BI NGI ISRAYELEY 3

1Moyis ara jigin ginew ngi jomo naŋhay Zetro, masay ngi hirwuy Madiyan. Aru ti gineweye tuwaɗ wuzla ɓuh, a ndila muwã ngi Buymisemuŋ a Horep. 2Modro ngi Bumbulvuŋ a bigaŋ vu ar irne vu, a wuzla sisim. A pura ngrimme: Sisim ara tiɓi vu ɓula, amma naŋ anta wur ta. 3Moyis a ɓi: «I ru balla ɓa i ra pura gwat ngi zuma hirnga nah vuna: Sisim mawur ta na vur mike?» 4Bumbulvuŋ a pura na, Moyis ara ru balla ɓa a puraŋ, joˀ Buymisemuŋ a zilo di ti wuzla sisime: «Moyis! Moyis!» Moyis a zilaŋ mi: «Y'ani!» 5Bumbulvuŋ a ɓaŋ: «Ki kiroho ng'aka ta! Cuko tarak ngi sar ɗikey avra, asi li ka mideŋ ara na, i li ngi Buymisemuŋ.» 6Buymisemuŋ a ɓaŋ: «Yi Buymisemuŋ ngi dideˀ ɗikey, Abraham, Izak, waɗ Zakop.» Moyis a sirta hiri sirit, asi a zluwun ti Buymisemuŋ. 7Bumbulvuŋ a ɓi: «I pura bonoy ngi mizli ɗuwoy misi a Ezipte na le, yo i cine widi taŋ, asi buy ngi slrahay makiɗaka taŋ na le. Haˀaw i si na bonoy taŋ le. 8I po sar le ɓa i laha taŋ tisi haŋ ngi Ezipteheye, yo ɓa i ru ti taŋ tir hirwuy hana, nga hirwuy mezle mikirngiŋ, ngir ti ruwuy misi ɗuwa ati mam, ara ɓulom ara, ngir tivi hirwuy Kanaˀanay, Hitihey, Amorihey, Perizihey, Hivihey waɗ Zebusihey misi araŋ. 9Ani wurenna, widi ngi Israyeley, a ndilo le sesẽŋ avu ya, i pura bonoy Eziptehey magaka taŋ di na le? 10Wurenna, aru, yi slinuw ng'avu buy madiɗa ngi Ezipte, ara bo ti mizli ɗuwoy, Israyeley ti hirwuy Ezipte avra.»

Bumbulvuŋ mibiga slimiɗ naŋ da Moyis

11Moyis a ɓa Buymisemuŋ na: «Yi wa ɓa i ru ng'avu buy madiɗa ngi Ezipte, yo ɓa i bo ti Israyeley ti hirwuy Ezipte ka?» 12Buymisemuŋ a mbiɗaŋ di: «Y'ada ati ka, yo gwat masa biga i ya mislinuw na, anihĩ: Da ki bo ti Israyeleye le ti hirwuy Ezipte na, kisa huruk hurukam a mbuŋ ɗu, ya Buymisemuŋ a muwã hana.» 13Moyis a mbiɗa da Buymisemuŋ na: «Pura ɗi! I sa ru ng'avi Israyeleye so, i sa ɓa taŋ: Buymisemuŋ ngi dideˀ kumoy a slino ya le ng'avu kum. Da a ɓikiy le: Slimiɗ naŋ mbrike na, i sa ɓa taŋ mbrike?» 14Buymisemuŋ a mbiɗa da Moyise: «Kisa ɓa taŋ, a zilikiy Y'ADA YA YAHHA.» A ɓi: «Ki sa mbiɗa da Israyeleye kahana: Y'ADA mislino ya ng'avu kum.» 15Buymisemuŋ a ɓa Moyise ma: «Ki sa ɓa Israyeleye na: BUMBULVUŊ, Buymisemuŋ ngi dideˀ kumoy, Abraham, Izak, waɗ Zakop, a slino ya le ng'avu kum. Slimiɗ ɗu i hana ngi caˀa, a sa zilikiy nga mbuŋ nga mbuŋ ndrehhe kahana. 16Aru, cikila mizli micawwa ngi Israyeleye, ɓa taŋ na: Bumbulvuŋ, Buymisemuŋ ngi dideˀ kumoy, Abraham, waɗ Zakopo, a bigiy vu le, a ɓiy na: I juwa le a mevel ɗu ɓa i kil widi kumo, asi gwat magukum di a Ezipte na. 17Yo yi ɓi: I sa bi ti kum tir bonoy kum a Ezipte na nga hirwuy ngi Kanaˀanay, Hitihey, Amorihey, perizihey, Hivihey ati Zebusihey misi araŋ, nga hirwuy misi ɗuwa ati mam maɓulom araŋ. 18A sa cinaka mi ɗike, kisa cam ngi hay buy madiɗa ngi Ezipte, ka ati mizli micawwa ngi Israyeleye, kisa ɓakaŋ: Bumbulvuŋ, Buymisemuŋ ngi Heberey a biga ndra vu le deŋ a mbuŋ ndra, yo wurenna, sey i ram hiipas hiipas hin makir nga wuzla ɓuh, nga gi mikuli da Bumbulvuŋ Buymisemuŋ ndra. 19Amma i si na le, buy ngi Ezipte anta sa pulukum jiviɗ ɓa ki ram ta, sey tak ˀay ti gidaŋ. 20I sa zuɓa haŋ ɗu, i sa ga bonoy da Eziptehey ti gi cekenehey wal wal a wuzla taŋ. A dirba nah, a sa pulukum, ki ram. 21I sa ga ɓa Eziptehey a gaka mezle da mizli ɗuwoyo, yo da ki ra ram so na, ki ram haŋ kavbar kine ta: 22gwat ngi ɓiri gaza, ɓiri tapasl tapasl waɗ godo, ngwas Israyel gar, a sa cufuɗ avu mbur cil naŋ, malla avu ngwas migi slra ngi hay naŋ. Ki sa vulaka taŋ da ziri mizile ati mongoso kumoy a jijiraka taŋ. Ki sa tiɓaka gwat ngi Ezipteheye kahana.»

Currently Selected:

BI NGI ISRAYELEY 3: BEGDC

Highlight

Copy

Compare