Sáni Markusï 9
9
1Ka Jesusi arhiasptiteru:
–Sési jimpoksïnisï arhini jaka; cháts'ï máru enkats'ï ixu jaka, nótkits'ï uarhini jauaka, antak'orheakats'ï exeni Diósïri juramukuani enka uinhapekua jinkuni janoni jauaka.
Jesusi ménterueni jáxent'asti
(Mt 17.1-13; Lk 9.28-36; 2~P 1.16-18)
2Kuímu jurhia tátsekua, Jesusi k'éri ma juátarhu niraspti, jimesï enka nóteru nema jámempka, ka pát'aaspti Pédruni, ka Santiaguni ka Juánuni. Ka enka niárapka, imaksï exexapti enka ménterueni jáxent'apka. 3Imeri xukuparhakua meremerek'unt'aspti ka t'uput'upuxent'ani, eska iéstakua, ma parhakpeni ima sánteru urapespti. 4Ka jurhenkorherichaksï Eliasïni ka Moisesini exeaspti enkaksï Jesusi jinkuni uantontskurheni jápka. 5Ka Pédru arhispti Jesusini:
–Jurhentpiri, ¡Séskuchi ixu jarhaska! Tanimu uapats'ïtakuachi úaka: Ma chétiuati, máteru Moisesiriuati ka máteru Eliasïriuati.
6Pédru no jánhaskasïrempti ampesï uantapirini, jimpokaksï chérakorhetixapka. 7Ka ísku úntaspti xúmu antats'ïkueraani ka ópchakurhaaspti: Ka xúmurhu uantakua ma kurhakorhespti, enka arhimpka: “I jucheti Uátsïtisti enkani ji xáni xénhchka: Kurhach'a je.” 8Ka mátirku, enkaksï ménteru exepka, nóteru nema jámsïremptia, Jesusiterkusï jáptia.
9Ka enkaksï kétsemunkuani jápkia, Jesusi arhiaspti eskaksï nótki nemani aiankupirinka imani ampe enkaksï juátarhu exepka, eka Acheti Uáp'a nótki tsíntani japirinka. 10Ka imaksï patsakuspti, k'óruksï kurhamarhperani pakaraspti, ampespki tsíntskua. 11Ka kurhamarhesptiksï Jesusini:
–¿Antiksïsï juramukua jurhentpiricha uantak'i eska urheta Eliasï junkuaka?
12Ka ima arhiaspti:
–Ísïsti, Eliasï urhepunkuati, ka ampantskantaati. ¿Ka antisï jiák'ani karakata arhik'i eska Acheti Uáp'a kánekua nósesi kánhaaka ka eska no xénhchanhani kánhaaka? 13Ka jíksïni arhixaka eska Eliasï junkuaskia, ka nósesiksï kántasti, ísï eska na karakata jaka eskaksï na kámapirinka.
Tumpi ma enka nósesi jásï espiritu incharhetini jápka
(Mt 17.14-21; Lk 9.37-43)
14Enkaksï antarheantaapka máteru jurhenkorherichani, uáni k'uiripu uirhipkurhatixapti, ka arhinhaskperaxaptiksï máru kararicha jinkuni. 15Ka enkaksï Jesusini exepka, iámentuecha ísku pakareranhaspti, ka uiriasptiksï ják'i íntskuni. 16Ka Jesusi kurhamarheaspti:
–¿Ampets'ïsï xáni arhinhaskperani jaki intecha jinkuni?
17Ka nema enka jima jápka arhispti:
–Jurhentpiri, jucheti uátsïnikini juácheska enka no úk'a uantani, jimpoka nósesi jásï espíritu incharhetixaka. 18Enka p'íntka, perentskantasïnti; ka k'uruata uéchasïnti, ka sînichani kirisïmeantasïnti, ka chánchanhaxent'asïnti. Ka kómu arhiaska chéti jurhenkorherichani eskaksï petarhetant'a'pirinka imani nósesi jásï espírituni, ka nóksï ústi.
19Ka Jesusi arhiaspti:
–¡No jakak'uticha! ¿Na jatini jamperi chánksïni jinkuni jaua? ¿Na xánteruksïni tekantaa? Juáchets'ïni tumpini.
20Ka enkaksï na pérakupka, nósesi jásï espiritu Jesusini exerini uinhamu jupintaspti tumpini, ka ima tumpi kuarhatsespti ka peretsentani k'uruata uéchaparini. 21Ka Jesusi, tumpiri tátjempani kurhamarhespti:
–¿Na jatini uénaski inte ísï jámani?
Ka tátjempa arhispti:
–Sapirintkia. 22Ka sóntku méni uekastia uántikuni, méni chpírirhu k'uanip'asïnti ka méni itsïrhu k'uanimasïnti. Ekari ampe úk'a néna jámani, p'amok'uts'ïni sáni ka jarhuatats'ïni.
23Ka Jesusi arhispti:
–Ásïrini arhi: Ekari ampe úk'a, arhini ¡Ne emanka jakak'uk'a, iámentu ampe úsïnti úkorheni eska na uékani jarhak'a!
24Ka tumpiri tátjempa uinhachaparini arhispti:
–Ji jakak'usïnka ¡Ka jarhuatarini jakak'uni sánteru!
25Enka Jesusi exepka eska uánenhantaxapkia, nósesi jásï espirituni xukaspti, arhiparini:
–Nósesi jásï espiritu nunuxi ka kánti, juramuchexakakini eskari uérhentaaka tumpini ka ásteru méni jáma incharhentani.
