BI NGI ISRAYELEY 5

Moyis ati Aroŋ a hay buy madiɗa ngi Ezipte

1A dirba nah, Moyis ati Aroŋ a soko, a ɓaka buy madiɗa ngi Ezipte na: «Bumbulvuŋ Buymisemuŋ ngi Israyel a ɓi na: pula mizli ɗuwoy a ram, nga wuzla ɓuh mikirɗak kirɗaka, ɓa ara gikiy muguzlum ngi ɗuviy hirnga.» 2Buy Ezipte a ɓi: «Bumbulvuŋ i wa ɓa i cine mingiɓi naŋ, i pula Israyeley a ram na ka? I si na Bumbulvuŋ ta, yo y'anta pula Israyeley a ram ta.» 3Moyis ati Aroŋ a ɓakaŋ: «Buymisemuŋ ngi Heberey a biga ndra vu le da ndra, anja sey i ram hiipas hiipas hin makir nga wuzla ɓuh mikirɗak kirɗaka, nga gi mikuli da Bumbulvuŋ, Buymisemuŋ ndra, vur naŋ madiɗ vu ar ndra ti jiji mangizl vu sunok sunok malla ti maslalam.» 4Buy Ezipte a ɓa taŋ: «Moyis, Aroŋ, ki paka mi da mizli, ɓa a pulaka slra taŋ vur mike? Mam ng'ar slra kumo!» 5Buy Ezipte a ɓi: «Wurenna, mizli a gam le haɗi asi hirwuyo, ki wuɗam na ɓa a musukam vu avu slra taŋ sukwa!»

Buy Ezipte muvula slra da Israyeley fineˀ misi zleˀe

6Ngi pas nah na, buy Ezipte a ɓa buy ngi slrahay ati madiɗa ngi wuzla mizli: 7«Ki vulaka gwaara ngi kiɗa brike da mizli, kaɓa kum mavulaka zleˀe na mata. Sey taŋ vuna ara kusumoko di ti haŋ taŋ. 8Tikaka taŋ ˀay ɓa a kiɗam brike kite taŋ makuɗoko di zleˀe si na, ko ki maka neˀ ta. I masafayahay, taŋ matilam mi a ɓam: Akum i ra gam mikuli da Buymisemuŋ ndra na, vurˀe! 9Sey slra ngi beke a didila mizli tayna, yo sey a gam slra, ɓa a wulkam neˀ le ar ɓi ngi slir taŋ na ta!» 10Buy ngi slrahay ati buy madiɗa ngi wuzla mizli, a boko, a ɓaka mizli na: «buy Ezipte a ɓi ani: y'anta vulukum gwaara ngi kiɗa brike mata! 11Kum vuna ara sipam ti haŋ kumo ar li kum malumam! Amma ki kiɗam brike kite misi zleˀe si.» 12Mizli a waham wah asi hirwuy Ezipte gar nga kusumo gwaara ngi kiɗa brike. 13Buy ngi slrahay ara ɓaka taŋ ɓa a wusam vu: «Tikaka slra kumoyo wãˀa! Vur hin gar na, kiɗam brike kite misi zleˀe, kaɓa mavulukum gwaara ti vul zleˀe tuwa!» 14Buy ngi slra ngi buy madiɗa ngi Ezipteheye, a kiɗaka madiɗa ngi wuzla Israyeley taŋ muvulaka taŋ slra tuwa, a ɓaka taŋ: Brik muvulukum di ngi kiɗ ngi dambu ati nga dana, ki kiɗaka mi naŋ kaɓa kum makiɗaka zleˀe na ta vur mike? 15Mizli madiɗa ngi wuzla Israyeley tuwa, a soko wudam avu buy Ezipte, a ɓakaŋ: «Ki ga gwat kahana da gawla ɗikeye vur mike? 16Anta vulam ndra gwaara da ndra gawla ɗikeye mata, yo a ɓam ndra: kiɗaka brike! Ani ara kiɗam ndra, ndra gawla ɗikeye. Mizli ɗikey a zluɓaka le!» 17Buy Ezipte a ɓa taŋ: «Kum i masafayahay, i masafaya magukum tewle! Kum maɓam: Akum nga gi mikuli da Bumbulvuŋ na vurˀe. 18Wurenna, ara gam slra, anta sa vulukum gwaara ta, amma brike, kiɗaka kite misi zleˀe vuna ma kini.» 19Mizli madiɗa ngi wuzla Israyeleye, a puraka na, taŋ ar ɓi mutuwaˀa, vur a ɓaka taŋ na: «Brik muvulukum di le ngi kiɗ vur hin gar na, sey ki kiɗakaŋ, a kic neˀ le ta.» 20Taŋ muboko ti hay buy Ezipte tuwa si na, a wusam vu ng'avi ti Moyis ati Aroŋ makutukoko taŋ na. 21A ɓaka taŋ: «Anja Bumbulvuŋ a pura gwat kum migaka na, yo a gukum kiita: Buy Ezipte ati gawla naŋhay anta wuɗam pur hiri ndra mata, asi kumo, ki vulaka taŋ di i maslalam a haŋ ɓa ngi kiɗ ndra vagay vagay.» 22Moyis a mi ng'avu Bumbulvuŋ, a ɓaŋ: «Bumbulvuŋ ɗu, ki ga bonoy da mizli tayna vur mike? Na ki slino ya nga gi mike? 23Diga ya muso ndol nga ɓa ɓi ɗik da buy Ezipte na, ara ga bonoy da mizli, yo n'ani ki laha taŋ ta ma.»

Currently Selected:

BI NGI ISRAYELEY 5: BEGDC

Highlight

Copy

Compare