BI NGI ISRAYELEY 4

Buymisemuŋ mibiga gidaŋ naŋ da Moyis

1Moyis a mbiɗa da Bumbulvuŋ: «Na yi pura na! T'anta sa tiɓaka ɓi ɗu ta, t'anta sa tiɓaka mi ɗu ta. A sa ɓam: Bumbulvuŋ a buguw vu ta!» 2Bumbulvuŋ a ɓaŋ: «Misi a haŋ ɗik na i mike?» Moyis a ɓaŋ: «I ganday.» 3Bumbulvuŋ a ɓaŋ: «Hiziga nga ruwuy.» Moyis a hiziga gandaya: ganday tuwa, a tiri kaw, joˀ Moyis a kil di. 4Bumbulvuŋ a ɓa Moyise: «Tila haŋ, ja tivi dangwal, zuɓa.» A tila haŋ, a jaŋ, joˀ kaw tuwa, a tiri ganday a muŋ. 5Ɓa a sinaka Bumbulvuŋ, Buymisemuŋ ngi Abraham, ngi Izak, yo ngi Zakop a buguw vu le na, naŋ kahana so. 6Bumbulvuŋ a ɓaŋ ma: «Buca haŋ a didaka.» Moyis a buca haŋ bac, a zuɓa paɗ na: haŋ a tiri le babara ka gugumay, a ngil kukula le. 7Bumbulvuŋ a ɓaŋ: «Buca haŋ a didak a muŋ.» Moyis a buca haŋ bac, a zuɓa paɗ ti didaka na: a tiri le nga naŋ nga naŋ a muŋ. 8Bumbulvuŋ a ɓaŋ: «Na da Israyeley a tiɓaka ɓi ɗike ta, yo a tiɓaka mi ɗike vur cekene mudumbuŋ na ta na, a sa tiɓaka mi ɗike asi cekene mucuw naŋ na. 9Na da a tiɓaka cekene mucuwoy na ta wãˀ, a tiɓaka mi ɗike ta na, kisa nuw yam na a mizaw, ki zluva zlav a ruwuy, yam tuwa, a sa tiri pumbus a ruwuyo.»

Bumbulvuŋ muzuɓa Aroŋ ɓa a tiri mucuw ngi Moyis

10Moyis a ɓa Bumbulvuŋ na: «Ambuh takwa Bumbulvuŋ ɗu, yi si na ɓi ɓi ɗaˀ ɗaˀa ta, zlezle vuna, i si na mi ta, ko zle ti ka maɓiy ya gawla ɗik vuna si na, i si na mi ta si. I ɓa mi tuwaˀ tuwaˀ, irne ɗu naŋ gbiˀgbiˀ haɗa.» 11Bumbulvuŋ a ɓaŋ: «Muvula mi da mbur vuna i waka? Maga mbur ɓa a ɓi ɓi gu ta malla i midigizla, ɓa a pur malla ɓa i dangar na i waka? I ya Bumbulvuŋ takwa? 12Wurenna, aru, YˀADA ati ka ar mingiɓi ɗike, i sa dubunuw ɓi ka masa ɓa.» 13Moyis a mbiɗaŋ di: «Ambuh takwa Bumbulvuŋ, slin mbur ka muwuɗ le gar ɓa ara ɓa ɓi nah!» 14Bumbulvuŋ a zuɓ himaˀ angi Moyise, a ɓaŋ: «Sukum ɗik Aroŋ mbur levi na, naŋ anta kwa? Yi si na le, naŋ a si na mingiɓe le kaf kafa. Naŋ vuna n'ani, ara bawa nga ji ti ka hirnga. Naŋ misa puruw le na, a sa mumul a mevele. 15Ki sa ɓaŋ, kisa slufaŋ mingiɓi naŋ masa ɓa. Ya so na, Y'ADA ati ka ar mingiɓi ɗike waɗ ar mingiɓi nga naŋ, i sa dubunukum gwat kum masa gaka. 16Naŋ a sa ɓa mizli ar deɗe ɗike, masa ɓa mingiɓi ɗik i naŋ, yo ka kisa tiri kaɓa buymisemuŋ#4.16 Moyis a ɓa mingiɓi naŋ da Aroŋ kaɓa Buymisemuŋ maɓa mingiɓi naŋ da mijiviɗi. Pura Bi 7.1 . . Naŋ mabigaŋ mingiɓi. 17Ganday hana tuwa, zuɓa kaw a haŋ! Ki sa gaka cekeneheye ti naŋ.»

