Sáni Mateo 24

XI. PARHAKPENI K'AMAKURHIKUERI ARHITS'ÏKPERAKUA

(24.1—25.46)

Jesusi uantant'a'sti eska tiósïo xerenhantaaka

(Mk 13.1-2; Lk 21.5-6)

1Jesusi tiósïo uéntaspti ka enka níntani jápkia, jurhenkorheri jémpechaksï antarheraspti, ka tiósïo anapu k'érati k'umanchekuechanksï exeraaspti. 2Ka Jesusi arhiaspti: “¿Exexakits'ï iámentu íni ampe? Sési jimpoksïni arhixaka eska ixu nóma tsakapu tsïntsïkata pakaraaka.”

Na enka jánhaskorheaka enka parhakpeni k'amakurhini jámaakia

(Mk 13.3-23; Lk 21.7-24; 17.22-24)

3Enka Jesusi Olibusï juátarhu uaxakatini jápka, jurhenkorheri jémpechaksï antarheraspti enka ima jantioterku jápkia ka arhisptiksï: “Arhits'ïni, ¿Na jatini úkorhea i ampe, ka ampe xarharaa jiák'ani enkari junkuaka ka enka parhakpeni k'amakurhiaka?”

4Ka Jesusi arhiantaaspti: “Jinkuntku ja je, ásïksïni nema tantoch'e, 5jimpokaksï uánekua jucheti jakankurhikua jimpo uantapuaka: ‘Jísïni Krístueka’ ka uánekuaksï tantosï úantauati. 6Kurhauakats'ï eska uarhiperata ampe jarhaska ka eska uarhiperanhaaka, k'óru ásï jáma je chéni, jimpoka k'uanisïnka eska ísï úkorheaka, ka nótki parhakpeni k'amakurhikuesti. 7Iretechaksï uarhiperaati ka ístu juramukuecha, ka k'arhimakua ampe nitamanchanhaati ka uápuru isï jencheati. 8K'óru uénakuak'uesti enka kómu nitamakorhenhaaka.”

9“Jiák'antsï cha k'ataperakuarhu pánhaaka ka juramuticha jinkuntsï pánhani, ka jínteni jimpots'ï kuikirhenhaaka ka kurhunhenhantsï. 10Uánekuats'ï imani jurhiatekua nóteru mintsikaati ka tantoch'peraatiksï ka kurhunhperanksï. 11Uánekuaksï diósïri uantari eratakorhericha juuati ka uánekuaksï tantosï úauati. 12Ka jukari nósesi jánhaskorheati enka jimpo nóteru xénhchperanhaaka. 13K'óru ima enkarini k'amarhuni jamperi mintsikaaka, p'ímutannhantaati. 14Ka ma parhakpeni arhits'ïkperanhaati i irechekueri jimpanhe aiankperakua, ka iámentu iretechaksï kurhauati ka jiák'aniuatia enka iámentu ampe k'amakurhiaka.”

15“Ísï jimpo, na enkats'ï jatini exeaka tiósïo pimpinhantu, diósï kua nósesi jásï ma péranhani, enka Diósïri uantari Danieli uantaka: ‘Ima enka arhintak'a, kurhankue,’ 16ka ima enkaksï Judea isï jámani jauaka, juátecharhuksï niue sïpakorheni. 17Ima enka taiats'ïtakatarhu jauaka, ásï jáme kétsentani ampe petakorheni. 18Ka ima enka tarhetarhu jámani jauaka, ásï k'uanhatsente chereparhakuani p'itsïkorhent'ani. 19K'óru ¡Áke ima uarhiticha enkaksï charhakuni erokorheni jauaka, ka ima uarhiticha enkaksï ima jurhiatekuechani sapichani etsukua íntsaani jauaka!” 20“Kómarhip'ekorhe je eskats'ï no sábadu sïpakorheni jámani jauaka, o jiák'ani enka iéstani jarhak'a. 21Jimpoka kánekua nósesi nitamanchakorhenhaaka enka nómeni xánhaskorhepka jiák'ani uératini enka parhakpenika ka iásï jamperi, ka nóteru méni xánhaskorheati. 22Enkaksï ima jurhiatekuecha no sántku ióxeranhapirinka, nónema úpirinti uarhikuani uék'uni: K'óru erakukatechani jimpo námuntku jurhiatekueuatiksï.”

23“Ekaksïni nema jiák'ani arhiaka: Exe Krístu ixu jarhasti, o eraa aniani jarhasti, ásï jakak'uku je, 24jimpokaksï juuaka Krístu eratakorhericha ka diósïri uantari eratakorhericha, ka k'érati míntechanksï úauati, ka k'éri exekua ampe jimpoksï tantosï úp'eati, ka enkaksï úska, erakukatechanksï jamperi tantosï úantauati. 25Arhispkaksïnia: 26Ísï jimpo ekaksïni nema arhiska: ‘Exe jima jarhasti enka nónema irekaka,’ óksïni arhini eska ani irekaska, ásï uéra je ka ásï jáma je jakak'uni. 27Jimpoka ísï eska piritakua na iápuru isï eranchekorhek'a, xánhaskorheati enka Acheti Uáp'a junkuaka. 28Nani uék'i enka uarhiri jántak'a, k'uákichaksï jima tánkorheati.”

