Sáni Markusï 11
11
Jesusi irecheni inchaakuntasti Jerusaleni
(Mt 21.1-11; Lk 19.28-40; Jn 12.12-19)
1Enkaksï Jerusaleni antaparhakuerani jápkia, Betfage ka Betaniaksï niáraxapti, Olibusïrhu juátarhu isï, jima uératini Jesusi axaaspti tsimani jurhenkorheri jémpechani, 2íni uantakua jinkuni:
–Ni je amani iretarhu enkats'ï eraani jaka, ka ekats'ï na niárak'a, ch'anchakini máts'ï jima xéaka enka nótki nema jatak'a, jima jótakata jauati. Kuerata je ka juáchets'ïni. 3Enkaksïni nema kurhamarheska. ¿Antits'ïsï kueratani jaki? Arhiakats'ï eska Acha úraaka, ka eska sóntku juánkuaka.
4Imaksï niraspti, ka ch'anchakinksï xéntaspti, enka xanharu k'umanchekuarhu jamukutini jótakata jápka, ka kueratasptiksï.
5Ka máru enkaksï jima jápka kurhamarheasptiksï:
–¿Ampets'ï úsïnki? ¿Antits'ïsï ch'anchakini kueratani jaki? 6Ka imaksï ísï arhiaspti eska Jesusi na arhistakuapka; ka jurak'ukuasptiksïia. 7Imecheri sununta ampeksï tatsuparhakuaspti, ka Jesusiniksï pákuspti, ka ima jataspti. 8Xanhari jimpoksï uánekua sununtechani ampe, ka pímu tatsuntskarakusïrempti enkaksï juátarhu isï p'ikupka. 9Ka iámentu enkaksï xáni urhekupempka ka chúxapanksï, uinhamuksï mintsitapasïrempti:
–¡K'uáp'etsïni! ¡T'u úch'akurakata, enkari Acheri juramukua jimpo jurhani jaka! 10¡Úch'akurakatesti juramukua enka janoni jaka, juchari Táte Dabiri juramukua! ¡K'uáp'ets'ïni auantarhu uératini!
11Jesusi Jerusaleni inchaakuspti, ka tiósïo niraspti. Ka iámentu ampe exespti, ka tátsekua imeri témpeni tsimani jurhenkorherichani jinkuni Betania niraspti, jimpoka chúrexapkia.
2. Jerusaleni
(11.12—13.37)
Jesusi xukasti jígusïni enka no úempka jukani
(Mt 21.18-19)
12Ka pauantekua, enkaksï uéakuntani jápka Betania, Jesusi úntaspti k'arhimani. 13Ka iauani jatini exespti jígusïri anhatapuni ma enka xuxunhaxkurhipka, ka antarheraspti erarhutani nántika jukapka jígusï, ka chkúrhichantku erarhutaaspti, jimpoka nótki jígusï jukakuespka. 14Ka xukach'aspti jígusïni, arhispti:
–¡Ásteru méni anhe chéti amanhech'akua!
Ka imeri jurhenkorherichaksï kurhaspti.
Jesusi tiósïo ampantskantasti
(Mt 21.12-17; Lk 19.45-48; Jn 2.13-22)
15Tátsekuaksï Jerusaleni niáraspti, ka Jesusi tiósïo inchaspti ka petant'a'aspti imechani enkaksï jima atarantani ka piáni jápka. Ka imechani enkaksï tumina mót'akutspeni jápka, kép'atarakua xerekuantaaspti, ka imechantu mák'ueni káaspti enkaksï jipunhichani atarantaani jápka; 16Ka nónemani jiáretasïrempti eska tiósïo ísï parhikutapirinka atarantskua. 17Ka jurhentpeni uénaspti uantaparini:
–Karakatarhu arhisïnti: Jucheti k'umanchekua iámentu iretecheri kómarhip'etarakuesti. Ka cháts'ï kuárhukup'iticheri irekua úntaskia.
18Enkaksï tátecheri juramuticha ka juramukua jurhentpiricha íni ampe kurhapka, uénasptiksï jirinhakuntani nénaksï atapirini uántikuni Jesusini, jimpokaksï chérhesïrempka enka imeri jurhentperakua jimpo iámentuecha ísku pakaranhempka. 19Enka na chúreni jápkia, Jesusi uéakuntaspti iretarhu imeri jurhenkorhericha jinkuni.
Jakak'ukueri jurhentperakua
(Mt 21.20-22)
20Pauantekuaksï ménteru jígusïrhu isï nitamaspti, ka exesptiksï eska iámu k'arhispkia. 21Ka Pédru, miántaspti Jesusi néna enka uantapka, ka arhispti:
–Jurhentpiri exe, k'arhistia jígusï enkari nósesi arhipka.
22Ka Jesusi arhispti:
–Mintsika je Diósïni. 23Jíksïni jurhimpitkusï arhini jaka eska, eka nema inteni juátani arhiaka: ¡Kéntikorhe ka japuntarhu uekame! Arhini. Ka eka jakak'uparini ka nósani tsimanitsimanheaparini ísï eratseaka, ísï úkorheati. 24Jimpoksïnisï arhini jaka eska iámentu ampe enkats'ï kómarhip'ekorheni jauaka, mintsika je eskats'ï intsïnhaskia, ka intsïnhaakats'ï. 25Ka ásï nemani jatanhekutini uantamukukorhe je, ekats'ï nemani jatanhekutini jaka, púakuntsï je, ka chári Táte enka auantarhu jaka, imat'uksïni mák'ueni púachent'aati chári k'amanharhintskuechani. 26[Jimpoka ekats'ï cha no púatspentaska, chánksïntuksïni Táte enka auantarhu jaka no puáchent'aati chári k'amanharhintskuechani.]
Jesusiri juramukua
(Mt 21.23-27; Lk 20.1-8)
27Tátsekuaksï ménteru Jerusaleni niántaspti. Ka enka Jesusi tiósïo isï jámani jápka, tátecheri juramuticha, ka juramukua jurhentpiricha ka k'érati tatechaksï antarheraspti 28ka kurhamarhenksï:
–¿Náki juramukua jimpori ísï ampe úxaki? ¿Nékini íntskuski juramukua inteni ampe úni?
29Ka Jesusi arhiaspti:
–Jít'uksïni kurhamarheaka ampe ma: Arhits'ïni je, ka jít'uksïni arhiaka náki juramukua jimpo íni ampe úxaki. 30¿Ne axaspki Juánu itsï atats'ïkpirini? ¿Diósï, o parhakpeni anapuecha?
31Ka imaksï arhinhaskperaspti: “Enkachi arhiska eska Diósï axaspka, arhiatits'ïni, ka: ¿Antits'ïsï no jakak'ukupkia? 32¿Ka nénachisï arhia eskaksï parhakpeni anapuecha axaspka?” Ísïksï arhispti jimpokaksï k'uiripuni chérhesïrempka, ka jimpoka mítekata jarhaspka eska Juánu Diósïri uantarispka. 33Ka ísï jimpoksïsï arhipti:
–Nóchi míteska.
Ka Jesusi arhiaspti:
–Jít'uchkaksïni no arhiakia náki juramukua jimpo íni ampe úxaki.
Currently Selected:
Sáni Markusï 11: DKPJ
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
