Sáni Mateo 23

Jesusi fariseuechani ka juramukua jurhentpirichani arhinharhikuasti

(Mk 12.38-40; Lk 11.37-54; 20.45-47)

1Jesusi arhip'espti ka jurhenkorherichantu arhiaspti: 2“Juramukua jurhentpirichaksï ka fariseuechaksï Moisesiri juramukua jimpo jurhentpesïnti. 3Ísï jimpo, ampe enkaksïni xáni ima arhistacheaka, kurha je ka marhuata je; k'óru ásï ísï jáma je eskaksï ima na jámka, jimpokaksï ima arhistatspesïnka néna jámani ka imaksï no ísï jámasïnti. 4Ts'unhapekua ampeksï arhistatspesïnti enka úkua jukak'a úni, ka k'óruksï ima, ni munchuk'urhakua ma manatki. 5Mámaru ampeksï úsïnti xarharakuekani, Diósïri karakatechanksï sánteru kóstarakata jónkorhekuecharhu karanharhikuasïnti, ka jóxurhantaasïntiksï ka jóntsïntaani; 6tsitisïntiksï k'érikuarhu uaxakani t'irekuecharhu ka k'umanchekua tánkorhentskuecharhu. 7Ka eskaksï xanhari jimpo sési uantap'anhaaka, ka eskaksï: Tata jurhentpiri, arhiauaka.”

8“Cha ásï uéka je eskaksïni: Jurhentpiri, arhiaka, jimpokats'ï cha márkueska, chári jurhentpiri mák'uesti. 9Ka parhakpeni ásï nemani: Tate, arhi je; jimpoka mák'ueska Táte enka auantarhu jaka. 10Ka ásï uéke je eskaksïni: Urhets'ïkuri, arhiaka. Jimpoka Krístuk'usï chári urhets'ïkurika. 11Ima enka chánksïni jinkuni sánteru k'érika, jatsisti máteruechani marhuakuani. 12Jimpoka ne enka k'éramakorheaka, ísku nemeni xénhaati, ka ima enka kétsekua uérak'a, k'éri xénhaati.”

13“K'óru ¡Áke cha, juramukua jurhentpiricha ka fariseuecha, ískuts'ï ísï uantasïnka! Auantarhu anapu irechekuarhuts'ï míkatspesïnka, nóts'ï inchasïnka ka nít'uts'ï jiáretpek'i eskaksï máteruecha inchaaka, enkaksï inchakuekani jaka. 14¡Áke cha, juramukua jurhentpiricha ka fariseuecha ísku ísï uantaricha! ¡Jimpokats'ï uarhiti tsîntio k'amantskantasïnka, ka nónentantsï ióskutant'a'sïnka uantatsekorheni, inte jimpots'ï cha sánteru kánekua k'amanharhiranhantaaka!”

15“¡Áke cha, juramukua jurhentpiricha ka fariseuecha, ísku ísï uantaricha! Jimpokats'ï iápuru isï jurhenkorherini ma jirinhakorheni jámasïnka, ka enkaksï xéntak'a imechantsï sánteru chpírirhu k'uanip'asïnka.”

16“¡Áke cha, urhepatspiri pátenharhicha! Uantasïnkats'ï eska nómpe ma jauaka eka nema tiósïo jimpo aiakorheni jámaaka, k'óru enka nema tiripiti tiósïo anapu jimpo aiakorhek'a, aiatspetixatiia. 17¡Cháts'ï no míakua jukaska ka nót'uts'ï jánhaskasïnka! ¿Anti ampe sánteru jukaparhakueski? ¿Tiripiti, o tiósïo enka tiripitini uch'akuraak'a? 18Ka ístuts'ï cha uantasïnka: ‘Nómpema jarhasïnti eka nema kéts'ïtatarakua jimpo ampe aiakorheska, k'óru aiatspetixatiia, ne enka kéts'ïtakua jimpo ampe aiakorheska.’ 19¡Inchantimecha ka no kurhantirecha! ¿Anti ampe sánteru jukaparhakueski, parhantikua o kéts'ïtatarakua? ¿Anti ampesï úch'akurak'i parhantikuani? 20Ima enka kéts'ïtatarakuani jimpo ampe aiakorhek'a, imani jimposï uinhaperani jati, ka iámentu ampe jimpo enka jima kéts'ïtakata jaka. 21Ka ne enka tiósïo jimpo aiakorhek'a, imani jimpo aiakorhexati, ka ístu Diósïni jimpo enka jima irekaka; 22ka ima enka auantani jimpo ampe aiakorhek'a, Diósïri k'éri uaxantskua jimpo, ka Diósïni jimpo aiakorhexati.”