Acheti Uáp'a k'uanhatsentaati

(Mk 13.24-37; Lk 17.26-30,34-35; 21.25-33)

29“Ka enkaksï na nitamaakia ima jurhiatekuecha enka xáni nósesi jánhaskorheaka:

‘Tata jurhiata páp'akaxeati,

ka nana kutsï nóteru merenharhiati,

ka jóskuechaksï uekorhent'aati,

ka auantarhu anapu uinhapekuechaksï xamatanhaati.’

30Jiák'ani Acheti Uáp'eri mínta auantarhu xarhancheati, ka iámentu iretechaksï parhakpeni anapuecha p'amontakorheati, enkaksï Acheti uáp'ani exeaka xúmurhu ísï kánekua uinhapekua ka t'íntskua jinkuni junkuani jarhani. 31Ima axauati imeri ánjelichani eskaksï uinhamu p'uninhaaka kústani, ka ánjelichaksï ma parhakpeni iámentu erakukatechani tánantauati.”

32“Jígusïni exe je ka jurhenkorhe je, enka tsikixkurhintatini jarhak'a, jánhaskasïnkats'ï eska ementa janonkuani jarhasïnkia. 33Mák'ueni, enkats'ï cha iámentu íni ampe exeaka, mítetini ja je eska Acheti Uáp'a janonkuaxakaia. 34Sési jimpoksïni arhixaka eskaksï iásï anapuecha irekani jauakateru enka i ampe úkorheaka. 35Auanta ka echeri úatiksï k'amakurhini, k'óru jucheti uantakuechaksï nómeni k'amakurhiati.”

36“K'óru nónema mítesti ampe jurhia ka na jántu, níksï auantarhu anapu ánjelicha míte, jucheti Tátek'usï míteti.”

37“Jiák'ani enka Acheti uáp'a junkuaka, xánhaskorhesti eska imani jurhiatekuechani enka Noépka. 38Jimpoka jiák'ani enka nótki iurhentpempka, t'irenhaxapka ka kauinhani jarhani ka tempuchanhani ka tempuchatperanhani janhani, enka jamperi Noe k'éri icharhutarhu jatapka. 39Ka nóksï jánhaskaspti eka jamperi iurhentpepka ka iámu uarhimenhaspti. Xánhaskorheati enka Acheti uáp'a k'uanhatsentaaka. 40Enkaksï tsimani juátarhu jámani jauaka: Ma p'íkunhaati ka máteru jurak'unhani. 41Tsimani uarhitichaksï urhuni jauati, ma p'íkunhaati ka máteru jima jurak'unhani.”

42“Jinkuntku ja je jimpokats'ï no míteska chári Táte na jántu junkuaa. 43Ka íni ampe mítetini ja je, eka tata ma enka k'umanchekuani jatsikorheka mítepirinka ampe jántusï inchantspiri niáraa, jinkuntku japirinti ka no jurak'upirinti inchani. 44Ísï jimpo chát'u Jinkuntku ja je, jimpoka Acheti Uáp'a ima jántu junkuaka enkats'ï cha méntku no eront'ani jauaka.”

Jántspiri mintsinharhikua ka jántspiri enka no mintsinharhikueka

(Lk 12.41-48)

45“¿Nákiski ima jántspiri mintsinharhikua ka míakua jukari, enka imeri ánchetpiri arhik'a eska imecho anapuechani exeani jauaka ka eska t'irerauaka na enka jántu t'irekuek'a? 46Tsípe ima jántspiri enka ánchetpiri jémpa niántaaka, ka jántspirini xéntani úni jarhani ampe enka úraka. 47Sési jimpoksïni arhixaka eska ima tata enka k'umanchekuani jatsikorheka, iámu imeri jatsikorhekuani imani patsaraaka. 48K'óru eka jántspiri no ampakeaka ka jantiok'u jatini uantakorheni, ixu ióntaati janonkuanhani, 49ka uénani máteru jántspirichani ataani káani ka jukari t'ireni ka kauichechani jinkuni kauini. 50Ima jurhiatekua enka ima méntku no sáni eranhaskani jaka niánhantaati, 51ka nósesi kámaati, ka no kurhantirechani jinkuni kuntaati; jimasï ueraati ka sînichani kirisïmeantaani.”

Currently Selected:

Sáni Mateo 24: DKPJ

Highlight

Copy