Sáni Markusï 10
10
Jesusi jurap'erakueri ampe jurhentpesti
(Mt 19.1-12; Lk 16.18)
1Ísï tátsekua, Jesusi Kafarnaumi uéakuntaspti ka Judea isï niraspti, ka iurhekuarhu parhikutini. Jimat'u uánekua tánkorhenhantaspti, ka ima ménteru uénaspti jurhentpeni. 2Máruksï fariseuecha antarheraspti, ka ts'ék'ukuekaniksï arisï kurhamarhespti, ¿Sésiski o nósesiski nema témpani jurak'uni? 3Ka Jesusi arhiaspti:
–¿Anti Moisesiksïni néna juramucheski?
4Ka imaksï arhispti:
–Moisesi sésekua íntspesti, eska karakata ma úkuparini úaka uarhiti jurak'unhani.
5Jimak'ani Jesusi arhiaspti:
–Moisesiksïni chári inchantimekua jimposï inteni juramukuani íntskupti. 6Uénani jámani no ísïspti, Tata K'uerap'iri márku kueraaspti tatakani ka nanakani, 7jimposï tataka, tátjempani ka amampani jurak'uati ka témpa jinkuniuatia, 8ka tsimarheniksï mák'uentaatia. Ka ísï jimpoksï nóteru tsimaniuatia, máterkuksï úkorhent'aatia. 9Ka jimpo, enka xáni ampe Diósï kúntaka ásï nema parhakpeni anapu jurak'utarpe.
10Ka enkaksï k'umanchekuarhu niántapka, jurhenkorherichaksï ménteru jurap'erakueri ampe kurhamarhespti. 11Ka Jesusi arhiaspti:
–Ne enka jurak'uaka imeri uarhitini ka máteru jinkuni tempuchant'ani, ísku jántikuxati imani enka urheta témpepka; 12ka eka uarhiti jurak'uska uámpani ka máteru jinkuni uampuchant'ani, imat'u mák'ueni ísku jántixati.
Jesusi sapichani úch'akuraasti
(Mt 19.13-15; Lk 18.15-17)
13Jesusiniksï sapichani máru úch'akuraani pákuaspti; ka jurhenkorherichaksï xukap'esïrempti. 14Enka Jesusi exeapka eskaksï xukaaxapka, ikiatintku arhiaspti jurhenkorherichani:
–Jurak'ua je sapichani, ásï p'ínkua je enkats'ïni antarherak'a, jimpoka Diósïri juramukua imecheriska enkaksï inteni járhaka. 15Sési jimpoksïni arhisïnka eska, ne enka Diósïri juramukuani no ísï mintsikak'a eska sapi ma, eska ima no inchaaka Diósïri juramukuarhu.
16Ka kamanharhiaspti sapichani, ka p'áts'ïkuaparini úch'akuraaspti.
Jatsikorheri ma Jesusini jinkuni uantontskorhespti
(Mt 19.16-30; Lk 18.18-30)
17Enka Jesusi ménteru xanhari jatant'a'ni jámempkia, acheti ma uiriaparini niáraspti ka tinkuixurhikuspti ka kurhamarheni:
–Ampakiti jurhentpiri, ¿Néna jámaa? Ji uéksïnka méntku isï tsípekua jatsini.
18Ka Jesusi arhispti:
–¿Antirinisï arhik'i eskani ji ampakitiska? Diósïk'usï ampakititi. 19Mítetixakaria juramukuechani: Ásï uántikpe, ásï ísku jánti úkorhe, ásï sïpatspe, ásï chkuántiratspe ka ásï ámeratpe; ka janhanharhi chéti táteni ka chéti nánteni.
20Ka acheti arhispti:
–Jurhentpiri, sapirintkisïni uénaka inteni ampe ísï jámani.
21Ka Jesusi p'amok'uparini eratespti ka arhini:
–Ma ampeterkuri no ísï jámaxaka: Níntsï, ka chéti jatsikorhekuani atarantsï, ka tumina no jatsikorherichani íntsaa. Ísïri jámani jatsikorhekuani auantarhu káneraaka. Ka ísï k'órurini juia chúxapuni.
22Ka ima acheti ísï kurharini, nósesi p'ikuarherapant'aspti; ka mískorhepantaspti, jimpoka kánekua jatsikorherispka.
23Ka Jesusi k'uiripuni eraaspti ka jurhenkorherichani arhiaspti:
–¡Kánekua úkua jukaati eska jatsikorheri ma Diósïri juramukuarhu inchaaka!
24Ka jurhenkorherichaksï ísï kurhach'atini eratsentani pakareraspti, ka Jesusi ménteru uéntaspti arhiani:
Jucheti uátsïcha, ¡Kánekua úkua jukasti Diósïri juramukuarhu inchani! 25Kameiu, p'ikukueri p'orhoch'akuarhu ma, sánteru sóntku parhich'akuati, eska jatsikorheri ma, Diósïri juramukuarhu inchani.
26Ka imaksï sánteru ísku pakareraspti, ka kurhamarhperasïremptiksï:
–¿Ka nék'usï p'ímutanhantaia anti?
27Jesusi erateaspti ka arhiani:
–Nónema úati jantiok'u p'ímutakorhent'ani, Diósïk'usï út'i, jimpoka ima iámentu ampe úsïnka.
28Ka Pédru arhispti:
–Jucha iámu jatsikorhekua jurak'uska, t'únkeni uékani chúxapani.