23“¡Áke cha, juramukua jurhentpiricha ka fariseuecha ísku ísï uantaricha! Enkats'ï kuatsitesïni ka putsutini ka kulantuni arhutak'a tiósïo íntspeni. Ka juramukuarhu anapu ampeni, imani enka sánteru jukaparhakueka mirikurhisïnkats'ï úni: Sési p'ikuarhenhetpentani ka p'amop'eni ka Diósïni mintsikani. Íni ampesï k'uanit'i úni ka máteru ampet'u no jurak'uaparini. 24¡Pátenharhichantsï urhekupaasïnka, sïpimuntsï t'úatant'a'sïnka ka kameiuntsï kunak'ani!”

25“¡Áke cha, juramukua jurhentpiricha ka fariseuecha ísku ísï uantaricha! Jimpokats'ï tsúntsuni ka urhanichani ampe kutsuparhakuantasïnka, ka cháts'ï uininhetixaka sïpatspekua ampe, ka ampe enka no jurhimpekueka. 26¡Fariseo pátenharhi, tsúntsuni ka urhanini jinirisï jupanhantaaka ka iámu sési jáxent'aati!”

27“¡Áke cha, juramukua jurhentpiricha ka fariseuecha ískuts'ï ísï uantasïnka! Jimpokats'ï uarhiri jántskua urapitini járhaska, enkaksï táts'ïkuni sési xarharani jarhak'a, ka inchatsetini úni tereri ka karhasï ampe jarhani. 28Xárhaskats'ï: Kaxumpitintsï xarharasïnka, ka k'óruts'ï chkuántirakua ka ikiata ampe uininhetixaka.”

29“¡Áke cha, juramukua jurhentpiricha ísku ísï uantaricha! Jimpokats'ï eratakua úkuantasïnka Diósïri uantarichani jima enkaksï jatsinhantka, ka kaxumpiticheri eratakuechantsï kasïperantaasïnka, 30ka uantasïnkats'ï: ‘Ekachi imani jurhiatekua irekapirinka enkaksï juchari tátepka, nóchi jarhop'epirinka uántikuani Diósïri uantarichani.’ 31Íni jimpots'ï uantakorhent'axaka eskats'ï ima uáp'eska enkaksï Diósïri uantarichani uántikuaka. 32¡Cháchka k'amarhuta jeia, ampe enkaksï chári tátecha uénaka!

33¡Akuitsecha, akuitseni járhaticha! ¿Anti chpírintsï néna sïpakorhekua?”

34“Jíksïni axacheauaka Diósïri uantarichani ka mímixetichani ka juramukua jurhentpirichani, ka cháts'ï máru uántikuauaka, óts'ï krúsirhu cháparhataani, ka máteruechantsï chári k'umanchekua tánkorhentskuecharhu k'uikirheauaka, ka máteruechantsï iretecharhu isï antankuani káuaka ataani. 35Ísï jimpo, chánksïni niáchent'aati erakukatecheri iurhiri enka iurheka, Abeli kaxumpitiri uénani ka Sakariasi Berekiasi uáp'eri, enkats'ï tiósïo ekuarhu ka jima enka kéts'ïtakua jaka uántikuka. 36Sési jimpoksïni arhisïnka eska i ampe iásï anapuechaksï maiampetaranhantaaka.”

Jesusi Jerusaleni jimpo ueraxati

(Lk 13.34-35)

37“¡Jerusaleni, Jerusaleni enkari Diósïri uantarichani uántikuak'a ka tsakapkueraanti imechani enkari axamenhak'a! Namoni xanhari uékaspki chéti uátsïchani márkuerantaani, eska tsíkata na márkuerantaaka kereskuarhu pipichu sapinharhichani, k'óruri no uékaska 38Chénio pínantentaati. 39Arhixakaksïni ekats'ïni iásï uératini jínteni nóteru exeaka ekats'ï jamperi uantaaka: ‘Úch'akurakatesti ima enka Achani jimpo jurhani jaka.’”

Currently Selected:

Sáni Mateo 23: DKPJ

Highlight

Copy