Matiye 14
14
Muc ngi Zaŋ mici mizli ar yam
(Yo pura Mark 6.14-29; Luk 9.7-9)
1Ti di nah na, Herod, buy miwi hirwuy Galile a cine slimiɗ ngi Yesu mazil na le. 2Joˀ a ɓa mizli naŋhaya: «Mbur nah vuna, i Zaŋ mici mizli ar yam tuwa! I naŋ mislikiɗ ti wuzla mumucahay, naŋ misi ti gidaŋ ngi gi cekenehey na vurˀe.» 3Asi mike na, mupula jiviɗ ɓa a jaka Zaŋ i Herod vuna. A juwakaŋ, a kaka ar dangay asi Herodiyad, ngwas ngi sukum naŋ Filip. 4Asi Zaŋ a ɓa Herodo zleˀe: «Ɓa ki zuɓa Herodiyad, ki tiri di ngwas ɗik na, a gi ta.» 5Herod a wuɗ kiɗ naŋ vagay so na, amma ara zluwun ti zigiduw, asi zigiduw gar a sinaka le, Zaŋ i mijiviɗi. 6Yo ti Herod magi muguzlum ngi yi naŋ na, zuŋ diili ngi Herodiyad a ɓuruk a mbuŋ mizli miziloko taŋ tuwa. Herod a hĩyã teˀe, 7hã a hudum, a ɓi ɓa gwat naŋ masa cufuɗ gar na, a sa vulaŋ di.
8Zuŋ tuwa, mumuŋ a paŋ mi, a ɓa Herodo: «Vuliy hirnga ngi Zaŋ mici mizli ar yam ɓaˀ ar taasa aka!»
9Buy Herod a hĩyã ta wãˀ, amma gar ti nah kwana, gwat zuŋ mucufuɗa na, a ɓi ɓa a vulakaŋ di, vur a hudum le a mbuŋ mizli, naŋ muzulo taŋ tuwa. 10Dar a slin ɓa ara bukoko hirnga ngi Zaŋ ar dangaya. 11Joˀ a soko ti hirnga naŋ ɓaˀ ar taasa, a vulaka da zuŋ diili tuwa. Zuŋ kwana ar di da mumuŋ. 12Mizli ngi si Zaŋhay a soko, a zuɓaka vagay naŋ, ara dikakaŋ. A dirba nah na, ara slufaka labara nah da Yesu.
Yesu mimba mizli durmuk zlum
(Yo pura Mark 6.30-44; Luk 9.10-17; Zaŋ 6.1-14)
13Ti Yesu micina labara nah na, a ci palalam, a bi silaŋ nga ɓuh. Zigiduwo kwana, a cine le ya, mizli a bam tir walahayaya, dar a sipakaŋ ti sar. 14Ti naŋ mabo tir palalama na, a pur zigiduw haɗa. A pura taŋ geˀ irceceˀ, a ɗiya misi ble taŋhaya. 15Hiikuɗ a ji le, mizli ngi seˀehey a kirohoko ng'avaŋ, a ɓakaŋ: «Li hana i ɓuh, ani li a cuh le si. Waha zigiduwo ɓa ara hiɗikam gwat ngi zum ar walahay.
16Amma Yesu a ɓa taŋ: «Tˀanta ti may ngi ru ta. Kum vuna, vulaka taŋ gwat ngi zumo si.»
17Dar a ɓakaŋ: «Avu ndra sey ɗaf zlum ati kilif cuw tewle.»
18Yesu a ɓa taŋ: «Sikiy taŋ ng'aka.»
19A dirba naŋ miɓa zigiduw, ɓa a cifam ar giziŋ misilip silip na, a zuɓa ɗaf muzlum ati kilif mucuw tuwa, a zuɓa hiri nga muŋ, a ɗuwul mi araŋ. Joˀ a ngila ɗafahay tuwa, a vula da mizli ngi seˀeheye, ɓa a wunkaka da zigiduwo. 20Taŋ gar a zumam hã a mbam. A cikilaka is naŋ mindire, gadagar caɓ caɓ kuruˀ nga cuw! 21Yo mizli muzumam vuna, taŋ zileye, a gam gwat ngi durmuk zlum, mbak ngwasay ati ziri le.
Yesu muru ti sar ar yam
(Yo pura Mark 6.45-52; Zaŋ 6.15-21)
22A dirba nah kutum si na, Yesu a tika ˀay da mizli ngi seˀeheye, ɓa a cam palalam, a tuwuɗam cici nga dubazaw vay mekelem. 23A dirba naŋ muwaha zigiduw na, a jiɗ nga muwã, ɓa a dir dibiɗ silaŋ pal naŋ. Hiikuɗ a ji di, naŋ pal naŋ a diga. 24Palalama naŋ zar avu ay didike, a gi metir skat mbeˀmbeˀ si. Diɓel ngi yam ara dumbusla palalama, asi burkataŋ ara gi puɗak angi taŋ. 25Gweˀ ng'avi miprik na, Yesu ara ru ti sar ar yama ng'avi taŋ. 26Mizli ngi seˀeheye mupuraka naŋ maru ti sar ar yam tuwa na, a muɗa taŋ membezleŋ haɗi, a ɓam: «I musuɗuk ngi mbur mumuca!» A wudam asi zluwun ara ga taŋ haɗa. 27Amma ar nah vuna si na, Yesu a ɓa taŋ: «Tumom vu, ki zluwunam ta, i ya!» 28Piyer a zla a ɓaŋ: «Buy, da i ka gisiŋ na, ɓiy ɗaˀ ɓa yi ru ng'avi ka ti sar tir yam vuna aya.» 29Yesu a ɓaŋ: «Sawa.» Joˀ Piyer a bi tir palalama, ara ru ti sar ar yama ng'avu Yesu. 30Amma naŋ mapura burkataŋ magi na, a zluwun, a zla ara ci ng'asi yam, a widi, a ɓi: «Buy, lihiy!» 31Ar nah vuna si na, Yesu a tilaŋ haŋ, a jo di, a ɓaŋ: «Ka mbur misi tiɓi keɗecce! Ki wuluk cuw cuw vur mike?» 32Yo ti taŋ micam ng'ar palalama si na, burkataŋ a cici. 33Mizli ngi seˀehey misi angi palalam tuwa a dilkam a mbuŋ naŋ, a ɓakaŋ: «Ka ki Mangal ngi Buymisemuŋ gisiŋ.»
Yesu mumbul misi jijihey angi hirwuy Zenezaret
(Yo pura Mark 6.53-56)
34A dirba taŋ mutuwuɗaka yama na, a ndilam angi hirwuy Zenezarete. 35Mizli ngir li nah a sinaka Yesu le si, a slinam ti ɓi nah asi ruwuy taŋ keɗeɗe. Dar mizli a sakaŋ ti misi jijihey gar. 36A tumbuloko Yesu anja a pula misi jiji taŋhaya, ɓa a wusakaŋ avu mi ngi zana tekeɗe kwana, muk si. Muwus naŋhay gar na, a mbulom le.
Bible en Langue Guiziga © L’Alliance Biblique du Cameroun, 2011.