amma ko wa gar maziza siifa naŋ asi ya na, a sa lumaŋ. 26Da mbur a luuma gwat ngir duniya le gar, amma da a ziza siifa naŋ le aseˀe na, a lum di mike? Malla mbur a hiɗik siifa ti gwat naŋ muluma gu kwa? 27Vurˀe, Mangal ngi mbur a sa sawa ati modro naŋhaya ti dudok ngi Cine. Joˀ a sa wurka mburo gar weˀe avu gwat ngi gi naŋ. 28Gisiŋ, yi ɓukum na, mizli mekelemey a wuzla kum aka anta sa micam ta, sey da a puraka Mangal ngi mbur masa so ngi zuma buyo le far.»
Bible en Langue Guiziga © L’Alliance Biblique du Cameroun, 2011.