Sáni Mateo 25

Témpeni iurhitskiricheri uantantskua

1“Auantarhu anapu irechekua, tempuchakuarhu méni jánhaskorheati: Témpeni iurhitskirichaksï erak'utakuechanksï p'íkuasti ka uérasptiksï tempuchani erokani. 2Iúmu iurhitskiricha, míakua jukarisptiksï ka máteruksï iúmu no míakua jukaspti. 3Ima enkaksï nósani míakua jukapka, enkaksï erak'utakuechani p'íkuapka tamakuaksï no pát'aspti; 4ka máteru enkaksï míakua jukapka, jatsirakorhesptiksï tamakua ka erak'utakua jinkunksï pát'akorhespti. 5Ka k'uírasptiksï jimpokaksï uarhixapka k'uínhchani, jimpoka tempucha ióntaxapka niárani. 6Ka teruk'ani chúri kurhakorhenhaspti uinhachanhani: ¡Uéra je kókuani, tempucha janoxatiia! 7Ka iurhitskirichaksï jauaraspti ka erak'utakuechanksï sési jupiantaani, 8ka no míakua jukarichaksï arhiaspti, míakua jukarichani: Íntskuts'ïni sáni tamakua jimpokaksï juchari erak'utakuecha parhukuekaxakaia. 9K'óruksï míakua jukaricha arhiantaaspti: Ni je piákorheni jini enka ataranhantak'a, ísïchi nónema kueratancheaka. 10Ka enkaksï ima nirani jápka piáni, tempucha niáraspti ka ima enkaksï jinkuntku jápka erokani, tempuchakuarhuksï, tempucha jinkuni inchaspti, ka míkanhaspti. 11Tátsekuaksï niáraspti máteru iurhitskiricha uantaparini: ¡Tata, Tata mítachets'ïni! 12K'óru ima arhiantaaspti: Jíksïni no míteska.

13Jinkuntku ja je jimpokats'ï no míteska na jatini ka ampe jántusï junkua.”

Jántspiricha enkaksï tumina intsïnhaka

(Lk 19.11-27)

14“Auantarhu anapu irechekua acheti méni jáxesti, enka iauani isï nirani jámani, ioarhiapka imeri jántspirichani ka jatsikorhekua patsaraaspti. 15Méchakuani iúmu taiakata íntskuspti ka máteruni tsimani ka máteruni ma, xántku intsaaspti eskaksï xántku sésku ánchetapirinka. 16Ima enka iúmu taiakata intsïnhapka niraspti ka tuminani ánchetaspti ka máteru iúmu taiakata antaspti. 17Ka mák'ueni úspti ima enka tsimani taiakata intsïnhapka, ka tsimani taiakatat'u antaspti. 18Ka ima enka ma taiakatak'u intsïnhapka, jarhaskuspti ka ima achetiri tuminani enka jántspekuempka inchaskuspti.”

19“Ióni jimpo, ima tata enka jántspirichani káauempka k'uanhatsentaspti, ka uantap'antaaspti tumina miiukuantaani. 20Ka antarheraspti ima enka iúmu taiakata p'ípka ka máteru iúmu pérakuspti ka arhispti: ‘Tata, cháts'ïni iúmu taiakata íntskuspka, inte máteru iúmu taiakatechani enkani antaka.’ 21Ka ima arhispti: ‘Sési jarhasti, sésiri ánchekorhesïnka ka mintsinharhikueskari. Sánterukini kánekua íntskuaka. Incha chéti tateri tsípekorhetarhu.’ 22Imak'u antarheraspti enka tsimani taiakatecha p'ípka ka uantaspti: ‘Tata tsimani taiakatarini íntskuska: Ixuksï jarhasti máteru tsimani taiakatecha enkani inte tuminani antaraka.’ 23Ka ima arhispti: ‘Sési jarhasti, sésiri ánchekorhesïnka ka mintsinharhikueskari, sánterukini kánekua íntskuaka. Incha chéti tateri tsípekorhetarhu.’ 24Ka antarheraspti imat'u enka ma taiakatak'u intsïnhapka ka arhispti: ‘Tata, míteska eskari kánekua uinhamarhetspesïnka, ka eskari jima p'ikuntasïnka nani enkari no tsíri jatsik'a, ka jimari uarhop'ani enkari no t'u k'uap'ak'a; 25inteni jimposïni chéka, ka ísï jimposïni chéti taiakatani túskuka; ixu jarhasti, ísï chétiti.’”