26Ka nósesi jásï espiritu ménteru tumpini p'íntaspti, ka uinhachaparini nósesi kántaspti nóna uérhentani, ka tumpi mirikurhitini pakaraspti, ka uantanhasïrempti eska uarhispkia. 27Ka Jesusi jupik'uspti tumpini, ka jauatani; ka ima anhaxurhintaspti.
28Ísï tátsekua, enka Jesusi k'umanchekuarhu niántapka, ka enkaksï na jantiok'u jápka, imeri jurhenkorherichaksï kurhamarhespti:
–¿Antisïni jucha no u xásï espirituni petarhetant'a'ni?
29Ka Jesusi arhiaspti:
–Imeni járhati nóamparhatichani, kómarhikua jimpok'usï út'i kéntitanhani.
Jesusi ménteru uarhikua aiankpekorhesti
(Mt 17.22-23; Lk 9.43-45)
30Ka jima uératiniksï Galilea isï niraspti. Ka Jesusi no uéksïrempti eska mítekorhepirinka, 31jimpoka imeri jurhenkorherichani jurhentapaaxapka. Ka arhiasïrempti:
–Acheti Uáp'a jupinhaati ka atanhaati uántikunhani ka tanimu jurhia jimpo tsíntaati.
32Imaksï no kurhankusïrempti enka ima arhiani jápka, ka chésïremptiksï kurhamarheni.
¿Ne sánteru k'éri ampeski?
(Mt 18.1-5; Lk 9.46-48)
33Enkaksï niárapka Kafarnaumi ka k'umanchekuarhuksï jarhania, Jesusi kurhamarheaspti:
–¿Ampets'ïsï xáni arhip'erapunkuani jápi?
34Ka imaksï ísku pakareraspti, jimpokaksï arhirperapant'axapka ne sánteru k'érispki 35Jesusi uaxakaspti, ka iámentu jurhenkorherichani uantap'aaspti (témpeni tsimani) ka arhiaspti:
–Ima enka sánteru k'éri ampenhchak'a, jatsiati sánteru sapichuentani ka iámentuechani marhuakuani.
36Ka sapini ma ióarhispti ka teruk'ani péraspti, ka kamanharhitini arhiaspti:
37–Ekats'ï jucheti jakankurhikuani jimpo jiókaska ma sapini, jíntentsïnisï jiókani jaka, ka ekats'ïni jínteni jiókaska, Tátentsï jiókaxaka, jimpokarini imasï axaka.
Ima enkats'ïni no ók'utak'a, juchantsïni jinkunistiksï
(Mt 10.42; Lk 9.49-50)
38Juánu arhispti:
–Jurhentpiri, achetini máchi exeska, enka chéti jakankurhikua jimpo nóampakitichani petarhpeantaani jápka, ka nóteruchi jiáretaskia jimpoka no juchantsïni jinkuni jámsïnka.
39Ka Jesusi arhiaspti:
–Ásï jáma je no jiáretani, jimpoka nónema úaka Diósïri uinhapekuani jucheti jakankurhikua jimpo úrani, ka tátsekuarini nósesi uantatseni jarhania. 40Ima enkats'ïni no ók'utak'a juchantsïni jinkunistiksï. 41Diósï, maiamuantauati imechani enkaksï chánksïni itsï intsïmpeaka, jimpokats'ï Krístueriska, sési jimpoksïni arhixaka eskaksï ima no tsîtaaka intsïmperatani.
Néna no k'amanharhint'ani
(Mt 18.6-9; Lk 17.1-2)
42“Eka nema terunkutaraska sapini ma enkarini jakak'uk'a, sánteru sésipirinti eska k'énharhi ma tsakapu urhuratarakua jóch'akunhapirinka ka japuntarhu k'uanimanhani. 43Ekakini chéti ják'i nósesi jásï ampe niátani terunkutaraska, kachuk'u; sánteru sésiuati eskari tokok'utini inchaaka tsípekuarhu, ka nóri chpírirhu k'uanip'anhani tsimani ják'i jukarini, jima enka nómeni póp'ek'a, 44[jima enkaksï ‘Karhasïcha nómeni uarhik'a, ka nít'u chpíri póp'eni.’] 45Ekakini chéti jantsiri terunkutaraska, kachut'a; sánteru sésiuati tokot'atini inchani tsípekuarhu, ka nóri tsimani jantsirichani jukaarini chpírirhu k'uanip'anhani, jima enka nómeni póp'ek'a, 46[jima enkaksï karhasïcha nómeni uarhik'a, ka nít'u chpíri póp'eni.] 47Ekakini chéti éskua nósesi ampe úni terunkutaraska, p'itanharhi; sánteru sésiuati enkari ma éskua jinkuntku inchaaka tsípekuarhu, ka nóri chpírirhu k'uanip'anhani tsimani erhakua éskua jinkuni, 48jima enkaksï karhasïcha nómeni uarhik'a, ka nít'u chpíri póp'eni.
49Cháts'ï etukua ka chpíri jimpo pímpinhak'unhantaaka.
50Etukua ampakiti ampesti; ka ¿Ampe jinkuniteruts'ï ásperaa, enka etukua tsîp'eska? Patsakorhe je etukua, ka sési arhip'eraparini irekani ja je.”
Currently Selected:
Sáni Markusï 9: DKPJ
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