29Ka Jesusi uantaspti:
–Sésiksïnisï arhik'a, ne enkarini chúxapaaka ka ampakiti aiankpekuani jakak'uni, ka jurak'uani erachichani o pirenchichani, nánteni o táteni, o uáp'echani, k'umanchekuani o echerichani ampe; 30Iásï íni tsípekua jimpo, iúmu ekuatse sánteru uánekua erachichani ka pirenchichani, nántechani ka uáp'echani ka k'umanchekuechani ka echerichani íntsïnhauati; ka ístu jupinhani kánhaati ka enka uarhikua niáranchaaka, tsípekua méntkisï anapu intsïnhaati. 31Ka uánekua ima enkaksï iásï k'éri ampeka, tátsekuaksï ísku nemeuati, ka uánekua enkaksï iásï nómpemeka, tátsekuaksï sánteru k'éri ampeuati.
Jesusi tanimu úni jámani uarhikua aiankpekorhesti
(Mt 20.17-19; Lk 18.31-34)
32Enkaksï Jerusaleni karhamani jápka, Jesusi jurhenkorherichani urhekupaaxapti. Ka ima enkaksï tátsepani jápka, chépaxaptiksï. Jesusi ménteru ióarhiaspti témpeni tsimani jurhenkorherichani, ka imechantku aiankuaspti eska ísï úkorhenchapirinka: 33“Kurha je, Jerusalenichi niraxaka, jima Acheti Uáp'a jupinhaati ka tátecheri urhets'ïkurichani, ka juramukua jurhentpirichani jinkuni pánhaati, ka imaksï uérakua anapuechani pákuati ka uántikutarkorhenksï. 34Jimaksï teresmarhuati ka t'úanharhikuatiksï ka ataatiksï ka uántikuatiksï; ka ima tanimu jurhia jimpo tsíntaati.”
Santiagu ka Juánueri kurhak'orhekua
(Mt 20.20-28)
35Santiagu ka Juánu, Sebedeu uáp'echa, antarherasptiksï Jesusini ka arhisptiksï:
–Jurhentpiri, kóntets'ïni enkaksïni kurhacheni jaka.
36Ka Jesusi kurhamarheaspti:
–¿Ampets'ïsï kurhak'orheni jaki?
37Ka imaksï arhispti:
–Íntskuts'ïni jurhimpekua eskaksïni jucha uaxataaka, ma chéti jurhik'antani ka máteru chéti uikixkantani, jiák'ani ekari na t'íntskua jinkuni juramuni jauakia.
38Ka Jesusi arhiaspti:
–Nóts'ï míteska ampets'ïsï kurhak'orheni jaki. ¿Anti úats'ï chát'u mák'ueni k'ameri itsïmani eskani ji? ¿Ka anti úats'ï chát'u uérakuni imeni jásï ts'ép'erata eskani ji na ts'ék'unhaaka?
39Ka imaksï arhispti:
–Jucha úaka.
Ka Jesusi arhiaspti:
–Sési jimpoksïni arhixaka, eskats'ï chát'u k'ameri itsïmaaka, ka nósesits'ï kánhaaka mák'ueni eskani ji. 40K'óru no jucheti jimpo jarhasti jucheti jurhik'antani o uikixkantani uaxastpeni, jimpokaksï míntakata jarhaskia, ima enkaksï jima uaxakaaka.
41Ka máteru témpeni jurhenkorherichaksï Santiaguni ka Juánuni ikiakuaspti, enkaksï ísï kurhach'aapka. 42Ka Jesusi uantap'aaspti, ka arhiaspti:
–Eskats'ï na mítpeka, máruksï juramuticha kurhunhekua jinkuni juramutspesïnti, ka máruksï k'éri p'ikuarherasïnti ka juramukuanksï nósesi úrasïnti. 43Ka chánksïni jinkuni no ísïuati. Ne enka cha jinkuni uékaaka k'érini, urheta máteruechani marhuakuauati. 44Ka ne enka cha jinkuni uékaaka k'érini, jatsiati eska iámentuechani marhuakuauaka. 45Jimpoka Acheti Uáp'a marhuatspenisï juka, ka imeri tsípekua jimpo uánekua p'ímutant'a'anisï juti; ka no eska marhuamenhaaka.
Jesusi Bartimeu pátenharhini éskatarantaspti
(Mt 20.29-34; Lk 18.35-43)
46Enkaksï Jeriko niárapka ka tátsekuaksï uéakuntani, Jesusi jurhenkorheri jémpechani jinkuni niraxapti ka uánekuaksï chúxapaaxapti. Ka Timeo uáp'a xanharu uaxaruspti, enka Bartimeo arhinhak'a, enka pátenharhika ka no jatsikorherini. 47Enka kurhapka eska Jesusi Nasareti anapu jimesï nitamaxapka, uinhachaspti, arhini:
–¡Jesusi, Dabidi Uáp'a! ¡P'amok'urini!
48Ka uánekuaksï xukasïrempti eska pínasku japirinka, ka ima sánteru nósesi uinhachasïrempti mintsitani:
–¡Dabidi Uáp'a! ¡P'amok'urini!
49Ka jiák'ani k'óru Jesusi anhaxurhispti, ka uantaspti:
–Arhi je eska juuaka.
Ka pátenharhinksï ióarhispti:
–Jauara; uantap'axatikini.
50Ka pátenharhi sóntku jauraspti ka k'uanikuspti chereparhani enka kánkorheni jápka, ka ma jimpok'u méntku Jesusini antarhereraspti. 51Ka Jesusi kurhamarhespti:
–¿Ampekinisï marhuachea?
Ka pátenharhi arhispti:
–Jurhentpiri, uéksïnka éskantani.
52Ka Jesusi arhispti:
–Chéti jakak'ukua jimpori éskantaskia, níia níntani.
Ka pátenharhi éskantaspti, ka chúxapaspti Jesusini.
Currently Selected:
Sáni Markusï 10: DKPJ
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