26“Ka ima arhispti: ‘Jántspiri, nóri sési ánchekorhesïnka ka xépeskari, ekari míteka eskani no jucheti tsíri jatsikatarhu p'ikuntasïnka; ka eskani jima uarhop'antasïnka nani enkani no ji k'uáp'ak'a, 27t'úri tuminani, tumina kuánetkorherichani íntsaapirinka ka jiák'ani enkani janoguapirinka, ji jucheti tuminani antakua jinkuni p'íntapirinka. 28Euantsï je taiakatani ka imani íntsku je enka témpeni taiakatecha káani jaka, 29jimpoka ima enka jatsika, sánteru intsïnhaati ka sánteru jatsiati; ka ima enka no jatsika, sáni ampe enka kánkorhek'a imani jamperi euanhaati. 30Ka jántspiri no marhuarini uérakua páp'akantu peta je; jimasï ueraati ka sînichani kirisïmeantaani.’”

Iretechaksï útamenhaati

31“Jiák'ani enka Acheti uáp'a t'íntskua jinkuni ka imeri pímpinharhati ánjelichani jinkuni junkuaka, imeri k'éri uaxantskua t'íntskuerikuarhu uaxakaati, 32ka imani japarinksï iámentu iretecha tánkorhent'aati; ka ima máru jarhankustauati, ísï eska karichi erankuti karichi sïuankua jukarichani na jarhankustak'a. 33Ka karichichani jurhik'antani pérakorheauati, ka karichi sïuankua jukarichani uikixkantani péraauati. 34Ka irecha arhiauati imechani enkaksï jurhik'antani jaka: ‘Juíni je, Táte juchetiri uch'akurakatecha, p'i je irechakuani enkats'ï parhakpeni k'ueraakatarhutki cha míntamenhatini jaka. 35Jimpokats'ïni t'ireraska jiáni enkani k'arhimani jápka, ka itsïmatantsïni enkani ji k'arhichani jápka; ka sésirini erokaska enkani iauani ísï jámani jápka; 36xáskuni jámaxapka ka xukutaskarini; p'urhempeskarini enkani p'amenchani jápka; ka niraskarini sáni kataperakuarhu eranhani.’ 37Ka kaxumpitichats'ïni arhiati: ‘Tata, ¿Anti na jatinksïni k'arhimaparini exeski ka t'ireranksïni? Ka ¿Anti jatinispki enkaksïni jucha itsï sáni intsïmpeka enkari k'arhichani jápka? 38¿Anti na jatiniri uérakua isï jámaxapki ka juchaksïni sáni p'imarheni o xukutanksïni enkari xásku jámani jápka? 39¿Anti na jatinksïni p'amenchaparini exespki, óri k'ataperakuarhu jarhani ka niranksïni eranhani?’ 40Ka irecha arhiauati: ‘Sési jimpoksïni arhixaka, enkats'ï íni ma chári erachi sapichuni ísï káani jaka, jíntentsïnisï ísï kámani jaka.’ 41Ka arhiauati imani enkaksï uikixkantani jaka: ‘Kéntikuchets'ïni ikimekatecha, chpírirhu k'uanip'e je enka nómeni póp'ek'a, enka nóampakiti ka imeri ánjelichaksï úmenhaka, 42jimpokani k'arhimaxapka ka nórini t'ireraska ka k'arhichaxapka ka nórini sáni itsï intsïmpeska; 43iauani isï jámaxapka ka nórini sáni chénio páska, ka xáskuni jámaxapka ka nórini sáni xukutaska; k'ataperakuarhu jarhaspka ka p'amenchaxapka ka nórini sáni niraska eranhani.’ 44Ka imaksï arhintaati: Tata, ¿Anti na jatinksïni k'arhimaparini exeski ka k'arhichaparini ka iauanisïri jámani jarhani ka xásku, óri p'amenchani jarhani óri k'ataperakuarhu jarhani ka nóksïni sáni jarhuatani? 45Ka imaksïni mókuchent'aati: ‘Sési jimpoksïni arhixaka, jíntenturini no jarhuataska enkari íni sapichuni ma no ísï kámaka.’ 46Íchkaksï méntku ísï ikimenhaati, ka kaxumpitichaksï méntku isï anapu tsípekuani p'iuati.”

Currently Selected:

Sáni Mateo 25: DKPJ

Highlight

Copy