Moyis mimi ng'avi mizli naŋhay a Ezipte

18Moyis a mi, aru ng'avu jomo naŋ Zetro, a ɓaŋ: «Yi cuh le, i mi ng'avu sukum ɗuwoy a Ezipte, i ra pura taŋ, da t'ada ti siifa aruŋ kwa mbrike na.» Zetro a ɓa Moyise: «Aru zuy!» 19Dar Bumbulvuŋ a ɓa Moyis a hirwuy Madiyana na: «Mi, aru nga Ezipte, asi mizli mawuɗam kiɗ ɗik vagay gar na, a micam le.» 20Moyis a zuɓa ngwas naŋ waɗ ziri naŋhaya, a hila taŋ a duba zungu, a mi nga hirwuy Ezipte a muŋ. Moyis a zuɓa ganday ngi Buymisemuŋ kaw a haŋ. 21Bumbulvuŋ a ɓa Moyise na: «Ti ka mira mi le nga Ezipte na, pura ɗi! gwat migam ɗaˀ tahay, ya muvuluw gidaŋ ngi gi taŋ na, kisa ga taŋ a mbuŋ buy madiɗa ngi Ezipte. Yi sa gaŋ hirnga gidaŋ ɓa a ngum ta, yo ɓa a pula mizli ɗuwoy a ram ta. 22Ki sa ɓa buy Ezipte na: Bumbulvuŋ a ɓi na: Mangal ɗu modogom i Israyel. 23I ɓuw na: Pula mangal ɗu ɓa ara giy mikuli, yo ki pulaŋ ɓa a ru ta! Da kine na, i kiɗa mangal ɗik modogomo vagay so.» 24Na taŋ misi a jiviɗ aruŋ sina, Bumbulvuŋ a gumbaˀa Moyise kutum, a wuɗ ɓa a kiɗa vagay. 25Akẽh na, Sefora a zuɓ ɗugur mazum raɓ raɓ, a ca mangal a mizaw, ara sohõ pumbus naŋ da mbuŋ ngi Moyis, dar a ɓaŋ: «Ki zil ɗu ngir pumbusu.» 26Dar Bumbulvuŋ a pulaŋ. Sefora miɓi: «Zil ngir pumbus» na, vur ci mizaw nah. 27Bumbulvuŋ a ɓa Aroŋ na: «Aru, ara ji hirnga ti Moyis a wuzla ɓuh mikirɗak kirɗaka.» Aroŋ a ru, ara luumaŋ a muwã ngi Buymisemuŋ, a jaŋ kuɓuy. 28Moyise, mingiɓi Bumbulvuŋ mislinaŋ ɓa ara ɓa na, a slufa da Aroŋ tuwa gar, waɗ a slufaŋ ɓi ngi cekenehey naŋ mupulaŋ jiviɗ ɓa a ga taŋ tuwa gar. 29A dirba nah, Moyis ati Aroŋ, a ram cuw taŋ, ara cikilaka mizli micawwa ngi Israyeleye gar. 30Dar Aroŋ a mataŋ hiri ngi ɓi Bumbulvuŋ miɓa ɗaˀ le Moyis tuwa gar, a ga cekenehey a mihiri ngi Israyeleye. 31Mizli a tiɓakaŋ, taŋ mislaka wala nah, Bumbulvuŋ a so le a jiniˀis tisi Israyeley, yo a pura bonoy taŋ le na, a hurkom a mbuŋ naŋ, a gakaŋ dudok.

Currently Selected:

BI NGI ISRAYELEY 4: BEGDC

Highlight

Copy

Compare